Aprelin 11 və 12-də Sabunçu məhkəməsində 2018- ci ilin iyul ayında Gəncədə baş vermiş məlum hadisələrlə bağlı təqsirləndirilən 2 qrupun (8+8 nəfərin) məhkəməsi keçirilib. Məhkəmə prosesində çoxsaylı qanun pozuntuları baş verib. Bu barədə hər iki prosesdə iştirak etmiş hüquq müdafiəçisi Oktay Gülalıyev məlumat paylaşıb.
Gülalıyev qeyd edir ki, ibtidai istintaq dövründə yol verilən pozuntular məhkəmədə də təkrarlanıb. Hakimlər və dövlət ittihamçıları nəyin bahasına olursa olsun ittiham aktını təsdiq etməyə çalışıblar. Bu isə təqsirləndirilən şəxslərin, onların vəkillərinin və valideynlərinin narazılığına səbəb olub.
“Məhkmənin ən vacib və dəhşətli səhnələrindən biri təqsirləndirilən şəxslərin həbs olunan zaman Gəncədə və Bakıda “bandotdel”- də məruz qaldıqları ağır işgəncələri bildirmələri idi. Valideynlər işgəncələrə ağlamaqla və bunu edənlərə qarğışla qarşılıq verir, hakimlər isə danışanları dayandırmaq, başqa yerə istiqamətləndirmək, özlərini heç nə eşitmirmiş kimi aparmaları və işgəncə hallarını ört- basdır etməklə reaksiya verirdilər. Hətta işgəncəyə məruz qalan Rauf Bayramov adlı təqsirləndirilən şəxs 9 ay ötməsinə baxmayaraq bədənində işgəncənin izlərini göstərmək istədi, hakim imkan vermədi. Demək olar ki, bütün təqsirləndiriln şəxslər öz ifadələrində ağır və dəhşətli işgəncələrə, qeyri- insani münasibətə məruz qaldıqlarını bildirdilər. Amma çox dəhşətli və acınacaqlı haldır ki, bu faktları hakimlər və ittihamçılar gözməzlikdən gəlirdi…”, – deyə hüquq müdafiəçisi bildirib.
Hüseynzadə Oqtay Nazim oğlunun və digərlərinin təqsirlndirildiyi qrupda olan şəxslər Cinayət Məcəlləsinin 23 ağır maddəsi ilə ittiham olunur. Onlar adam öldürməkdən tutmuş silah gəzdirmə, narkotik, hakimiyyətin zorla əl keçirilməsi, konstitusiya qurluşunun zorla dəyişdirilməsi, terror, quldurluq, hədə-qorxu ilə tələb etmə, xuliqanlıq və s. maddələrlə ittiham olunurlar. Hüquq müdafiəçisinin sözlərinə görə, ittihamlar o qədər absurd və ağlasığmazdır ki, vəkillərin sualları qarşısında aciz qalan dövlət ittihamçısı bəzən “Biz bu maddələrlə bunları ittiham etmirik” deyə vəziyyətdən çıxmaq istəyib. “Maraqlıdır ki, 23 maddə ilə ittiham olunan bir çox şəxslər hadisə zamanı nəinki meydanda, 10 iyulda ümumiyyətlə Gəncədə olmayıblar”, – deyə O.Gülalıyev bildirib.
Hüquq müdafiəçisi bildirir ki, ittiham tərəfi məhkəməyə təqsirəlndirilən şəxslərdən istintaq zamanı işgəncə ilə alınmış etirafedici ifadələrdən və yalançı şahid ifadələrindən başqa hər hansı dəlil, sübut təqdim etmir. Dəfələrlə vəsatət verilsə də, şəhər kamerasının görüntüləri məhkəmədə nümayiş olunmur.
“Hakimlər və ittihamçılar bəzi təqsirləndirilən şəxslərə davamlı təzyiq göstərməsi vəkillərin narazılığına və etirazına səbəb oldu. Vəkillərdən Xaliq Hüseynov vəsatət verərək ədalətli məhkəmə araşdırmasına imkan vermədiyi və bundan əvvəlki qrupda iştirakına görə 2 hakimin- Faiq Mahmudov və Xəqani Səmədovun prosesdən kənarlaşdırılmasını tələb etdi. Vəsatəti qəbul etməyən hakim vəkilə 5 dəfə rəsmi xəbərdarlıq etdi”, – deyə Gülalıyev proses barədə xəbər verir.
Hüquq müdafiəçisinin sözlərinə görə, Elmir Hüseynzadə və digərlərinin ittiham olunduğu qrupun məhkəmə prosesinə sədrlik edən hakim “burda çıxışların və müzakirələrin mətbuatda, sosial şəbəkələrdə dərc olunması yol verilməzdir” deyərək qanunsuzluqları ört- basdır etməyə çalışıb. Hadisə görüntülərinin məhkəmədə nümayiş olunmasına imkan verməyən hakim “bu sübutların bizim üçün heç bir əhəmiyyəti və hüquqi qüvvəsi yoxdur” deyib. Gülalıyevin fikrincə, prosesin bu cür aparılması əslində “Gəncə işi” ilə bağlı ittiham tərəfinin tərtib etdiyi saxta aktın artıq məhkəmədə təsdiqləndiyinin elan edilməsidir.
