د بې سرحده خبريالانو سازمان د طالبانو له لوري د خبريالانو نيول د رسنيو شدیده ځپنه بللې او له دې ډلې يې غوښتي چې نيول شوي خبريالان دې خوشي کړي.
طالبانو د «ناز راډيو» خبريال اسماعيل سعادت، د «اقرأ راډيو» خبريال وحيد الله معصوم او د «اولس غږ» راډيو خبريال احسان الله نسل په خوست ولايت کې د «موسيقۍ د خپرولو» او «له ښځينه اورېدونکو سره د ټليفوني خبرو» په تور نيولي دي.
دې ډلې همدا راز په غزني کې هم د «ازادۍ راډيو» خبريال حبيب الرحمان تاثير نيولی او زنداني کړی دی.
طالبانو د خبريالانو د نيولو تر څنګ په کابل کې «نور» او «بريا» خصوصي ټلويزونونه هم تړلي دي.
د بې سرحده خبريالانو د سويلي اسيا د څانګې مشرې سليا مرسيې د طالبانو دا اقدام د رسنيو په بې رحمه ځپنه کې «تنبيهي تصميمونه» بللي دي.
دې ويلي چې طالبانو په بې رحمه توګه خبريالان په نښه کوي؛ په ځانګړې توګه هغه خبريالان چې له باندنيو رسنيو سره کار کوي او د دې ډلې پر خلاف په تبليغ کولو تورن وي.
د دې په وينا، کوم خبريالان چې د بهرنيو رسنيو لپاره کار کوي له خپلسرو نيونو او هر ډول محدوديت سره مخ دي.
سليا مرسيې زياته کړې چې ټلويزوني خبري شبکې هم د طالبانو له سانسور سره مخ دي.
د بې سرحده خبريالانو سازمان د څلورو خبريالانو د خوشي کېدو غوښتنه کړې او له طالبانو يې غوښتي چې د دوو ټلويزوني شبکو د تړلو امر دې هم لغو کړي.