İqtisadçı, ekspert Samir Əliyev
Bir neçə gündür TV və radiolarda ADA tərəfindən Qarabağa qayidşin effektiv təşkili üçün məcburi köçkünlər arasinda onlayn şəklində keçirilən Sorğu ilə bağlı sosial çarxlar səsləndirilir. Maraq üçün sorğu sualları ilə tanış oldum. Qabaqcadan qeyd edim ki, bu təşəbbüsü dəstəkləyirəm. Əhalinin rəyinin öyrənilməsi dünyada geniş tətbiq edilən üsuldur. Çünki benefisiarların rəyinin qabaqcadan öyrənilməsi mexanizmi qərar qəbulu prosesində düzgün strategiyasının seçilməsi baxımından önəmli rol oynayır.
Elə bu məqsədlə sorğuya daxil olub onun suallarını nəzərdə keçirtdim. Qabaqcadan deyim ki, sosioloq deyiləm. Niyyətim vətəndaş kimi töhfə verməkdir. Sualların sadə və anlaşıqlı dildə yazılması çox yaxşıdır. Onu da anlayıram ki, sorğu tərtib edən anketə bəzən bizim üçün artıq hesab edilən, əslində isə onun üçün vacib olan suallar da daxil edə bilər. Məsələn, mən 1-ci sualı artıq hesab etsəm də, sorğu tərtibatçısının ola bilsin alt-məqsədi var və buna görə belə tip sualları anketə daxil edib.
Ancaq tanışlıq göstərdi ki, suallar sanki tələsik tərtib edilib və çiy vəziyyətindədir. Məsələn, respondentin heç cürə 2-ci sualın cavabını düzgün yazacağını təsəvvür edə bilmirəm. Respondent “Tanıdığınız məcburi köçkünlərin neçə faizi öz doğma yurduna qayıtmaq istəyir?” sualının cavabını nə dərəcədə dəqiq cavablandıra biləcək? Bunun üçün rəyi soruşulanlar ilk növbədə, bütün məcburi köçkün tanışlarını yadına salmalı, sonra qayıtmaq istəyənləri yadına salmalı və bundan sonra cavab variantındakı bölgülərdən birini seçməlidir. Əgər elə birini tanımırsa, bu halda cavab necə olacaq? 50%-ə qədər variant seçməlidir? Axı, respondentin “bilmirəm” cavabını seçmək hüququ yoxdur. Həm də niyə birbaşa 50%-ə qədər? Şkalanı aşağıdan götürmək olmaz?
Gələk 3-cü suala – “Qarabağa köçmək istəməyinizin səbəbi nədir?”. Qeyd edim ki, uğurlu olmayan cavab variantları daxil edilib. İnsanların geri qayıtmaq istəyinin bir mənəvi səbəbi olur: öz dədə-baba yurduna qayıtmaq. Və bir iqtisadi səbəbi olur- öz mülkinə sahib olmaq. Qalan cavab variantları bir-birini təkrarlamaqla yanaşı ehtiyac olmayan cavablardır.
6-cı sualdakı Xankəndinin (Xocavənd və Xocalı yoxdur) hələ bizim nəzarətimizdə olmamağının köçkünün yaşayışına neqativ təsiri arasında əlaqəni tapa bilmədim. Və yaxud “Qarabağa qayıtdıqdan sonra nə edəcəyimi bilməməyim” cavab variantının hazırkı yaşayış səviyyəsi ilə bağlılığı nədən ibarətdir?
Birbaşa 18-ci suala keçirəm: Qayıtmazdan əvvəl dövlətdən hansı suallara cavab istəyirsiniz? Respondentə 3 cavab variant seçmək limiti qoyulub. Halbuki 7 cavab variantının hamısının olması vacibdir. Tutaq ki, təhlükəsizlik təmin edildi, kommunal xidmətlər bərpa olundu. Bəs, məktəb, xəstəxana, iş yeri? Bunlar lazım deyil?
Bu sorğunun geniş reklamına rəğmən inanmıram ki, cavablarda dərin nəticələr əldə etmək mümkün olsun. Ən azı respondentlərin cavab imkanları xeyli məhduddur. Bəzi suallar artıqdır, bəzi suallar yaxşı redaktə tələb edir, bəzilərinin cavab variantları isə yerində deyil və s. Əsas problemlərdən biri də keçidlərlə bağlıdır. Məsələn, 13-cü sual olan yerdə 10-cu suala nə ehtiyac var? Öz evi olmasa da öz qəsəbəsində yaşamağa üstünlük verən respondent 13-cü sualda hansı variantı seçməlidir? 10-cu suala “Xeyr” cavabını verən respondent 13-cü sualı cavablandırmalıdırmı?
Fikrimcə, bu sorğuda aşağıdakı suallara cavab tapılması qarşıya məqsəd qoyulmalıdır:
1) Respondentin niyyəti (gedəcək ya yox, gedəcəksə hansı şərtlərlə, getmirsə səbəbi)
2) Köçürülmənin şərtləri necə olmalıdır (məcburi yoxsa könüllü, dövlət dəstəyinə hansı səviyyədə ehtiyac var və s.)
3) Dövlətdən gözləntilərin çərçivəsi nədir (mənzil şəraitinin yaxşılaşdırılması, qazanc imkanlarının mövcudluğu və s.)
Sonda bir sualın olması da yaxşı olardı. Məsələn, respondentin istəyi. Bu sual məhz açıq saxlanmalıdır ki, respondent düşündüyünü, gözləntisini və Qarabağın gələcəyi ilə bağlı istəklərini yazsınlar.