Koronovirus artıq Azərbaycan iqtisadiyyatına öz ilkin təsirlərini göstərməyə başlayıb. Bəzi sahələrdə bu təsir kifayət qədər sarsıdıcıdır, məsələn, turizm şirkətlərinin işi tamamilə dayanıb. Hotellər, turistlər üçün icarəyə götürülmüş bahalı sutkalıq evlər və həmçinin bu sektora bağlı digər sahələrin vəziyyəti acınacaqlıdır. Iranla sərhədlərin bağlanması, Çindən gələn malların dayanmasının iqtisadiyyata vuracağı ziyanlar hələ bundan sonra hiss ediləcək.
Eləcə də təhsillə bağlı olan ticarət və xidmət sektorunda da böhran əlamətləri var. Dəftərxana mallarının satışından başlamış universitet və məktəblərin yaxınlığındakı ticarət və yeməkxana obyektlərinə, hazırlıq kurslarına qədər hamısı ticarətin dayanmasından əziyyət çəkir. Nəqliyyatda sərnişinlərin sayının azalması adi gözlə müşahidə olunur. Bir sözlə, böhran var və həmin böhran tədricən artan xətt üzrə inkişaf edərək əhalinin başqa təbəqələrinə də öz mənfi təsirini göstərir.
Əgər əhalinin geniş təbəqələri hələ bu böhranı hiss etmirlərsə, nə qədər paradoksal da olsada buna görə iqtisadiyyatın olmamasına borcludurlar. Azərbaycanda əhalinin böyük əksəriyyəti, azad bazar iqtisadiyyatına xas olan qanunauyğunluqların əksinə olaraq, birbaşa və ya dolayısıyla büdcədən maliyyələşdiyindən, hələ ki, büdcə hesabına yaşaya bilirlər. Lakin büdcə də, neftin qiymətlərinin sürətlə endiyi bir halda, çox tab gətirə bilməyəcək.
Yaxınlaşmaqda olan böhranın səbəbini koronovirusla və ya neftin uculaşmasıyla izah edənlər nəzərə almalıdırlar ki, əslində adıçıkilən amillər sadəcə olaraq, təkan rolunu oynadı. Çünki iqtisadiyyat onsuz da böhran həddində idi və hər hansı kənar təsir, onun kövrək balansını pozacaqdı.
Qaşqay İsmayıl