ရောဂါခြေချုပ် (Quarantine) မနေနိုင်ပါက ပြည်ဝင်ခွင့်မပြုဘဲ Return to Home ဟုဆို
ထက်ဘုန်းခေါင်၊ မောင်တာ၊ မတ်-၁၅
တရုတ်နိုင်ငံ အပါအဝင် Covid-19 ရောဂါ ကူးစက်ဖြစ်ပွားမှုများသည့် နိုင်ငံ(၇)နိုင်ငံမှ ခရီးသွားများကို ပြည်တွင်းသို့ ဝင်ရောက်မည်ဆိုပါက ရောဂါ ခြေချုပ်အဖြစ် (၁၄)ရက်ကြာ ထားရှိစောင့်ကြည့်မည့် အစီအစဉ် ယနေ့ စတင်ပြီဖြစ်သည်။
တရုတ်၊ ကိုရီးယား၊ အီတလီ၊ ပြင်သစ်၊ စပိန်၊ ဂျာမနီနှင့် အီရန်နိုင်ငံမှ ခရီးသွားများအနေဖြင့် မြန်မာနိုင်ငံသို့ ဝင်ရောက်မည်ဆိုပါက ရောဂါကူးစက်ခံရမှု ရှိ၊မရှိ စောင့်ကြည့်နိုင်ရန် (၁၄)ရက်ကြာ ရောဂါခြေချုပ် (Quarantine) အဖြစ် နေထိုင်ရမည်ဖြစ်ပြီး ထိုသို့ နေထိုင်နိုင်ခြင်း မရှိသူများကို ပြည်ဝင်ခွင့် မပြုရန် ကျန်းမာရေးနှင့် အားကစားဝန်ကြီးဌာနက ယနေ့ မတ်လ(၁၅)ရက်တွင် ညွှန်ကြားချက်ထုတ်ပြန်ခဲ့သည်။
မန္တလေးမြို့ တံတားဦး အပြည်ပြည်ဆိုင်ရာ လေဆိပ်သို့လည်း ယနေ့ မတ်လ(၁၅)ရက်တွင် ကျန်းမာရေးနှင့် အားကစားဝန်ကြီးဌာနက အထက်ပါအတိုင်း ညွှန်ကြားထားကြောင်း လေဆိပ်တာဝန်ရှိသူတစ်ဦးက Mandalay In-depth News အား အတည်ပြုသည်။
“ဒီနေ့ ညွှန်ကြားစာ ထုတ်လို့ အခု စပြီး စစ်ဆေးနေပါပြီ”ဟု တံတားဦးလေဆိပ် တာဝန်ရှိသူတစ်ဦးက ပြောသည်။
ထိုသို့ စစ်ဆေးရာ ယနေ့ တံတားဦးလေဆိပ်သို့ ဆင်းသက်လာသည့် ဘန်ကောက်အဲဝေး လေကြောင်းလိုင်းမှ ခရီးသည်(၁၅)ဦး ပြည်တွင်းသို့ ဝင်ရောက်ခြင်း မရှိဘဲ ပြန်လည်ထွက်ခွာသွားသည်ဟု လေဆိပ်တာဝန်ရှိသူများက ပြောသည်။ ထိုသို့ ပြည်တွင်းသို့ မဝင်ဘဲ ဘန်ကောက်အဲဝေးလေကြောင်းလိုင်းနှင့် ပြန်လည်ထွက်ခွာသွားသူများမှာ ပြင်သစ်နိုင်ငံသား(၅)ဦး၊ ဂျာမနီ(၇)ဦး၊ အီတလီ၊ ပိုလန်နှင့် ချီလီနိုင်ငံသား (၁)ဦးစီတို့ ဖြစ်သည်ဟု ဆိုသည်။ပိုလန်နှင့် ချီလီနိုင်ငံတို့မှာ ၁၄ရက်ကြာ စောင့်ကြည့်ရမည့် နိုင်ငံများတွင် မပါဝင်သော်လည်း အတူလာသူများဖြစ်၍ ပြန်သွားခြင်းဖြစ်နိုင်သည်ဟု လေဆိပ်တာဝန်ရှိသူတစ်ဦးက သုံးသပ်သည်။
“Quarantine (ရောဂါခြေချုပ်) ၁၄ရက် နေမလား၊ Return to Home လားပေါ့။ ဝင်မယ်ဆိုရင်တော့ ၁၄ရက်စောင့်ကြည့်ခံရမယ်”ဟု လေဆိပ်တာဝန်ရှိသူတစ်ဦးက ပြောသည်။
