ဘုံကမ္ဘာထွန်း၊ နိုဝင်ဘာ-၂
မန္တလေးမြို့တွင် လမ်းဘေး ဆိုင်ကယ်ရပ်ကာ အပေါ့သွားနေသူတစ်ဦးထံမှ ဆိုင်ကယ်လုယူ ထွက်ပြေးသည့် လူငယ်အမျိုးသား သုံးဦး ရဲတပ်ဖွဲ့မှ လိုက်လံဖမ်းဆီးစဉ် ဆိုင်ကယ်မှောက်၍ တစ်ဦးသေဆုံးမှု အောက်တိုဘာ (၃၁)ရက် ညပိုင်းက ဖြစ်ပွားခဲ့ကြောင်း ပြည်ထဲရေးဝန်ကြီးဌာနက သတင်းထုတ်ပြန်သည်။
မန္တလေးမြို့ ချမ်းမြသာစည်မြို့နယ် (၆၅)လမ်းနှင့် (၆၆)လမ်းကြား မြတ်ပန်းဝါလမ်းတွင် အမျိုးသားတစ်ဦး ဆိုင်ကယ်စက်မရပ်ဘဲ လမ်းဘေးအပေါ့သွားနေချိန် လူငယ်အမျိုးသားသုံးဦး ဆိုင်ကယ်တစ်စီးဖြင့် ရောက်ရှိလာကာ အပေါ့သွားနေသူကို တွန်းထုတ်၍ ဆိုင်ကယ် လုယူမောင်းနှင်သွားခဲ့သည်ဟု ဆိုသည်။
ဆိုင်ကယ်လုယက်ခံရကြောင်း ရဲစခန်းသို့ အကြောင်းကြားခဲ့ရာ ချမ်းမြသာစည်မြို့နယ် အမှတ်( ၁၁) နယ်မြေရဲစခန်းမှ ရဲတပ်ဖွဲ့ဝင်များသည် ခိုးယူသွားသည့် ဆိုင်ကယ်တွင် တပ်ဆင်ထားသော GPS ဖြင့် လိုက်လံရှာဖွေခဲ့သည်။ ထို့နောက် ပုသိမ်ကြီးမြို့နယ်၊ သဇင်ကုန်း နှင့် သမ္မတော ကျေးရွာကြား မန္တလေး-ပြင်ဦးလွင်လမ်းတွင် အမျိုးသားသုံးဦးကို ဆိုက်ကယ်နှစ်စီးနှင့်အတူ တွေ့ရှိသဖြင့် လိုက်လံဖမ်းဆီးခဲ့ရာမှ ဆိုင်ကယ်မှောက်ကာ လုယက်ထွက်ပြေးသူတစ်ဦး သေဆုံးခဲ့ခြင်းဖြစ်သည်ဟု ပြည်ထဲရေးဝန်ကြီးဌာန၏ သတင်းထုတ်ပြန်ချက်တွင် ဖော်ပြထားသည်။
အဆိုပါ ဖြစ်စဉ်တွင် ဆိုင်ကယ်လုယက်သူများမှာ အသက်(၂၀)ဝန်းကျင် အမျိုးသားသုံးဦးဖြစ်ပြီး လက်ရှိတွင် ဆိုင်ကယ်မှောက်၍ သေဆုံးသူအပါအဝင် နှစ်ဦး ဖမ်းမိထားပြီး တစ်ဦး ထွက်ပြေးလွတ်မြောက်နေသည်ဟု သတင်းထုတ်ပြန်ချက်တွင် ဖော်ပြထားသည်။
ယင်းအမှုနှင့်ပတ်သက်၍ ဆိုင်ကယ်လုယက်သည့် အမျိုးသားသုံးဦးကို ချမ်းမြသာစည်မြို့နယ် အမှတ်(၁၁)နယ်မြေရဲစခန်းတွင် ရာဇသတ်ကြီး ဥပဒေ ပုဒ်မ ၃၈၂ (သေစေရန် သို့မဟုတ် နာကျင်စေရန် ပြင်ဆင်ခိုးမှု)ဖြင့် လည်းကောင်း၊ သေဆုံးသူ အသက်(၂၃)နှစ်အရွယ် ဖြိုးလေး(ခ)ဂျိုကြီး ဆိုသူကို အုန်းချော နယ်မြေရဲစခန်းတွင် ရာဇသတ်ကြီး ဥပဒေ ပုဒ်မ ၃၀၄(က) (ပေါ့လျော့မှုကြောင့် လူသေမှု)ဖြင့် လည်းကောင်း အမှုဖွင့်စစ်ဆေးလျက်ရှိကြောင်း ပြည်ထဲရေးဌာနမှ သတင်းထုတ်ပြန်သည်။
ဆိုင်ကယ်လုယက်ထွက်ပြေးရာ ရဲတပ်ဖွဲ့က လိုက်လံဖမ်းဆီးချိန် ဆိုင်ကယ်မှောက်၍ တစ်သီးသေ၊ တစ်ဦးဖမ်းဆီးခံရ။ ဓါတ်ပုံ – ပြည်ထဲရေး ဝန်ကြီးဌာန။