Vüqar Mustafayev müdafiə sənayesi naziri təyin edilib
Mədət Quliyev müdafiə sənayesi naziri vəzifəsindən azad edilərək Təhlükəsizlik Şurası katibinin müavini təyin olunub.
Bu barədə noyabrın 18-də Prezident İlham Əliyev sərəncam imzalayıb.
Dövlət başçısının digər sərəncamı ilə Vüqar Mustafayev müdafiə sənayesi naziri təyin edilib.
Vüqar Mustafayev bundan əvvəl Müdafiə Sənayesi Nazirliyində müavin vəzifəsindəydi.
Vüqar Mustafayev 1986-cı ildə Bakı şəhərində anadan olub.
O, 2004–2008-ci illərdə Prezidenti Yanında Dövlət İdarəçilik Akademiyasında, 2010–2013-cü illərdə isə Xəzər Universitetində təhsil alıb.
V.Mustafayev 2014-cü ildən PAŞA Holdinq MMC və ona aid olan Şirkətlərdə müxtəlif rəhbər vəzifələrində çalışıb.
2021-ci ildə PAŞA Holdinq MMC-nin Türkiyə Respublikasındakı Nümayəndəliyinin Rəhbəri, eyni zamanda İstanbul mərkəzli PDT və Gayrımenkul A. Ş. şirkətinin Müşahidə Şurasının Sədri olaraq təyin edilib.
2019-cu ildən müdafiə sənayesi naziri olan Mədət Quliyev 1996–2001-ci illərdə Daxili İşlər Nazirliyinin Mütəşəkkil Cinayətkarlıqla Mübarizə İdarəsinin rəis müavini, 2001–2002-ci illərdə həmin idarənin rəisi olub.
Mədət Quliyev 2002–2004-cü illərdə DİN-in Baş Narkotiklərlə Mübarizə İdarəsinin rəisi, 2004–2006-cı illərdə İnterpolun Milli Mərkəzi Bürosunun, 2006–2011-ci illərdə Daxili İşlər Nazirliyinin Baş Mühafizə İdarəsinin, 2011-ci ildə Ədliyyə nazirinin müavini-Penitensiar Xidmətinin rəisi vəzifələrində çalışıb.
O, 2015-2019-cu illərdə Dövlət Təhlükəsizliyi Xidmətinin rəisi olub.
1995-ci ildə Milli Qəhrəman adı alan M.Quliyev həmçinin Azərbaycan Velosiped Federasiyasının prezidentidir.
