သြင်္ကန်ကာလအတွင်း မန္တလေးမြို့အနီးရှိ လူအသွားအလာများသည့် နေရာများ၌ လူစုလူဝေး မဖြစ်စေရန် နည်းလမ်းပေါင်းစုံဖြင့် ဆောင်ရွက်မည်ဟု ခေတ္တဝန်ကြီးချုပ်ဆို
မောင်မင်းမော်၊ မတ်- ၂၁
ဦးပိန်တံတားနှင့် ဒုဌဝတီမြစ်ကမ်းဘေးရှိ အပန်းဖြေစခန်းများအပါအဝင် သြင်္ကန်ကာလအတွင်း မန္တလေးမြို့အနီးရှိ လူအများသွားလာလည်ပတ်သည့် နေရာများတွင် လူစုလူဝေး မဖြစ်ပေါ်စေရန် နည်းလမ်းပေါင်းစုံဖြင့် စီမံဆောင်ရွက်မည် ဖြစ်ကြောင်း မန္တလေးတိုင်းအစိုးရအဖွဲ့ ခေတ္တဝန်ကြီးချုပ် ဦးဇာနည်အောင်က ပြောသည်။
Covid-19 ရောဂါ မထိန်းချုပ်နိုင်သေးပါက သြင်္ကန်ကာလအတွင်း တောင်သမန်အင်း ဦးပိန်တံတားနှင့် ဒုဌဝတီ မြစ်ဘေးရှိ အပန်းဖြေစခန်းများ၌ လူစုလူဝေး မဖြစ်စေရန် နည်းလမ်းပေါင်းစုံဖြင့် စီမံဆောင်ရွက်မည်ဟု ၎င်းက ပြောပြီး မည်သို့ စီစဉ်မည်ဆိုသည်ကိုမူ ပြောကြားခြင်း မရှိပါ။
“(သြင်္ကန်နှင့် ပွဲလမ်းသဘင်များ) ပိတ်ပင်ပိတ်ထားသော်လည်း ၇မိုင်တို့၊ ၃မိုင်တို့၊ ၅မိုင်တို့၊ ပြီးတော့ ဦးပိန်တံတားတို့ မှာလည်းပဲ လူစုလူဝေး ဖြစ်နိုင်တယ်ဆိုပြီး စိုးရိမ်ကြတယ်၊။ မှန်ပါတယ်၊ စိုးရိမ်သင့်ပါတယ်။ ဒီဗိုင်းရပ်ကို ကမ္ဘာမှာ ထိန်းချုပ်နိုင်စွမ်း မရှိသေးသ၍ မည်သည့် လူစုလူဝေးကိုမှ မလုပ်အောင် စီမံခန့်ခွဲမှု နည်းလမ်းပေါင်းစုံနဲ့ ကျွန်တော်တို့က ဆောင်ရွက်သွားမှာ ဖြစ်တယ်။ လူစုလူဝေး မလုပ်ရပါဘူးလို့ ပြောထားပြီးပြီလေ”ဟု ခေတ္တဝန်ကြီးချုပ် ဦးဇာနည်အောင်က ပြောသည်။
COVID-19 ရောဂါ ဂယက်ကြောင့် ယခုနှစ် သြင်္ကန်ပွဲတော်တွင် မန္တလေးမြို့၌ သြင်္ကန်မဏ္ဍပ်ကြီးများ ဆောက်လုပ်ခြင်းနှင့် လမ်းလျှောက်သြင်္ကန် အပါအဝင် လူစုလူဝေးဖြစ်စေသည့် သြင်္ကန်အစီအစဉ်များ ကျင်းပတော့မည် မဟုတ်ကြောင်း မန္တလေးတိုင်းအစိုးရက အသိပေးထားသည်။
ထိုသို့ မန္တလေး သြင်္ကန်အစီအစဉ်များ ပိတ်သိမ်းလိုက်ပြီဖြစ်၍ မန္တလေးမြို့အနီးရှိ လူအသွားအလာများသည့် နေရာများတွင် ယခင်နှစ်များထက် ပိုမိုသွားရောက်ကြပြီး လူစုလူဝေးများ ဖြစ်ပေါ်လာနိုင်သည့်အတွက် ထိုသို့ မဖြစ်ပေါ်စေရန် တိုင်းအစိုးရက စီမံဆောင်ရွက်မည်ဟု ဦးဇာနည်အောင်က ပြောသည်။
