Milli Şuranın sədri, professor Cəmil Həsənli
Adam yalan danışmaqdan, eyni yalanı təkrar-təkrar səsləndirməkdən usanmır. 52 ildir kal armud kimi bu məmləkətin boğazına keçiblər, sülalə, ailə-klan hakimiyyəti qurublar. Azərbaycandan oğurlayıb, çalıb – çapıb yerləşdirdiyi ofşor hesabların coğrafiyası ölkənin hüdudlarından dəfələrlə böyükdür. Azərbaycanın son 52 ilini, bugününü və sabahını oğurlayıb dünəni ilə viuruşurlar. Dünənində yaxşı nə varsa, çirkaba batırmaq istəyirlər, işıqlı adamlara, işıqlı tarixə ləkə atırlar. Söhbət İlham Əliyevin dünən hərbçilər qarşısındakı çıxışından gedir. Ölkənin bir hissəsin Rusiya idarəçiliyinə vermis birisi məmləkəti Rusiya imperiyasının cəngindən xilas etmiş, yoxdan bir bayraq ucaltmış, dağınıq bir ərazidən vətən formalaşdırmış, dağınıq bir toplumdan millət vücuda gətirmiş işıqlı şəxsiyyətləri xəyanət və satqınlıqda suçlayır. Bunun bir adı var: siyasi sərsəmlik!
Bunlar tək ölkənin son yarım əsrini zəbt etməyiblər, tək 50 illik dövrü çirkaba batırmayıblar, eyni zamanda XX əsrdə Azərbaycan xalqının böyük nailiyyəti olan respublikka dəyərlərini də murdarlayıblar, gözdən salıblar. Bizim müzəffər müəllim indi atası üçün də təzi bioqrafiya uydurmaq fikrinə düşüb. Dünən deyir ki, “Heydər Əliyevin istefasından iki həftə keçməmiş bir erməni millətçisi – Qorbaçovun müşaviri, onun sağ əli Aqanbekyan hələ 1987-ci ildə Fransada olarkən Fransa qəzetinə müsahibə verərək demişdir ki, Dağlıq Qarabağ Ermənistana birləşməlidir. Heydər Əliyevin dövründə heç vaxt buna cürət edə bilməzdilər”. Aqanbekyanın müsahibə verdiyi həmin qəzet Heydər Əliyevin üzvü olduğu Siyasi Büronun, birinci müavin olduğu Nazirlər Sovetinin gizli maliyyə yardımları ilə çıxırdı və Heydər Əliyev də həmin qərarlara səs verirdi.
Və şübhəsiz ki, söhbət yalnız “L’Humanité” qəzetindən getmir. 80-ci illərdə xarici ölkələrdə olan sol təməyyülü erməni mətbuatı Siyasi Büronun tövsiyəsi ilə SSRİ Nazirlər Sovetinin gizli qərarları ilə maliyyələşdirilirdi və Nazirlər Soveti sədrinin birinci müavini kimi Heydər Əliyev də bilavasitə bu işə cavabdeh idi.
Örnək istəyirsiniz buyurun: Sov.İKP MK hələ 1978-ci ilin dekabr ayının 27-də “Xarici ermənilər arasında işi gücləndirmək haqqında” gizli qərar qəbul etmişdi. Ermənistanın birinci katibi Karen Dəmirçiyan 1986-cı ilin iyun ayının 25-də bu qərara istinadən Sovet rəhbərliyinə yazırdı ki, partiya və hökumət rəhbərliyi xarici ermənilər arasında işi gücləndirmək üçün (XarLivanda çıxan “Kanç” qəzetinə (20 min ABŞ dolları), Fransada çıxan “Aşxar” qəzetinə (20 min ABŞ dolları), ABŞ-da çıxan “Lraber” qəzetinə (20 min ABŞ dolları) və Argentinada çıxan “Sevan” qəzetinə (10 min ABŞ dolları) xarici valyuta ilə hər il maliyyə yardımı göstərilsin.
