Baş nazir Rusiyanı tənqid edib
Ermənistanın Baş naziri Nikol Paşinyan bildirib ki, ölkəsinin Kollektiv Təhlükəsizlik Müqaviləsi Təşkilatında (KTMT) iştirakı “dondurulub”.
“Kavkazski uzel” xəbər verir ki, Ermənistan bundan əvvəl dekabrın 19-da KTMT parlamentinin iclasında iştirakdan imtina edib. Yanvarın 8-də Ermənistan Təhlükəsizlik Şurasının rəhbəri Armen Qriqoryan KTMT-dən heç bir gözləntinin olmadığını bildirib.
“Kollektiv təhlükəsizlik sazişi, fikrimizcə, Ermənistana münasibətdə, xüsusən 2021-2022-ci illərdə yerinə yetirilmədi. Bu, bizim diqqətimizdən kənarda qala bilməz. Biz bu sazişdə iştirakımızı dayandırdıq. Görək bundan sonra nə olacaq”, – Paşinyan bildirib.
Ermənistanın Baş naziri Rusiyanın Ermənistandakı hərbi bazasının bağlana biləcəyi ilə bağlı sualı cavablandırarkən deyib ki, “hazırda biz bu barədə danışmırıq”.
Eyni zamanda Nikol Paşinyan Rusiya hakimiyyətinin mövqeyini tənqid edib. O bildirib ki, Rusiya bir neçə ay əvvəl açıq şəkildə erməni əhalisini hökuməti devirməyə çağırıb.
