İspaniya və Fransa yarımfinalda qarşılaşacaq
İyulun 5-də Almaniyada təşkil olunan Avropa çempionatında 1/4 final mərhələsinin oyunlarına start verilib.
Günün ilk matçında İspaniya və Almaniya yığma komandaları üz-üzə gəlib. İspaniya 1/8 finalda Gürcüstanı (4:1), almanlar isə Danimarkanı (2:0) mübarizədən kənarlaşdırmışdı.
Saat 20:00-da başlayan oyun Ştutqart şəhərindəki “MHP Arena”da keçirilib. Görüşün əsas vaxtı 1:1 hesabı ilə başa çatıb. Əlavə vaxtda qol vuran ispanlar 2:1 hesablı qələbə sayəsində AÇ-2024-ün yarımfinalına yüksəliblər.
Növbəti oyunda isə Portuqaliya və Fransa milliləri qarşılaşıb. Portuqaliyalılar əvvəlki mərhələdə Sloveniyanı (0:0, penaltilər seriyasında 3:0), Fransa yığması isə Belçikanı (1:0) məğlub etmişdi.
Hamburqdakı “Folksparkştadion”da keçirilən görüş saat 23:00-da başlayıb. Qarşılaşmada hesab açılmayıb. Əlavə vaxtda da qapılara qol vurulmadığı üçün penalti seriyasına ehtiyac duyulub. Penalti zərbələrində daha dəqiq olan Fransa millisi yarımfinala vəsiqə qazanıb.
Fransa yığması yarımfinalda İspaniya ilə qarşılaşacaq.
