Onlar öz vətənlərində həbsxanaya düşə biləcək qanunları pozmaq riski ilə üzləşirlər
Rusiya nəzarət etdiyi Ukrayna ərazilərinə miqrant işçilər cəlb edir. Onların çoxunu cəbhə xəttində yerləşdirir. “Bloomberg” yazır ki, miqrantlar burada səngərlər qaza, yaxud cəbhədə döyüşə bilərlər. Bu fəaliyyətlərinə görə isə onları öz öllkələrində həbs gözləyir. Rusiya Ukraynanın işğal olunmuş ərazilərində genişmiqyaslı milyardlarla dollarlıq yenidənqurma işləri üçün qonşu ölkələrdən gələcək minlərlə işçiyə arxalanır.
Keçmiş Sovet İttifaqı ölkələrindən Rusiyaya gəlib iş axtaranlar Ukraynaya tikinti layihələrində işləmək üçün göndərilir. Onlar bəzən səngər qazma, döyüş meydanında vuruşmağa cəlb edilə bilir. Bununla da öz vətənlərində həbsxanaya düşə biləcək qanunları pozmaq riski ilə üzləşirlər.
Prezident Vladimir Putin bildirib ki, Rusiya Ukraynanın təxminən iki ildir davam edən hücumundan, nəhəng əraziləri xarabalığa çevirdikdən sonra işğal olunmuş ərazilərini bərpa etmək üçün ildə 1 trilyon rubldan (11 milyard dollar) çox pul xərcləyir. Qeyri-qanuni ilhaq edilmiş bölgələrə nəzarəti gücləndirmək strategiyasının bir hissəsi olan bu addım işçi axını tələb edir. Çünki Rusiya artıq işçi qüvvəsi baxımından ciddi sıxıntı ilə üzləşib.
Sayt yazır ki, miqrantları Rusiya saytlarında orta bazar qiymətindən qat-qat yüksək əməkhaqqı müqabilində tikinti işləri təklif edən iş elanları şirnikləndirir. Məsələn, Donbasın şərqindəki tikinti işləri yaşayış, nəqliyyat və tibbi sığorta ilə ayda 350 000 rubla qədər (demək olar ki, 4 000 dollar) vəd edə bilər. Yerli işəgötürmə xidməti “Superjob”un məlumatlarına görə, əksinə, fabrikdə bir maşın operatoru ayda 2000 dollar qazanır. Bu, bir il əvvəlkindən təxminən 20 faiz çoxdur. Putin 2014-cü ildən başlayaraq Donetsk və Luqansk vilayətlərində separatçılara dəstək verib və Rusiyanın 2022-ci ilin fevralında Ukraynaya tammiqyaslı müdaxiləsi çərçivəsində Zaporojiya və Xerson vilayətlərinin bir hissəsi ilə birlikdə əraziləri ilhaq edib.
Kreml bu bölgələrin heç birinə tam nəzarət etmir. Ərazinin çox hissəsi müharibənin ən ağır döyüşlərinin mərkəzində olduqları üçün darmadağın olub. Rusiya rəsmiləri işğal olunmuş ərazilərdə minlərlə çoxmənzilli binanın bərpa edildiyini və ya tikildiyini, yüzlərlə məktəb, muzey, klinika və kitabxananın inşa edildiyini bildirib.
Yanvarın 31-də keçirilən tədbirdə yenidənqurma səyləri ilə bağlı danışan Putin bunu “əsas prioritet” adlandırıb.
