Milli Şuranın Koordinasiya Mərkəzinin üzvü Gültəkin Hacıbəyli
1993.
Azərbaycan prezidenti Əbülfəz Elçibəy Azərbaycanı Rusiyanın təsir dairəsindən çıxarıb Qərbə inteqrasiya etdirmək istəyir. Əvəzində Rusiya Azərbaycan Ordusundakı agent şəbəkəsi vasitəsilə Kəlbəcərin işğalına şərait yaradır, Nəcməddin Sadıqovun rəhbərlik etdiyi hərbi birləşmə Kəlbəcəri döyüşsüz, bir güllə atmadan ermənilərə təhvil verib Bakıya qayıdır.
Ardınca Rusiyanın birbaşa dəstəyilə qanuni seçilmiş hakimiyyətə qarşı hərbi qiyam qalxır, dövlət çevrilişi baş verir.
Bu prosesin nəticəsində hakimiyyətə gəlmiş Heydər Əliyevin ilk işi Azərbaycanı Rusiyanın siyasi orbitinə qaytarmaq olur. Təslimçi Bişkek sazişi imzalanır, Azərbaycan MDB-yə üzv olur və s.
Nəcməddin Sadıqov Kəlbəcər əməliyyatından düz 6 ay sonra- 2 noyabr 1993-cü il tarixində Azərbaycan Silahlı Qüvvələrinin Baş Qərargah rəisi vəzifəsinə təyinat alır.
2019-2021.
Demokratik seçki nəticəsində hakimiyyətə gəlmiş Nikol Paşinyan Ermənistanı Rusiyanın təsir dairəsindən çıxarmağa çalışır, Qərb institutlarına inteqrasiya kursunu həyata keçirir, korrupsiya ilə mübarizə dalğasında keçmiş prezident, Putinin yaxın dostu Köçəryanı həbsə atır. Ölkədə anti-Rusiya ovqatı güclənir.
Bu durumdan narazı qalan Putin dəfələrlə Köçəryanın azad olunmasını tələb edir, Paşinyan onu eşitmir. “Sorosun uşaqlarına” qoşulmağın Paşinyan üçün ciddi təhlükələr yaradacağını haqqında xəbərdarlıq edir, Marqarita Simonyanın dili ilə hədələyir. Bütün bu təhdidlərin nəticə vermədiyini gördükdə, Putin Paşinyanı cəzalandırmaq üçün hərəkətə keçir. Daha doğrusu, öz hərəkətsizliyi ilə qəhrəman Azərbaycan Ordusunun, igid əsgərlərimizin vaxtilə Rusiyanın iştirakı ilə işğal olunmuş torpaqlarımızı azad etməsinə bu dəfə səssiz qalır, əngəl olmur.
Lakin bu da Putinin məqsədinə çatmasına yetmir. Paşinyan onun gözlədiyindən möhkəm çıxır. Ermənistanda hökm sürən anti-Rusiya ovqatı Qarabağ savaşındakı məğlubiyyəti belə həzm edə bilir.
Putin daha ermənilərə güvənmədiyi üçün (Paşinyanı “küçədən hakimiyyətə” gətirdiklərini onlara bağışlaya bilmir) Qarabağa bu dəfə özü sahibləndi. Bizim Qarabağımızda Rusiya, faktiki olaraq, Hərbi Bazasını yaradır. Qarabağda Bir rus məktəbi olmasa da rus dilini ikinci dil olaraq qəbul etdirir. Yerli sakinlərə Rusiya pasportları paylayır. Çünki, artıq Ermənistan belə “nankor” çıxıb, daha onun maşası olmaq istəmir…
Ancaq Paşinyan bir az da irəli getdi, Rusiyanın hərbi-sənaye kompleksinə və Rusiya dövlətinin hərbi nüfuzuna “İskəndər” raketi tuşladı.
Putin Paşinyanın Rusiyanın qürur mənbəyi olan “Isgəndər” raket kompleksinin yararsızlığı haqqında söylədiklərini yeyə bilməzdi. Təsadüfi deyil ki, Rusiya gündəmi son günlər ağırlıqlı şəkildə bu mövzuya köklənib, ruslar Paşinyandan zəncir çeynəyirlər.
Öncə Ermənistan Silahlı Qüvvələrinin Baş Qərargah rəisinin müavini Xaçaturyan Paşinyanın mövqeyini aşağıladı, cavabında vəzifəsini itirdi.
Ardınca Baş Qərargah rəisi Qasparyan hökumətin istefasını tələb edərək dövlətə meydan oxudu.
Paşinyan hərbiçilərin bu demarşını haqlı olaraq dövlət çevrilişinə cəhd kimi dəyərləndirdi və Ermənistan prezidentindən Qasparyanı və ona dəstək verən bütün çevrəsini istefaya göndərməsini tələb etdi.
1993-cü ildə bizdə də belə olmuşdu. Legitim prezidentə ilk itaətsizliyi müdafiə naziri göstərərək onun qanuni əmrlərini icra etməkdən imtina etmişdi.
Göründüyü kimi, 28 il keçsə də Rusiya dəyişməyib.
Türkiyənin xarici işlər naziri Mövlud Çavuşoğlu az öncə Paşinyan hökumətinə dəstəyini ifadə edib. O bildirib ki, xalqların seçdiyi hökumətləri hərbçilərin nəinki devirməsi, hətta istefaya çağırması belə yolverilməzdir. Sağlam mövqedir.
Prezident İlham Əliyev isə az öncə yenə Paşinyandan gileylənib. Deyib ki, Ermənistan heç bir hakimiyyətin dövründə indi olduğu qədər acınacaqlı durumda olmayıb.
Ermənistanın acınacaqlı durumda olması bizi niyə narahat etməlidir ki?! Köçəryan və Sarqsyanın hakimiyyətləri dövründə torpaqlarımızın 20 faizi işğal altında idi, o yaxşı idimi?!
Mən Paşinyanın legitim hakimiyyətini qoruyub saxlamasını, Ermənistanı Rusiya əsarətindən qurtarmasını arzulayıram. Çünki Ermənistan Rusiya əsarətindən qurtulanda, Qarabağımızın rus işğalı da bitəcək.