Tərlan Seyidovla bağlı hansı tədbir seçildiyi hələ məlum deyil
Bir gün öncə saxlanılan Müsəlman Birliyi Hərəkatının üzvü Tərlan Seyidovun aprelin 11-də buraxıldığı bildirilir. Bu barədə Meydan TV-yə Tərlan Seyidovun yaxınları məlumat verib.
Söhbət aprelin 10-da sosial şəbələrdə yayılan videoda avtomobildə ailəsilə birlikdə gedərkən saxlanılan şəxsdən gedir. Yayılan videoda Tərlan Seyidovun azyaşlı uşaqların gözü önündə aparıldığı, onun ailə üzvlərini sakitləşdirməyə çalışdığı, lakin uşaqların ağladığı görünür.
![](https://i1.wp.com/www.meydan.tv/wp-content/uploads/terlan-sayadov.jpg)
Mülki geyimli şəxslər onun saxlanma səbəbləri haqda heç bir izahat vermədən Tərlan Seyidovu aparıblar.
“Günorta saat 1 radələrində Tərlan Seyidov evlə əlaqə saxlayıb və bildirib ki, buraxılıb. Dediyinə görə, gəlir, yoldadır…”, – yaxınları bildirib.
Ailəsinin məlumatına görə, aprelin 10-da Tərlan Seyidov da son günlər həbs olunan çoxsaylı dini inanclı şəxslər kimi narkotik ittihamıyla şübhəli şəxs qismində saxlanılıb. Bu üzdən onun aprelin 11-də tam sərbəst buraxıldığı, yoxsa cinayət təqibi altında olduğu, sadəcə, istintaq dövrü üçün barəsində həbslə bağlı olmayan qətimkan tədbiri seçildiyi məlum deyil.