د امریکا د منځمهالو ټاکنو د پایلو او له ایران سره د جګړې د پراخېدو د احتمال د کمېدو په اړه د هیلو له زیاتېدو سره، د تېلو نړیوالې بیې په تېرو دوو ورځو کې څه باندې ۹ سلنه راټیټې شوې دي.
رویټرز خبري اژانس د پنجشنبې په ورځ، د لړم ۱۴مه، راپور ورکړی، چې په دې موده کې د برنټ تېلو بیه ۹.۴ سلنه او د امریکا د خامو تېلو بیه ۹.۵ سلنه کمه شوې ده.
د راپور له مخې، دغه کموالی وروسته له هغې راغلی، چې د امریکا په منځمهالو ټاکنو کې د جمهوريغوښتونکو له ماتې وروسته له ایران سره د امریکا او اسراییلو د جګړې د پراخېدو د احتمال د کمېدو په اړه هیلې زیاتې شوې دي.
رویټرز لیکلي، چې نن سهار د برنټ تېلو یو بېرل په ۹۳.۸۲ ډالرو او د امریکا د خامو تېلو یو بېرل په ۸۶.۹۲ ډالرو پلورل شوی دی. د دواړو شاخصونو بیې د اګست له ۳۱مې راهیسې تر ټولو ټیټې کچې ته رسېدلې دي.
د راپور له مخې، د خلیج هېوادونو د حکومتي کړیو ته نږدې دوو سرچینو ویلي، چې د ډونالډ ټرمپ د سیاسي دریځ کمزوري کېدل او د دیموکراتانو تر کنټرول لاندې کانګرس له لوري د هغه پر پوځي انتخابونو د محدودیتونو لګولو احتمال، له ایران سره د جګړې د پای ته رسولو لپاره د هوکړې چانس زیات کړی دی.
د سپارټا کاموډیټیز شرکت د تېلو ارشد شنونکي جون ګو ویلي، بازارونه د جګړې د پای ته رسېدو احتمال زیات ارزوي، خو د ډیپلوماسۍ لاره لا هم روښانه نه ده او د تېلو په بیو کې به بدلونونه دوام وکړي.
د امریکا ولسمشر ډونالډ ټرمپ هم پرون ویلي، چې د هرمز تنګي له لارې د تېلو لېږد زیات شوی او د جګړې له مخکینۍ کچې سره برابر شوی دی.
خو د رویټرز د راپور له مخې، لا هم د جګړې د بیا پراخېدو اندېښنې شته. د «اوراسیا» ډلې د امریکا له لوري پر ایران د نوي برید احتمال ۶۰ سلنه اټکل کړی او خبرداری یې ورکړی، چې د جګړې د شدت په صورت کې ښايي د برنټ تېلو بیه یو ځل بیا په هر بېرل کې له ۱۱۰ تر ۱۲۵ ډالرو پورې لوړه شي.
