Bəxtiyar Hacıyev
Dövlət büdcəsindən hər il yüz milyonlar, milyardlar dəyərində tikinti layihələri etmiş “AKKORD” şirkətlər qrupunun keçmiş rəhbəri 2008-ci ildə 4 milyard dollar dəyərində olan şirkətinin 51%-ni prezident ailəsinə verdiyini, 100 milyon dollar rüşvət verməsini danışır. Özünün də israfçılıq etməsini deyir, bəzi aylar ayda 1 milyon dollar xərclədiyini etiraf edir.
Bu müsahibə Gürcüstanda olsaydı, xalq gecə ilə meydanı doldurmuşdu ki, dövlət büdcəsini belə görməmişcəsinə dağıtmaq, israf etmək, mənimsəmək olmaz, bu büdcədə hər bir vətəndaşın haqqı var və onu oğurlamaq, dağıtmaq olmaz.
Azərbaycanda isə gələn reaksiyalar:
- Bu adam Ermənistanda doğulub, bəlkə də anası ermənidir, sizcə bu nə deməkdir?
- Adam niyə indi və niyə rusca danışır? Əsl hikmət buradadır.
- Adam xristianlığı qəbul edib, dinini dəyişənə inanmaq olmaz. Prezidentimiz isə əsl müsəlmandır.
- Müsahibə indi yayımlanırsa, Rusiya təzyiq edir, “İskəndər-M” raketlərinin əvəzini çıxır, Ramiz Mehdiyev camaatı qızışdırır.
- Guya bu adam özü düzəməlli adamdır ki? Hakim ailənin pulu hesabına şirkət qurmuşdu, indi də geri alırlar da, nə var ki burada?
Əslində isə isə soruşulmalı suallar başqa idi:
- Dövlət büdcəsi hesabına böyümüş təkcə bir şirkətin 4 milyard dəyəri olubsa və hakim ailəyə keçibsə, hakim ailənin xalqdan mənimsədiyi neçə milyard var?
- Vətəndaşları 50 manatlıq dərmana, 190 manat yardıma, 300 manatlıq işə, 500 manatlıq müalicəyə möhtac qalan, uşaqları küçədə dilənən ölkənin baş prokuroru ilə ortaq olan bir şirkətinin rəhbəri ayda 1 milyon dollar xərcləyirsə, bu kimin günahıdır?
- və s.
Mənə belə gəlir ki, sabah Əliyev çıxıb REALTV-də Mirşahinə müsahibə versə və “100 milyardım var, sizdən qazanmışam, əcəb eləmişəm, hamınız qələt edirsiniz” desə, yenə kimlərsə çıxıb belə reaksiya verəcək:
- Əşi Mirşahin guya düzəməlli adamdır ki? Nə vaxtdan REALTV-nin xəbərlərinə istinad etmək doğrudur?
- Müsahibə niyə Mirşahinə verilib, niyə əvvəllər yox, indi? Yüz faiz xarici dövlətlər ölkəni Suriyaya çevirmək istəyirlər.
- O müsahibəni çəkən operator mənim qonşumdur, düzəməlli adam deyil, hər axşam içir. Elə adamın çəkdiyi müsahibəyə inanmaq olmaz.
- Müsahibədə səsdə şum var, xışıltı gəlir. Adi bir müsahibəyə normal mikrofon tapa bilmirlər, müxalifət də belə qeyri-peşəkar səs yazısı olan müsahibəyə istinad edir, buna görə də mən Əliyevi dəstəkləyəcəm.
Görünür, onillərlə eyni adamların hakimiyyətdə qalması vətəndaşların təkcə milyardlarını, xoşbəxtliklərini, gələcəklərini əllərindən almır…