Körpəsini itirən ana həkimlərin cəzalandırılmasını tələb edir
Yevlaxın Səmədabad kəndində məskunlaşan Kəlbəcər köçkünü 21 yaşlı Şəlalə Abdullazadə deyir ki, onun yeni doğulan körpəsi həkim səhlənkarlığının qurbanı olub.
“Doğuş zamanı həkim mənimlə çox kobud davrandı. Vururdu, söyürdü, deyirdi “doğ qurtar”, başqa xəstələrim var. Arada da doğuş masasının üstündə qoyub getdi başqa qadını qeysəriyyə əməliyyatı etməyə. Mənim körpəm həkim səhlənkarlığının güdazına getdi”, – şikayətçi deyib.
Qadın Mingəçevir şəhər Mərkəzi Xəstəxanasının doğum şöbəsində başına gələnlərdən danışır.
“Doğuşdan əvvəl təbrik etdilər, sonra dedilər uşaq ölü doğulub”
Şəlalə Abdullazadə avqustun 10-da doğum şöbəsinə gətirilib. Müayinə olunub, 11 saat sonra doğuş başlayıb. Ancaq körpə doğulandan sonra anaya körpənin ölü doğulduğu bildirilib:
“Bətnimdəki körpəm də, mən də sağlam idik. Hamiləliyim normal keçib, tez-tez keçdiyim ultramüayinələr zamanı da bətnimdəki körpənin sağlam, normal olduğu təsdiqlənib. Hətta xəstəxanaya daxil olandan sonra keçdiyim müayinələrin cavabını gətirən işçilərdən biri məni təbrik edib dedi ki, uşaq sağlamdır. Ancaq doğuşdan sonra dedilər ki, körpə ölü doğulub”.
Şəlalə Abdullazadə deyir, körpənin ölümüylə bağlı xəstəxanadan şikayət etdikdən sonra həkim Gülbəniz Vəliyeva hökumətyönlü saytlara müsahibə verərək ailənin özünü günahkar çıxarmağa çalışıb:
“Deyib ki, guya uşaq qohum nikahından olduğuna görə ölü doğulub. Utanmadan yalan danışır, bizə böhtan atır, belə bir vaxtımızda bizi qıcıqlandırır. Buna görə də hüquq-mühafizə orqanları qarşısında ayrıca cavab verəcək”.
“Həkim deyir, əliniz hara çatır, oraya şikayət edin”
Şəlalə Abdullazadənin anası Yasəmən Həmzəyeva deyir, əvvəlcə onlara ananın da, bətnindəki körpənin də normal olduğu bildirilib:
“Uşağın da, ananın da ürək döyüntüsü normal, hər şey qaydasında ola-ola o körpə niyə ölü doğulmalıydı? Xəstəxananın qarşısında gözləyirdik, qızım əvvəl başqa həkimin növbəsinə düşmüşdü. Həmin həkim çıxıb bizə dedi ki, körpə də, ana da sağlamdır, heç bir problem yoxdur, körpə rahat doğulacaq. Dedi ki, mənim iş növbəm bitdiyi üçün doğuşu növbədə olan həkim Gülbəniz Vəliyeva qəbul edəcək”.
“Saatlarla xəstəxananın qarşısından tərpənmədik. Hər dəfə qapıya yaxınlaşıb soruşanda deyirdilər ki, hər şey qaydasındadır, Şəlalə doğuşa hazırlanır. Gecə saat 3-də doğuş olub, uşaq ölüb, ancaq qapıda gözləsək də, bizə bir kəlmə söz deyilməyib. Saat 4-ə qalırdı, xəstəxananın içərisindən zorla öyrənə bildik ki, saat 3-də doğuş olub, uşaq da həyatda yoxdur”, – ana danışır.
Yasəmən Həmzəyeva ağlaya-ağlaya sözünə davam edir:
“İnanın ki, körpə üçün apardıqlarımız hələ də maşının yük yerində qalıb. Əhdimiz, arzumuz vardı, körpəyə şəhid əmisinin adını qoyacaqdıq. Həkim deyir, heç bilirsiz mən kiməm? Gedin hara əliniz çatır, şikayət edin”.
Xəstəxananın doğum şöbəsindən baş verən ölüm hadisəsi ilə bağlı Meydan TV-yə bildirilib ki, 39-40 həftəlik olan körpənin ölü doğulmasının səbəbi məlum deyil:
“Qadın avqustun 10-da, saat 18 radələrində 39-40 həftəlik hamiləliklə xəstəxananın doğum şöbəsinə qəbul edilib. Gecə 3-də çəkisi 3 kiloqram 700 qram, boyu 52 sm olan kişi cinsində ölü uşaq doğulub. Ölümün səbəbi məlum deyil. Ekspertizada müəyyən edəcək”.
Uşaq ölümünü Mingəçevir Şəhər Prokurorluğu da araşdırır.