Dəmirçiyanın müraciəti Mərkəzi Komitə katibliyində müzakirə edilib icra üçün SSRİ Nazirlər Sovetinə göndərildi. Həmin ilin avqustunda Nazirlər Soveti rəhbər “xadimlərinin” dərkənarı ilə həmin vəsait SRRİ Maliyyə Nazirliyi tərəfindən xaricdəki erməni mətbuatına gizli şəkildə çatdırılmaq üçün SSRİ Dövlət Təhlükəsizliyi Komitəsinə verildi. Həmin vaxt Heydər Əliyevin birinci müavin olduğu SSRİ Nazirlər Sovetinin gizli vəsait ayırdığı qeyd edilən erməni qəzetləri açıq-açığına Qarabağın Ermənistana verilməsin tələb edirdilər. İlham Əliyev bəlkə maraqlansın ki, xarici ermənilərə edilən gizli maliyyə yardımları sənədlərində kimlərin dərkənarı var.
İlham Əliyev deyir ki, Heydər Əliyevin dövründə ermənilər heç vaxt Qarabağı tələb etməyə cürət edə bilməzdilər. Bu da yalan və pafosdur. Heydər Əliyev Moskvada işləyəndə ermənilərin qorxusundan səsini çıxara bilmirdi. Yenə Ermənistanın birinci katibi Dəmirçiyan 1985-ci ilin fevral ayında uydurma erməni soyqırımının 70 illiyinin qeyd edilməsi ilə bağlı Sov.İKP MK-ya müraciət etmişdi. Məsələ fevral ayının 12-də Sov.İKP MK katibliyində müzakirə edilib Siyasi Büroya tövsiyə edildi. Məsələ fevral ayının 21-də Siyasi Büroda müzakirə edilən zaman Heydər Əliyev istisna olmaqla Siyasi Büronun bütün üzvləri bunun əleyhinə çıxış etdilər. İclada əvvəl-axır səsini çıxarmayan bir Heydər Əliyev oldu.
İlham Əliyev deyir ki, “1970-1980-ci illərdə Azərbaycana rəhbərliyi dövründə bütün separatçı meyillərin qarşısı elə yerindəcə alınırdı”. Heydər Əliyev Moskvaya rəhbər işə getməzdən az əvvəl, 1981-ci ilin iyun ayında Dağlıq Qarabağ Muxtar Vilayətinin Statusu haqqında Konstitusiya qanununu müzakirəyə çıxarmış və SSRİ-də analoji qurumların olmadığı hüquqları Dağlıq Qarabağ ermənilərinə vermişdi. Məsələn, DQMV-nin inzibati ərazi quruluşu Muxtar Vilayət Sovetinin razılığı olmadan dəyişdirilə bilməz. Yəni, Azərbaycan SSR dövlətinin müstəsna hüquqlarından biri məhz həmin qanunla ermənilərə hədiyə edilmişdi. Bax, separatçılığın qarşısı belə güzəştlər hesabına alınırdı. Heydər Əliyevin dövründə ermənilər səsini çıxarmırdı deyəndə görünür İlham Əliyev bunu nəzərdə tutur.
Amma, bu “səs” məsələsinin də səsi yeni açıqlanan arxivlərdən çıxdı. Çünki daha əvvəlki postların birində Sizə xatırlatdığım Boris Yeltsinin Əliyev haqqında ifşaedici qovluğundakı sənədlərlə Əliyev özü də tanış edilmişdi və orada tərcümeyi-hal sənədlərinin saxtalaşdırılması ilə bağlı elə məqamlar var idi ki, adam doğrudan da səsini çıxara blmirdi. (Həmin qovluqdakı sənədlərdən birinin fotosurəti ilə tanış ola bilərsiniz).
