မောင်မင်းမော်၊ နိုဝင်ဘာ-၁၅
မန္တလေးမြို့ ကြာနီကန်ကျေးရွာအနီးရှိ အေးရိပ်ငြိမ်သုဿန် အဝင်အထွက်လမ်း ပြုပြင်ခင်းကျင်းနိုင်ရန်အတွက် မန္တလေးမြို့နေ တရုတ်ကျောက်မျက်ကုန်သည် သူငယ်ချင်းသုံးဦးက စည်ပင်သာယာသို့ ငွေကျပ်သိန်း(၈၀၀) လှူဒါန်းခဲ့ကြောင်း သတင်းရရှိသည်။
မန္တလေး-မတ္တရာ ကားလမ်းဘေးရှိ အေးရိပ်ငြိမ်သုဿန် လမ်းအား နိုင်လွန်ကတ္တရာ လမ်းခင်းရန်အတွက်ဟုဆိုကာ အလှူရှင်သုံးဦးက ကျပ်သိန်း(၈၀၀)ကို နိုဝင်ဘာ(၁၄)ရက်တွင် လာရောက်လှူဒါန်းခြင်း ဖြစ်ကြောင်း မန္တလေးမြို့တော် စည်ပင်သာယာရေးကော်မတီ လမ်းတံတားဌာန၊ ဌာနမှူး ဦးသန်းထိုက်ဦးက ပြောသည်။
လမ်းခင်းရန် လှူဒါန်းသည့် အလှူရှင်များမှာ မန္တလေးမြို့ခံ ကျောက်မျက်လုပ်ငန်း လုပ်ကိုင်သူ (တရုတ်လူမျိုး)များ ဖြစ်သည်ဟု ဆိုသည်။
အေးရိပ်ငြိမ်သုဿန်လမ်းအား နိုင်လွတ်ကတ္တရာလမ်း ခင်းနိုင်ရန် ကျပ်သိန်း (၁၆၀၀)ဝန်းကျင် ကုန်ကျမည်ဖြစ်ပြီး ကျပ်သိန်း(၈၀၀) အလှူရှင်ပေါ်ထွက်လာရာ ထပ်မံလိုအပ်သည့် ကုန်ကျငွေကို စည်ပင်သာယာမှ ကျခံကာ လာမည့်ရက်ပိုင်းအတွင်း လမ်းပြုပြင်ခြင်းလုပ်ငန်းများ စတင်မည်ဟု ဦးသန်းထိုက်ဦးက ပြောသည်။
အေးရိပ်ငြိမ်သုဿန်လမ်းသည် သွားလာရခက်ခဲပြီး ပျက်စီးနေသည့်အတွက် သူငယ်ချင်းများ စုပေါင်းကာ လှူဒါန်းခဲ့ခြင်း ဖြစ်ကြောင်း အလှူရှင် ဦးချင်းရွှေက Mandalay In-depth News သို့ ပြောသည်။
“ဒီလိုပဲ သူငယ်ချင်းတွေစုပြီး လှူလိုက်တာပါ။ ဖားကန့်မှာလည်း လမ်းမကောင်းတဲ့ သုသန်လမ်းတို့ လှူပေးလိုက်တာပဲ” ဟု ၎င်းက ပြောသည်။
အေးရိပ်ငြိမ်သုဿန်အတွင်း ဗုဒ္ဓဘာသာ၊ ခရစ်ယာန်၊ ဟိန္ဒူ၊ တရုတ်သချိုင်းများ၊ လူနည်းစုသင်္ချိုင်းနှင့် စစ်သင်္ချိုင်းများ ရှိသည်။ အေးရိပ်ငြိမ် သုဿန်လမ်းသည် အဝင်ဝမှ ဗုဒ္ဓဘာသာသချိုင်းအထိ အရှည်ပေ(၄၇၀၀)ကျော်နှင့် အကျယ် (၁၈)ပေရှိကာ နိုင်လွန်ကတ္တရာခင်းခြင်းကို ယခုလတွင် စတင်ဆောင်ရွက်မည်ဖြစ်ကာ ပြီးဆုံးရန် အချိန်တစ်လကျော် ကြာမည်ဖြစ်သည်ဟု စည်ပင်သာယာ လမ်းတံတားဌာနမှူး ဦးသန်းထိုက်ဦးက ပြောသည်။
မန္တလေးမြို့တော် စည်ပင်သာယာအနေဖြင့် ကိုယ့်အားကိုယ်ကိုး လမ်းများခင်းရာတွင် ပြည်သူနှင့် စည်ပင်သာယာတို့မှ တစ်ဝက်စီ ကျခံဆောင်ရွက်ခြင်းဖြစ်ကာ စည်ပင်သာယာ နယ်နိမိတ်အတွင်းမှ တင်ပြလာသည့် လမ်း(၄၀)ကျော်အား ကိုယ့်အားကိုယ်ကိုး လမ်းများအဖြစ် ခင်းကျင်းဆောင်းရွက်နေပြီး ဘတ်ဂျက်ငွေ ကျပ်သန်း(၁၀၀၀) လျာထားကြောင်း ၎င်းက ပြောသည်။
အေးရိပ်ငြိမ်သုဿန်အဝင်လမ်း။ လမ်းခင်းရန် လှူဒါန်းသည်ကို မန္တလေးမြို့တော်ဝန်နှင့် စည်ပင်ကော်မတီဝင်များ လက်ခံရယူနေစဉ်။ Photo – Mg Min Maw, MCDC.