Şahin Abdullayevi Rəşad İsmayılov əvəzləyib
Rəşad İsmayılov Azərbaycanın Oman Sultanlığında fövqəladə və səlahiyyətli səfiri təyin edilib.
Bu barədə iyunun 6-da dövlət başçısı İlham Əliyev sərəncam imzalayıb.
Prezidentin digər sərəncamı ilə Şahin Abdullayev Azərbaycanın Oman Sultanlığında fövqəladə və səlahiyyətli səfiri vəzifəsindən geri çağırılıb.
Azərbaycan Dövlət Universitetini bitirən Şahin Abdullayev 1981-1984-cü illərdə SSRİ-nin Yəməndəki səfirliyində işləyib.
O, 1989-1995-ci illərdə Azərbaycanın Xarici İşlər Nazirliyində ikinci katib, birinci katib, katibliyin müdiri olub. Həmçinin Azərbaycanın Misir Ərəb Respublikasındakı səfirliyinin müşaviri, XİN Asiya idarəsinin rəisi və (1999-2004) Küveytdə fövqəladə və səlahiyyətli səfir vəzifələrində çalışıb.
2010-cu ildən Azərbaycanı Misirdə, Əlcəzairdə, Sudanda və Omanda təmsil edib.
![](https://i1.wp.com/www.meydan.tv/wp-content/uploads/sefir-4.jpg)
Rəşad İsmayılov 1974-cü ildə Bakıda anadan olub.
O, Bakı Dövlət Universitetinin Hüquqşünaslıq fakültəsini bitirib. Həmçinin Azərbaycan Dövlət İqtisad Universitetinin Maliyyə və Kredit fakültəsinin məzunudur. Ondan sonra Həyat Qeyri-Hökumət Təşkilatı Beynəlxalq Hüquq Departamentinin rəisi olub.
Rəşad İsmayılova 2015-ci ildə ikinci dərəcəli “Fövqəladə və Səlahiyyətli Elçi” diplomatik rütbəsi verilib və Gürcüstanın Batumi şəhərindəki Baş konsul təyin olunub.
Rəşad İsmayılov 2018-2022-ci illərdə Azərbaycanın Qətərdə fövqəladə və səlahiyyətli səfiri olub.
Ondan sonra isə Xarici İslər Nazirliyinin Yaxın Şərq və Afrika İdarəsinin rəisi vəzifəsində çalışıb.