Milli Şuranın sədri, professor Cəmil Həsənli
Dünən Ilham Əliyev və birinci xanım Mehriban Əliyeva respublikanın Salyan və Neftçala rayonlarına səfər ediblər. Səfərin maraqlı və diqqət çəkən məqamı ondan ibarətdir ki, ölkənin ikinci və birinci şəxsləri bu rayonlarda olarkən yerli əhalidən kimsə gözə dəymədi. Əvvəllər heç olmasa ölkə başçısı rayonlara gedərkən bir dəstə öyrədilmiş, xüsusi hazırlanmış adamları çıxarırdılar onun qarşısına. Və ya Bakıdan bir dəstə adamı avtobusa doldurub aparıb rayonda prezidentə təşəkkür etdirirdilər.
Bir neçə gün əvvəl Gürcüstanın Baş naziri də Qəbələyə gələndə İlham Əliyev onu maşınına mindirib şəhərin boş, adamsız küçələrində gəzdirdi. Salyan və Neftçalada da ins-cins gözə dəymədi. Sanki bu iki rayonda adam yaşamır, əhali qeybə çəkilib. İlham Əliyev deyir ki, bu səfər verilən tapşırıqların qeyd edilən rayonlarda necə yerinə yetirildiyinə nəzarət üçün olub. Əgər sən bir nəfər yerli sakinlə görüşmürsənsə, onların şikayətlərini dinləmirsənsə, dərdlərinə qulaq asmırsansa, bu biçarə insanların yaşayışı ilə maraqlanmırsansa o rayondakı vəziyyəti necə öyrənəcəksən, verilən qərarların yerinə yetirilib-yetrilmədiyini necə biləçəksən? Nə müddətdir bu iki rayonun camaarı su deyib dad vurur, heyvanı da dil çıxarıb su üçün mələyir.
Əvvəllər polis şikayət etmək ehtimalı olan adamları İlham Əliyevin səfərindən əvvəl polisxanaya salır, yalnız o, rayondan gedəndən sonra “azad” edirdilər. İndi bütün rayon əhlini evindən bayıra çıxmağa qoymurlar. Küçələr, dükan-bazar bomboş görünür. Hələ orta əsrlərdə Şah oğlu Şah Abbas (o da İlham Əliyev kimi hakimiyyəti atasından almışdı) əhalinin vəziyyətini öyrənmək üçün paltarını dəyişib dükan-bazarı, əyalətləri dolanırdı ki, xalqın nədən narazı olduğunu, necə yaşadığını öyrənsin. Amma XXI əsrdə ölkə prezidenti xalqdan gizlənir. Bəs deyirdiniz xalq bizi müdafiə edir. Belədirsə, niyə sizi “müdafiə edən” xalqdan gizlənirsiniz. Çünki xalqla İlham Əliyevin ailə hakimiyyəti, korrusioner rejimi arasında dərin uçurum yaranıb. Xüsusilə rayonlarda, kəndlərdə xalq zəlalət içindədir. Ona görə onun səfərləri zamanı xalqı qovub salırlar dam-daşlarına ki, dərdini deyən olmasın.
3 ildir pandemiya karantini xalqı əzmək üçün, xalqdan gizlənmək üçün bir vasitəyə çevrilib. Mən bu sətirləri yazanda yenidən karantinin müddətinin iyul ayının 1-nə kimi uzadıldığı haqqında məlumat yayıldı. Necə deyilir: İt motaldan əl çəkdi, motal itdən əl çəkmədi. Bu gün İlham Əliyevin rayonlara səfərləri “Koroğlu” operasındakı Həsən xanın ariyasını xatırladır:
Döyməsən, söyməsən, malın almasan,
Dara çəkdirməsən, dama salmasan,
Rəiyyət bir daha xanı dinləməz,
Malımın, çanımın sahibi deməz.
Sakitlik istəsən əz rəiyyəti,
Söyləyib atalar bu vəsiyyəti.
