“Azərbaycan hökumətini israrla insan hüquq və əsas azadlıqlarına hörmət etməyə çağırırıq”
ABŞ Azərbaycanda jurnalistlərin davam edən həbslərindən narahatlıq hissi keçirdiyini bildirir.
Son 10 gündə artıq müstəqil mətbuatdan beş jurnalist həbs edilib.
Dekabrın 1-də Bakıda məhkəmə “AbzasMedia”nın jurnalisti Nərgiz Absalamovanı özünün rədd etdiyi xarici valyuta qaçaqmalçılığı ittihamı ilə üç ay müddətinə həbs edib.
“Biz ilkin hesabatları gördük. Əvvəlki kimi, Azərbaycanda jurnalistlərin həbsindən dərin narahatlıq hissi keçiririk”, – Dövlət Departamentinin nümayəndəsi bildirib:
“Biz Azərbaycan hökumətini israrla insan hüquq və əsas azadlıqlarına, o cümlədən fikri ifadə etmək azadlığını həyata keçirənlərin hüquq və azadlıqlarına hörmət etməyə çağırırıq”.
Nərgiz Absalamova “AbzasMedia”nın pul qaçaqmalçılığı ittihamı ilə həbs edilən dördüncü nümayəndəsidir.
Baş redaktor Sevinc Vaqifqızı, direktor Ülvi Həsənli və direktor müavini Məhəmməd Kekalov daha əvvəl eyni ittihamla həbs edilib.
Həmçinin Bakı məhkəməsi bu həftənin əvvəlində “Kanal 13”ün direktoru Əziz Orucovu qanunsuz tikinti aparmaq ittihamı ilə həbs edib.
