XİN indiyədək 7 vətəndaşın öldüyünü deyir
İsraildə HƏMAS-ın hücumları nəticəsində daha bir Azərbaycan əsilli İsrail vətəndaşının öldüyü bildirilir.
Bu barədə Meydan TV-yə oktyabrın 12-də Azərbaycan Xarici İşlər Nazirliyinin (XİN) Mətbuat Xidməti İdarəsinin rəisi Ayxan Hacızadə məlumat verib.
O deyib ki, indiyə qədər həlak olan Azərbaycan əsilli İsrail vətəndaşlarının sayı 7-dir:
“Şamil Abbasov, Emin Axundov, İlkin Nəzərov (Azərbaycan vətəndaşı), Lior Əzizov (vətəndaşlığı dəqiqləşdirilir), Roman Gandel (İsrail vətəndaşı), Eden Abdullayev (İsrail vətəndaşı), Emil Samuyelov (vətəndaşlığı dəqiqləşdirilir)”.
Yaxın Şərqdə nə baş verir?
Oktyabrın 7-də HƏMAS gözlənilmədən İsrailə hücum edib.
İsrail Müdafiə Qüvvələrinin sözçüsü mayor Nir Dinar 7 oktyabrı 2001-ci ilin 11 sentyabrına bənzədib:
“Bu, bizim 11 sentyabr hadisəmizdir. Onlar bizi təəccübləndirdi və bir çox yerdən – həm havadan, həm yerdən, həm də dənizdən sürətlə gəldilər”.
HƏMAS-ın Livandakı nümayəndəsi Usamə Həmdan “Reuters”ə deyib ki, hücum fələstinlilərin İsrailin hərbi gücü və imkanlarından asılı olmayaraq məqsədlərinə çatmaq iradəsinə malik olduğunu göstərib.