မတ်လ(၁၉)ရက်က ကျင်းပခဲ့သည့် မန္တလေးတိုင်းလွှတ်တော် အစည်းအဝေးအပြီးတွင် ဦးဇာနည်အောင်က သတင်းမီဒီယာများအား အထက်ပါအတိုင်း ပြောကြားသည်။
မန္တလေးမြို့အနီးရှိ အများပြည်သူ သွားလာလည်ပတ်မှုများသည့် နေရာများတွင် လူစုလူဝေးမဖြစ်ပေါ်စေရန် စီမံဆောင်ရွက်မည်ဟု ဆိုသော်လည်း အဆိုပါ နေရာများအား ပိတ်ပင်ရန် ရှိ၊မရှိကိုမူ ဦးဇာနည်အောင်က ရှင်းလင်းပြောကြားခြင်း မရှိပါ။ လူစုလူဝေးမဖြစ်ပေါ်စေရေး အစိုးရတွင် စီမံခန့်ခွဲရန် တာဝန်ရှိသလို လူတစ်ဦးတစ်ယောက်ချင်း၌လည်း တာဝန်ရှိကြောင်း ဦးဇာနည်အောင်က ပြောသည်။
လက်ရှိတွင် မန္တလေးတိုင်းအတွင်းရှိ စင်တင်၊ ကေတီဗွီ၊ နိုက်ကလပ်၊ ဘားနှင့် အနှိပ်ခန်းများကိုလည်း ဧပြီ(၃၀)ရက်အထိ ယာယီပိတ်သိမ်းထားရန် မန္တလေးတိုင်းအစိုးရက မတ်လ(၁၉)ရက်တွင် တရားဝင် စာထုတ်ကာ ညွှန်ကြားထားသည်။
မြန်မာနိုင်ငံအတွင်း Covid-19 ရောဂါ ကူးစက်ဖြစ်ပွားသူ တစ်ဦးမျှ မရှိသေသော်လည်း အဆိုပါ Covid-19 ရောဂါသည် လူစုလူဝေးများပြားသည့် နေရာများတွင် လျင်မြန်စွာ ကူးစက်နိုင်သည့်အတွက် သြင်္ကန်ပွဲတော် မဏ္ဍပ်ဆောက်လုပ်ခြင်းများ အပါအဝင် မြန်မာနိုင်ငံအတွင်း ပွဲလမ်းသဘင် အခမ်းအနားများ ဧပြီလကုန်အထိ ကျင်းပခွင့်ပြုမည် မဟုတ်ကြောင်း နိုင်ငံတော်သမ္မတရုံးက မတ်လ(၁၃)ရက်တွင် ထုတ်ပြန်ထားသည်။
ကမ္ဘာပေါ်တွင် လက်ရှိ COVID-19 ရောဂါ ကူးစက်ဖြစ်ပွားနေသည့် နိုင်ငံနှင့် နယ်မြေဒေသစုစုပေါင်း(၁၇၀)ကျော်အထိ ရှိနေပြီး ပြည်သူလူထုအနေဖြင့် Covid-19 ရောဂါ ကာကွယ်ရေးအတွက် ဝန်ကြီးဌာန၏ ညွှန်ကြားချက်နှင့် ကျန်းမာရေး အသိပညာပေးချက်များအား တိကျစွာ လိုက်နာဆောင်ရွက်ရန် ကျန်းမာရေးနှင့် အားကစားဝန်ကြီးဌာနက တိုက်တွန်းနှိုးဆော်ထားသည်။
ဦးပိန်တံတားသို့ လာရောက်လည်ပတ်သူများကို မတ်လ(၁၅)ရက်က တွေ့ရစဉ်။ သြင်္ကန်ကာလအတွင်း ဦးပိန်တံတားသို့ လူဦးရေ ထောင်နှင့်ချီကာ လာရောက်လေ့ရှိသည်။/ Photo – Mg Min Maw
#Mandalay_Indepth_News
.