Səfər zamanı ölkənin birinci və ikinci şəxsi Salyanda uşaq pulu vermdikləri uşaqların doğum evi və uşaq poliklinikası ilə maraqlanıblar. Hər 1000 nəfər düşən 1-5 yaş arası uşaq ölümlərinə görə Azərbaycan Afrikadan sonrakı ön yerlərdə gəlir. Salyan və Neftçala isə Aran rayonları arasında ön yerdədirlər. Bir neçə il əvvəl səhiyyə xidmətinin yararsızlığından Azərbaycanda hər 1000 nəfər doğulan uşaqdan 50 nəfəri ölürdü. Böyük əksəriyyəti də 1 yaşına qədər həyatını itirirdi. İndi bu rəqəm bir az azalıb, amma səhiyyə xidmətinin yüksəldilməsi hesabına yox, uşaqlar arasında ölüm hallarının qeydə alınmaması hesabına, gizilədilməsi hesabına. Məsələn bir müddət əvvəl “Humanitar tərəqqi İctimai Birliyi bildirirdi ki, doğulan körpələr rəsmi qeydiyyatdan keçmir, hətta ölən körpələr də doğum evlərində statistikadan yayındırılır. Birlik qeyd edirdi ki, ölən körpələrin 70 faizi gizlədilir, bu üzdən rəsmi statistika reallığı əks etdirmir. İlham Əliyevin 20 illik hakimiyyəti zamanı artan uşaq ölümlərinə doğuş zamanı ana ölümü hallarının çoxalması da əlavə olundu. Təsəvvür edin ki, səhiyyə xidmətinin daha əlçatan olduğu Bakı və digər nə qədər çoxdur? Bir statistik məlumatda göstərilir ki, məsələn 2016-cı ildə Azərbaycanda 1 yaşadək 1666 uşaq dünyasını dəyişib ki, onların 1380-i şəhər, 286-ı kənd yerlərində ölüb. Daha heyrətamizi isə oğlan uşaqları arasında ölüm hallarının qıza uşaqları arasında ölüm hallarından çox olmasıdır. Məsələn, elə həmin ilin statistik göstəricilərinə görə ölən 2092 nəfər 5 yaşadək uşaqların 1259-u oğlan, 833-ü qız olub. Bu tendensiyalar bu günə qədər davam edir və indiyə qədər bunun səbəbləri məlum deyil. Bircə şey məlumdur ki, keçmiş əyyamlarda əbəçilərin doğuzdurduğu uşaqlar arasında ölüm halları, səhiyyəmizin “çiçəklədiyi” indiki dövrdən daha az idi.
Salyanla müqayisə də dövlət başçısının Neftçalaya səfəri daha gülməli oldu. Məlum oldu ki, bu rayona İlham Əliyev atasının heykəlinə gül qoymağa və B(P)aşabəla ailə şirkətlərinin balıqçılıq təsərrüfatına baş çəkməyə gəlib. Səfər zamanı İlham Əliyev və Mehriban Əliyeva Neftçalanın Yenikənd kəndində balıq və kürü istehsalı ilə məşğul olan “Azerbaijan Fish Farm” MMC-nin 58 hektarlıq Nərə Damazlıq Təsərrüfatında işlərin gedişi ilə tanış olublar. Hakim ailə bu ölkənin sərvətləri ilə daha da varlanır, amma Paşa Holdinqin törəmə müəssisənə Azərbaycan dilində ad qoymağı aləmi mədəniyyətə zidd hesab edir: “Fish Farm”.
Diqqəti yayındırmaq üçün bu “Fish Farm”ı birbaşa Paşa Holdinqin adına deyil, “LU-MUN” adlı Holdinqin adına sənədləşdiriblər. Amma ne ill’ti varsa bu “LU-MUN” şirkəti də elə Paşa Holdinqlə eyni ünvanda – Neftçilər prospekti ev 153 ünvanında qeydiyyatdan keçib, Və elə buradan balığın quyruğu bir balaca görünür. Ən maraqlısı isə odur ki, Kommersiya Hüquqi Şəxslərinin Dövlət Reyestrində ölkə qanunvericiliyinə zidd olaraq qeyd edilən şirkət haqqında məlumatlar ictimaiyyətdən gizlədilir. Yəni, “Biz deyilik rəiyyət, bizlərə nə şəriət!”.
Bax belə! İndi bildinizmi hakim ailənin bulanıq suda balıq tutmağının sirrini?