Müdafiə Xətti siyasi məhbus Aqil Əli Məhərrəmliyə saxlandığı Ədliyyə Nazirliyi Penitensiar Xidmətin İxtisaslaşdırılmış Müalicə Müəssisəsində (İMM) qeyri insani rəftara məruz qoyulmasını qətiyyətlə pisləyir, hökumət rəsmilərini bu halları araşdırmağa, təqsirli şəxsləri məsuliyyətə cəlb etməyə çağırır.
Məhərrəmli şikayətində özünün məruz qaldığı hüquqazidd davranışları təsvir edərkən bildirib ki, İMM-ə 2 saylı cəza evində Covid19-a yoluxduğu üçün köçürülüb. İMM-də onu heç bir əsas olmadığı halda cəzalandırıblar və 10 gün cəza palatasında (karser) saxlayıblar. Karser çox kirli olub və üfunət qoxuyub. Onu yataqdan məhrum ediblər. Xəstə və halsız durumda olduğundan quru taxtanın üzərində uzanıb yatmağa məcbur olub. Döşəyi yalnız gecə saatları veriblər. Verdikləri döşəklər də kirli və çox köhnə olduğundan yatmağa yararsız olub. Gigiyenik vasitələr, adi sabunla təminat sıfır səviyyəsində olub. Belə durumda onda halsızlıq və yorğunluq baş qaldırdığından halı pisləşən siyasi məhbusu həkim yardımından belə imtuna ediblər.
Covid19-a yoluxmuş olmasına baxmayaraq sağlamlıq üçün ciddi risklər yaradan şəraitdə saxlamnası qeyri-insani rəftara bərabər olub.
A. Məhərrəmlinin qeyri-insani rəftara məruz qoyulmasını icra edənlər İMM-in məsul şəxsləri olublar. İMM-in rejim rəisi, ədliyyə mayoru Elxan Mustafayev, baş əməliyyatçı Anar Əsgərov, əməliyyatçı Sahil (soyadını bilmir), əməliyyat şöbəsinin rəisi Ruslan (soyadını bilmir) göstərib.
Məhərrəmli öz şikayətində İMM-də başqa məhbuslarla qeyri-insani rəftarlar faktlarını sadalayıb. Məhkumların döyülməsi, soyundurularaq çarpayıya qandallanması, belə vəziyyətdə uzun zaman saxlanmaları, tualetə getməkdən məhrum edilmələrini, deyib.
Müdafiə Xəttinin həmtəsisçilərindən olan, 3 il müddətinə 9 saylı cəzaçəkmə müəssisəsində siyasi məhbus həyatı yaşayan Rüfət Səfərov təssüflə bildirir ki, İMM-də edilən belə işgəncə metodlarına Penitensiar Xidmətin müəssisələrində adi gündəlik iş kimi, “cəza-icra siyasətinin” tərkib hissəsi kimi baxırlar. R.Səfərov özünün də siyasi hakimiyyətin sifarişləri əsasında belə işgəncələrə məruz qoyulduğunu və A.Məhərrəmliyə qarşı qeyri-insani rəftarın onun siyasi kimliyi ilə bağlı olaraq tapşırıqla edildiyinə əmin olduğunu deyir.
Aqil Əli Məhərrəmli AXCP Rəyasət Heyətinin üzvüdür. Hökumət onu, 2018-ci ildə digər AXCP fəalları Babək Həsənov, Saleh Rüstəmli ilə birlikdə siyasi sifariş olduğu şübhə doğurmayan qurama ittihamlar əsasında həbs edib. Məhkəmə bu saxta itthamları (Cinayət Məcəlləsinin 192.3.2 (xüsusilə külli miqdarda gəlir əldə etməklə qanunsuz sahibkarlıq), 193-1.3.1, 193-1.3.2 (mütəşəkkil dəstə tərəfindən cinayət yolu ilə əldə edilmiş külli miqdarda pul vəsaitlərini və ya digər əmlakı leqallaşdırma) maddələri) təsdiq edib, onu 4 il müddətinə azadlıqdan məhrum edib. Babək Həsənovu 3 il, Saleh Rüstəmlini isə 7 il 3 ay müddətinə məhkum ediblər. Yerli və beynəlxalq hüquq müdafiə təşkilatları A. Məhərrəmlinin, Babək Həsənovun və Saleh Rüstəmlinin ittiham və məhkum edilməsinin saxta və siyasi motivli sayaraq, onları siyasi məhbus elan ediblər.
