Onun barəsində həbs qətimkan tədbiri seçilib
Müxtəlif media orqanlarında politoloq kimi çıxış edən Nəzakət Məmmədova həbs olunub. O, Cinayət Məcəlləsinin 274-cü (dövlətə xəyanət) maddəsilə ittiham olunur.
Meydan TV-nin əldə etdiyi məlumata görə, Nəzakət Məmmədova Dövlət Təhlükəsizliyi Xidmətinin (DTX) əməkdaşları tərəfindən iki gün əvvəl saxlanılıb. Artıq onun haqqında Səbail Rayon Məhkəməsində ilkin istintaq dövrü üçün 4 aylıq həbs qətimkan tədbiri seçilib.
“Nəzakət Məmmədova Rusiya xeyrinə casusluqda ittiham olunur. Evində axtarış aparılıb, bir sıra əşyalar götürülüb”, – mənbə bildirib.
Məlumata görə, o, bundan öncə də DTX-da dindirilmişdi.
Nəzakət Məmmədovanın ittihama münasibəti məlum deyil.
Onun himayəsində azyaşlı və xəstəlikdən əziyyət çəkən uşağının olduğu bildirilir.
