Fikrət Hüseynli
Azərbaycanda koronavirusa yoluxan və həyatını itirənlərlə bağlı hər saat xəbərlər yayılır. Açıq görünən odur ki, adamların çoxu koronavirusdan daha çox panika içərisindədirlər. Ən maraqlısı odur ki, bir adamda, yaxud onun yaxınında koronavirus aşkarlanırsa, dərhal xəstəxanaya düşmək uğrunda mübarizəyə başlayır. Koronavirusa yoluxmuş xəstənin ev ərazisini tərk edib açıq havada gəzməsinə verilən sərt reaksiya isə dəhşətdi. Türkiyədə buna görə, qardaş qardaşı tutdurur. Bəs Qərbdə prosesə yanaşma necədir? Koronavirusa yoluxmuş və mütəxəssis məsləhətilə 14 günə sağalmış şəxs kimi buranın təcrübəsini yazım siz də bilin. Bəlkə köməyinizə çatdı. İstəsəniz paylaşın digərlərinə də faydası dəysin.
Qərbdə – Niderlandda necədir?
- Koronavirusa yoluxubsunuzsa və ciddi 2-ci bir xəstəliyiniz yoxdursa, boğulma halları müşahidə olunmursa, xəstəxanaya yerləşməyə gərək yoxdu.
- 24 saat ərzində orqanizminizdə ciddi zəifləmə müşahidə olunmursa, maska taxmaq və insanlardan 2 metr məsafə saxlamaq şərtilə gün ərzində 1-3 saat açıq havada gəzməlisiniz.
- Gün ərzində olduğunuz və yatdığınız otağın havasını 2-3 dəfə təmizləyin. Yataqlarınızı tez-tez havaya çıxarın. Təmiz hava virusu öldürür.
- Evdə qapı qulplarını və bu kimi əşyaları gündə 1 dəfə silin
- Evdə hər gün təmizliyə diqqət edin
- Davamlı soyuq olmayan su için, isti yeməklər yeyin
- Boğazınızda, ağız boşluğunuzda qızartılar, qaşınma varsa, 1 çay qaşığı soda, 1 qaşıq limon suyu və eyni ölçüdə duzu 1 stəkan ilıq suya əlavə edib gün ərzində 1 və ya 2 dəfə qarqara edin
- İdman hərəkətlərilə məşğul olun, C vitamini olan meyvələr qəbul edin. İmmun sisteminizi gücləndirmək üçün Sibir Jenşini deyilən bitkinin vitamin formasından yararlanın.
- Gün ərzində 8 saatdan artıq yatmağa çalışın.
- Qatıq kimi süd məhsullarından uzaq durun
- Alkohol qəbul edib immunitetinizi zəiflətməyin.
- Əllərinizi davamlı yuyun.
- Qarın ağrısının – ishalın qarşısını almaq üçün nar yeyin.
Bu mənə Niderlandda infeksiya mütəxəssisi tərəfindən verilən məsləhətdir və faydasını da görmüşəm.