Hökumət siyasi fəalları uzun zaman polisin işgəncə yuvası kimi ad çıxarmış Daxili İşlər Nazirliyinin Mütəşəkkil Cinayətkarlığa qarşı Mübarizə Baş İdarəsində incommunicadoda saxlayıb və saxta ittihamları etiraf etmələri, mənsub olduqları partiyanın əleyhinə siyasi bəyanatlar verməyə məcbur etmək üçün onlara ağır işgəncələr verib. Gənc siyasi fəal A.Məhərrəmli məhkəmə baxışı zamanı polislərin ona verdiyi dözülməz işgəncələri belə təsvir etmişdi: “Otağa salıb dedilər ki, bax, bu gördüklərin cəlladlardır. Buradan heç kim sağ çıxmır, çıxanların da orqanları sıradan çıxır. Bunu deyib, ayağımın arxasından təpiklə vurdular, yıxıldım. Əllərim qandallı, dizüstə saxlayıb döydülər. Boynumun arxasından vururdular. Gördülər, istədiklərini eləməyə razılaşmıram, məni yuxarı qaldırıb başqa bir otaqda toka verdilər…”
Müdafiə Xətti təəssüflə bildirir ki, ağır işgəncələrin araşdırılması üçün siyasi məhbusların verdiyi şikayətlər araşdırılmayıb.
Müdafiə Xətti Ədliyyə Nazirliyi Penitensiar Xidmətin rəhbərliyinə “İnsan hüquqlarının və əsas azadlıqların müdafiəsi haqqında” Konvensiyanın 3-cü maddəsini xatırladır: “İşgəncələrin qadağan olunması Heç kəs işgəncəyə, qeyri-insani və ya ləyaqəti alçaldan rəftara və ya cəzaya məruz qalmamalıdır.”
Müdafiə Xətti Ədliyyə Nazirliyi Penitensiar Xidmətin rəhbərliyinə Azərbaycan Respublikasının Konstitusiyasının 46-cı maddəsinin III hissəsini xatırladır: “Heç kəsə işgəncə və əzab verilə bilməz. Heç kəs insan ləyaqətini alçaldan rəftara və ya cəzaya məruz qala bilməz. Özünün könüllü razılığı olmadan heç kəsin üzərində tibbi, elmi və başqa təcrübələr aparıla bilməz.”
Müdafiə Xətti Ədliyyə Nazirliyi Penitensiar Xidmətin rəhbərliyinə Cəzaların İcrası Məcəlləsinin 3.3-cü maddəsini xatırladır: “Bu Məcəllə Azərbaycan Respublikasının Konstitusiyasına, müvafiq qanunlarına və beynəlxalq hüququn prinsip və normalarına uyğun olaraq məhkumlarla rəftarda işgəncə və ya digər qəddar, qeyri-insani hərəkətlərə və yaxud ləyaqətin alçaldılmasına yol verilməməsinə əsaslanır”
Müdafiə Xətti Ədliyyə Nazirliyi Penitensiar Xidmətin rəhbərliyinə Cinayət Prosessual Məccəlləsinin 15.2-ci maddəsini xatırladır: “15.2.Cinayət təqibi gedişində aşağıdakılar qadağandır: 15.2.1. işgəncələr vermək, fiziki və psixi zorakılıqdan, o cümlədən tibbi preparatlardan istifadə etmək, aclığa, hipnoza məruz qoymaq, tibbi yardımdan məhrum etmək, digər qəddar, qeyri-insani və ya ləyaqəti alçaldan rəftar və cəzalar tətbiq etmək”
Müdafiə Xətti Ədliyyə Nazirliyi Penitensiar Xidmətin rəhbərliyinə Cinayət Məcəlləsinin 9.2-ci maddəsinin tələbini xatırladır: “Cinayət törətmiş şəxsə tətbiq edilən cəza və digər cinayət-hüquqi xarakterli tədbirlər işgəncə və ya digər qəddar, qeyri-insani, yaxud ləyaqəti alçaldan xarakter və ya məqsəd daşıya bilməz.”
Müdafiə Xətti ədliyyə naziri Fikrət Məmmədovdan, Ədliyyə Nazirliyi Penitensiar Xidmətin rəisi Ceyhun Həsənovdan yuxarıda göstərilən Konvensiyanın, Konstitusiyanın və digər qanunvericilk aktlarının tələblərinə riyaət olunmasını təmin etməyə çağırır, A.Məhərrəmlinin göstərdikləri faktları təcili araşdırmağı, qeyri-qanuni əməllər daşıyıcı olan əməkdaşların haqqında adekvat ölçü götürülməsini tələb edir.
Müdafiə Xətti Baş Prokurorluğu A.Məhərrəmlinin göstərdiyi hüquqazidd hallar barəsində təxirəsalınmaz surətdə araşdırma apararaq məsuliyyət daşıyan vəzifəli şəxslərin dairəsini müəyyən etməyə, onları məsuliyyətə cəlb etməyə çağırır.
Müdafiə Xətti Ombudsmanın diqqətini Penitensiar Xidmətin İMM-də siyasi məhbus A.Məhərrəmli və başqa məhbuslarra qarşı qeyri-insani rəftar hallarına cəlb edir və bu Müəssisəyə təcili baş çəkməyə, A.Məhərrəmli və başqa məhbuslarla görüşməyə, işgəncə hallarının araşdırılması və önlənməsi barədə zəruri tədbirlər görməyə çağırır.