Milli Şuranın Koordinasiya Mərkəzinin üzvü Gültəkin Hacıbəyli
Paşinyan vətəndaş cəmiyyətindən gəlib, qrant almaq, Qərbin rəğbətini qazanmaq üçün nə etmək lazım olduğunu gözəl bilir.
Özünün də iştirak etdiyi beynəlxalq idman yarışında Azərbaycan bayrağının öncə yandırılmasına, sonra Türkiyə və Azərbaycan bayraqlarının cırılmasına göz yumdu. Ancaq sonra görəndə ki, Azərbaycan idmançılarını yarışdan geri çəkdi, məsələ beynəlxalq rezonans doğurdu, üstəlik, az öncə azərbaycanlı əsirlərlə qeyri-insani rəftar və işgəncə materialları yayılmışdı, tez sülh qaranquşu qiyafəsində peyda olub yenidən öncə dəfələrlə bəyan edib sonra dəfələrlə imtina etdiyini təkrarladı. Heç şübhəsiz ki, onun son müraciəti yenidən beynəlxalq auditoriyanın rəğbətini qazanmaq üçün idi.
Bəri başdan onu deyim ki, səmimi deyil, çünki, gerçək barış istəsəydi, “Qarabağ Azərbaycanın daxili işidir” deyib məsələni bitirərdi. Bunun yerinə beynəlxalq təminatlardan danışır, Qarabağın bərabər statusla beynəlxalq aktorların iştirakı ilə Azərbaycanla bərabər hüquqlu danışıqlar aparmasından danışır. Dünyanın hansı ölkəsində əhalinin 0,5 faizini təşkil edən milli azlıq beynəlxalq format, təminatlar tələb edib? Gürcüstanda əhalinin 10 və 7 faizini təşkil edən türklərə və ermənilərə bu status və təminatlar verilibmi? Hələ mən həmin milli azlığın Ermənistan və Rusiya ilə birlikdə ölkəmizin 20 faizini 30 il işğal altında saxlayıb, Qarabağı məzarlığa çevirib buna görə bir qəpik təzminat ödəməməsindən, Ermənistanda etnik təmizləmə nəticəsində bircə nəfər türkün yaşamamasından danışmıram.
İlham Əliyev isə bunun qarşılığında əyalət şəhərlərimizdən birində yerli və heç yerlilərin də baxmadığı telekanallardan birinə müsahibəsində separatçıları bir ağız söydü. Bu da, heç şübhəsiz ki, daxili auditoriyaya hesablanmış addım idi. Amma yenə də, Zəngəzura bayraq sancmaq yerinə, yuxarı Qarabağdakı işğalçıları və separatçıları hədəf almışıqsa, buna da şükür.
Dünən Ceyhun Bayramov ABŞ Dövlət katibinin fəaliyyətdə olan köməkçisi Derek Hoqanla telefon görüşündə Azərbaycanın şərtlərini belə ifadə edib:
- Qarabağdan bütün erməni silahlı birləşmələri çıxarılmalıdır.
- Qarabağ erməniləri Azərbaycana inteqrasiya istiqamətində təkliflərimizi qəbul etməlidir, əks halda ölkədən getməli olacaqlar.
- Laçın yolunda Azərbaycan Respublikasının nəzarət rejimi tətbiq edilməli, sərhəd-buraxılış və gömrük nəzarət postları qurulmalıdır.
Bu şərtlərin üçü də haqlıdır, əsaslıdır və onları tələb etmək Azərbaycanın doğal hüququdur.
Ancaq gəlin görək, bu tələblərin indiyədək icra olunmamasının sorumlusu kimdir?
İlk öncə “ermənilər” deyəcəksiniz və haqlı olacaqsınız. 1988-ci ildən bəri Azərbaycan xalqına yer üzündə Cəhənnəmi yaşadan məhz ermənilərdir. Ancaq Azərbaycan Ordusu 2020-ci ildə gücünü göstərib Ermənistan Ordusunu darmadağın edib, Qarabağda hazırda mövcud olan 10-18 min arası terrorçunu zərərsizləşdirmək Xüsusi Təyinatlılarımızın əlində uzağı bir həftəlik işdir. Bəs nədən bunu edə bilmirik?
Bax bu yerdə, Qəribi ağlamaq tutur. Çünki Azərbaycan hakimiyyəti 2020-ci ilin noyabrında bu qarayaranı tariximizdən birdəfəlik silmək üçün qızıl fürsəti qaçırdı. Çünki özü öz əli ilə Qarabağın açarlarını Rusiyaya təslim etdi. Və indi Ceyhun Bayramovun səsləndirdiyi tələblər ABŞ Dövlət Katibinin qarşısına deyil, Rusiyanın qarşısına qoyulmalı tələblərdir. Lakin bu tələblərdən yalnız biri- Laçın koridoru üzərində Azərbaycanın dövlət nəzarəti tətbiq etməklə bağlı tələbi Lavrov-Kələntəryanın dili ilə rədd ediləndə, Ceyhun Bayramov susmuşdu. İndi isə Rusiyayadan istəyə bilmədiklərimizi ABŞ-dan istəyirik.
Azərbaycanın bu duruma düşməsinin başlıca səbəbi bədnam, mənfur 10 noyabr 2020-ci il üçtərəfli Bəyanatıdır. Şərtləri Ermənistan və Rusiya tərəfindən dəfələrlə tapdalanan o Bəyanatın Azərbaycan üçün heç bir hüquqi qüvvəsi yoxdur, çünki, legitim deyil, Azərbaycan Konstitusiyasına ziddir və məzmununda Azərbaycanın Qarabağ və Laçın yolu üzərində suverenliyini məhdudlaşdıran müddəalar içərir.
Bütün yanlışlar oradan başladı və yanlışların düzəldilməsi də oradan başlamalıdır. Bizi bu quyuya salanlar oradan çıxarmağa borcludurlar.