د افغانستان د خبریالانو مرکز وایي چې د طالبانو د عدلیې وزارت ځواکونو په کابل کې د «افغان غږ» (آوا) خبري اژانس او د تبیان فرهنګي مرکز دفترونه تړلي دي.
دغه مرکز د باخبره سرچینو په حواله لیکلي چې د طالبانو د عدلیې وزارت ځواکونو تېره پنجشنبه (د تلې ۲مه) د کابل ښار په دشت برچي سیمه کې د آوا خبري اژانس او تبیان فرهنګي مرکز دفترونه تړلي دي.
د افغانستان د خبریالانو مرکز زیاته کړې چې د روانې اوونۍ د شنبې په ورځ د آوا خبري اژانس خبریال ضامنعلي چاوشي او د تبیان فرهنګي مرکز پنځه کارکوونکي د طالبانو د عدلیې وزارت ته احضار شوي وو او له وزارت ته تر ننوتلو وروسته نیول شوي دي.
د افغانستان د خبریالانو مرکز د افغان غږ خبري اژانس د دفتر تړل کېدل او د دغه رسنۍ د خبریال ضامنعلي چاوشي نیول په کلکه غندلي او له طالبانو یې غوښتي چې دغه خبریال ژر تر ژره او له کوم قید او شرط پرته خوشې کړي.
دغه مرکز همداراز د افغان غږ د دفتر د بېرته پرانیستلو غوښتنه کړې او ویلي یې دي چې د دې رسنۍ کارکوونکو ته باید اجازه ورکړل شي چې له ګواښ او د نیول کېدو له وېرې پرته خپل کار په ازادانه توګه ترسره کړي.
تبیان فرهنګي مرکز او د افغان غږ (آوا) خبري اژانس د سید عیسی حسيني مزاري له خوا اداره کېږي. نوموړي په خپلو ویناوو کې څو ځله د طالبانو د سیاستونو ملاتړ کړی دی.
تر اوسه روښانه نه ده چې طالبانو د حسيني مزاري اړوند فرهنګي مرکز او رسنۍ د څه دلیل له مخې تړلي دي. د طالبانو د عدلیې وزارت تر اوسه په دې اړه څه نه دي ویلي.
طالبانو په وروستیو ورځو کې د کابل په شیعهمیشتو سیمو کې څو دیني او ښوونیز مرکزونه او همداراز یو روغتیايي مرکز هم تړلي دي.