Ermənilərə gəldikdə isə, onlar yuxarıdan himayə olunduqları üçün hələ Sovet Dovlətinin rəhbərlərindən biri ola-ola Heydər Əliyevi məhkəməyə vermişdilər. 1987-ci ilin fevral ayının 26-da İ Muradyan və Z. Melik-Şahnazaryan Siyasi Büro üzvü və Nazirlər Soveti sədrinin birinci müavini “vətəndaş Əliyev Heydər Əlirza oğlunu” məhkəməyə vermişdilər. Lakin fəaliyyətdə olan Siyasi Büro üzvünün məhkəməyə verilmə praktikası olmadığı üçün SSRİ Ali Məhkəməsi iddiaya baxmaqdan imtina etmişdi. (Bax: Отказ Верховного Суда СССР от рассмотрения заявления гр. Мурадяна И.М. и Мелик-Шахназаряна З.С. Март 1987 г. ‒ РГАНИ, ф.100, оп.5, д.633, л.3).
İlham Əliyevin adını çəkdiyi Aqanbekyan isə Əliyev Siyasi Büronun üzvü və Nazirlər Soveti sədrinin birinci müavini olduğu dövrdə, 1986-cı ilin fevral ayının 24-də nəinki Dağlıq Qarabağın, eyni zamandan Naxçıvan MSSR Ermənistana verilməsi haqqında Sov.İKP MK-nın Baş Katibi Qorbaçova və SSRİ Ali Soveti Rəyasət Heyətinin sədri Andrey Qromıkoya və Sov.İKP-nin XXVII qurultayının nümayəndələrinə müraciət etmişdilər. (Bax: Обращение академиков АН СССР А.Аганбегяна, Т.С. Хачатурова, И.Л.Кнунянца, М.Х.Чайлахяна и др.к Генеральному секретарю ЦК КПСС М.С.Горбачеву, Председателю Президиума ВС СССР А.А.Громыко, делегатам XXVII съезд КПСС «О присоединении НКАО и Нахичеванской АССР к Армении» от 24 февраля 1986 г. ‒ РГАНИ, ф.100, оп.5. д.622. л.41-45). Müraciət Siyasi Büro və Nazirlər Sovetində müzakirə edilmişdi, Heydər Əliyev qeyd edilən hər iki qurumda təmsil edilirdi, XXVII qurultayın nümayəndəsi, qurultayın hazırlanması üzrə təşkilat komitəsinin üzvü idi. Xəbər almaq ayıb olmasın, niyə səsini çıxarmırdı?
İlham Əliyev dünənki çıxışında başından yekə danışaraq deyib ki, “1918-ci ildə Azərbaycan Xalq Cümhuriyyətinin ilk qərarlarından biri də İrəvanı Ermənistana vermək, paytaxt düzəltmək idi. Mən bunu qınamışam. Demişəm ki, bu xəyanət idi, satqınlıq idi”. Əlbəttə, bu tərbiyəsizlik canın və malın bu millətin istiqlalı yolunda qoymuş, yoxdan milli bir bayraq ucaltmış qurucu babaların təmiz adına və işıqlı əməllərinə, saf ruhuna bir həqarətdir, təhqirdir. Həmin adamların Azərbaycanda artıq fiziki vərəsələri və bioloji davamçıları olmadığı üçün ölkədə özünü o böyük insanların mənəvi varisi hesab edənlərin adından bəyan edirəm: Xəyanətkar və satqın sənsən və sənin atandır.
Qudurğanlığa baxın, ölkəni korrupsiya oylağına çevirən, müdafiə xərclərin oğurlayıb əyri və natəmiz yollarla ofşor hesablara göndərən, silah alverindən “şapka” və “otkat” alan, sülalə və ailə hakimiyyəti quran, qeyri-qanuni yollarla dövlət hakimiyyətini mənimsəyən dəladüzün birisi canını və malını bu millətin istiqlalı və azadlığı yolunda fəda edənləri, boş xəzinə ilə Qarabağı və Zəngəzuru sonuncu kəndinə, dağına-daşına qədər azad edib Azərbaycanın suverenliyini bütün məmləkətin hüdudlarında bərqərar edən millət fədailərini xəyanətkar və satqın adlandırır. Ölkənin 4 min kv km-lik ərazisini Rusiya işğalçılarına hədiyyə edib Putinə trolluq edən birisi deyir ki, AXC dövründə İngilis generallar burada meydan sulayırdılar.