လက်ရှိတွင် လေဆိပ်မှ တဆင့် နိုင်ငံတကာ လေကြောင်းလိုင်းများ၊ သက်ဆိုင်ရာ ခရီးသွားကုမ္မဏီများကို အထက်ပါအတိုင်း စောင့်ကြည့်စစ်ဆေးမှုများ လုပ်ဆောင်နေပြီဖြစ်ကြောင်း အသိပေးအကြောင်းကြားမှုများ လုပ်ဆောင်နေပြီဟု ဆိုသည်။
လေဆိပ်၌ စစ်ဆေးခြင်းများကို လေဆိပ်တာဝန်ရှိသူများနှင့် ဌာနဆိုင်ရာများမှ ပူးပေါင်းစစ်ဆေးခြင်းဖြစ်ပြီး မည်သည့်ဆေးရုံ၌ ထားရှိ စစ်ဆေးမည်ဆိုသည်ကိုမူ ကျန်းမာရေးနှင့် အားကစားဝန်ကြီးဌာနက စီစဉ်မည်ဟု သိရကြောင်း လေဆိပ်တာဝန်ရှိသူတစ်ဦးက ပြောသည်။
ကျန်းမာရေးနှင့် အားကစားဝန်ကြီးဌာန၏ ထုတ်ပြန်ချက်အရ အထက်ပါ (၇)နိုင်ငံ အပါအဝင် အမေရိကန်နိုင်ငံ ပါဝင်သော်လည်း တံတားဦးလေဆိပ်သို့ ညွှန်ကြားမှုတွင်မူ အမေရိကန် မပါဝင်ဟု လေဆိပ်တာဝန်ရှိသူက ဆိုသည်။
Covid-19 ရောဂါ ကာကွယ်၊ထိန်းချုပ်၊ ကုသရေး ဗဟိုကော်မတီနှင့် သက်ဆိုင်ရာ ဝန်ကြီးဌာန တာဝန်ရှိသူများ ဆွေးဒနွေးညှိနှိုင်းချက်အရ ပြည်ပမှ ရောဂါပိုး ကူးစက်ခံရသူ ခရီးသွားများ ဝင်ရောက်မှု ကာကွယ်နိုင်ရန်အတွက် ရောဂါကူးစက်ပျံ့ပွားသူ (၆၀၀၀)နှင့်အထက် ရှိသည့် ကိုရီးယား၊ အီတလိနှင့် အီရန်နိုင်ငံတို့မှ မြန်မာသို့ လာရောက်မည့် ခရီးသွားများအားလုံး Covid-19 ရောဂါ ကင်းရှင်းမှုရှိကြောင်း ဆေးစစ်ချက်လက်မှတ် ပြသနိုင်မှသာ လေကြောင်းလိုင်းများမှ လိုက်ပါစီးနင်းခွင့်ပြုမည် ဖြစ်သဖြင့် အဆိုပါ နိုင်ငံများမှ ခရီးသွားများအား ဝန်ဆောင်မှုပေးနေသည့် ခရီးသွားကုမ္မဏီများနှင့် ခရီးသွားလုပ်ငန်း လုပ်ကိုင်နေသူများမှ ပူးပေါင်းပါဝင် လိုက်နာဆောင်ရွက်ပေးရန် ဟိုတယ်နှင့် ခရီးသွားဝန်ကြီးဌာနက မတ်လ(၁၂)ရက်ကတည်းက အကြံပြုတိုက်တွန်းထားသည်။
ပြီးခဲ့သည့် ဒီဇင်ဘာလမှ စတင်ကာ တရုတ်နိုင်ငံတွင်ဖြစ်ပွားသည့် COVID-19 ရောဂါသည် လက်ရှိတွင် ကမ္ဘာ့နိုင်ငံပေါင်း (၁၂၃) နိုင်ငံ၌ ကူးစက်ဖြစ်ပွားနေသည်။
Covid-19 ရောဂါ အတည်ပြုလူနာ မတွေ့ရှိသေးသော ကမ္ဘ့ာကုလသမဂ္ဂအဖွဲ့ဝင်နိုင်ငံ (၇၁) နိုင်ငံ ရှိပြီး ထိုအထဲတွင် မြန်မာနိုင်ငံလည်း ပါဝင်ကြောင်း ကျန်းမာရေးနှင့်အားကစားဝန်ကြီးဌာန ထုတ်ပြန်သည်။