Aprelin 23-də Ermənistanla sərhəddə, Laçın-Xankəndi yolunun balanğıcında sərhəd-buraxılış məntəqəsi qurulub. Bu barədə Azərbaycan Dövlət Sərhəd Xidməti məlumat yayıb.
Məlumatda belə bir addımın atılmasına iki səbəb əsas gətirilir.
Vurğulanır ki, bu həm Ermənistandan Azərbaycan ərazisindəki qeyri-qanuni erməni silahlı dəstələri üçün canlı qüvvə, silah-sursatın daşınmasının qarşısının alınmasına, həm də aprelin 22-də Ermənistanın birtərəfli qaydada Azərbaycanla sərhəddə Laçın-Xankəndi yolunun girişində nəzarət buraxılış məntəqəsi qurmasına adekvat cavabdır.
Sərhəd Xidməti bildirir ki, sərhəd-keçid məntəqəsinin qurulması ilə bağlı həm Rusiya sülhməramlı kontingenti, həm də Rusiya-Türkiyə Monitorinq Mərkəzi məlumatlandırılıb.
Azərbaycan Müdafiə Nazirliyinin aprelin 23-də yaydığı və video ilə müaşyət olunan məlumatında bildirilir ki, aprelin 22-si saat 20:00 radələrində üzərində yaşayış konteyneri olan Ermənistana məxsus bir neçə yük maşını Azərbaycan ərazisinə keçib.
Qeyd olunur ki, bu maşınlar Ermənistanın Kornidzor yaşayış məntəqəsindən gələrək əvvəlcə Azərbaycan-Ermənistan şərti sərhədinin Həkəri çayı üzərində yeni inşa edilmiş körpüdən keçib.
Məlumatda həmin maşınlara Rusiya sülhməramlılarının şərait yaratdığı da vurğulanır.
“Müşahidə nəticəsində o da məlum olub ki, avtomobillər sonradan geri qayıdaraq Ermənistan ərazisində, Azərbaycanla sərhəddə Laçın-Xankəndi yolunun üzərində dayandıqdan sonra avtokran vasitəsilə 2 ədəd yaşayış konteyneri əvvəlcədən hazırlanmış yerə boşaldılıb.”
Nazirlik baş verənləri əvvəlcədən razılaşdırılmadan Ermənistan tərəfinin Azərbaycanla sərhəddə Laçın-Xankəndi yolunun girişində sərhəd nəzarət-buraxılış məntəqəsinin qurulması kimi təsbit edir.
Ermənistan XİN-i baş verənləri kopud pozuntu sayır
Ermənistanın Xarici İşlər Nazirliyi hesab edir ki, Laçın-Xankəndi yolunun başlanğıcında keçid məntəqəsini qurmaqla Azərbaycan tərəfi 9 noyabr 2020-ci il tarixli Üçtərəfli Bəyanatın 6-cı bəndini kobud şəkildə pozub.
“Ermənistan Respublikası 9 noyabr tarixli Üçtərəfli Bəyanatı imzalayan ölkə kimi Azərbaycanın Laçın dəhlizində qeyri-qanuni keçid məntəqəsinin quraşdırılması ilə bağlı bu addımını qəbuledilməz hesab edir və bunu qəti şəkildə pisləyir.” -bəyanatda deyilir.
Bəyanatda Rusiya Azərbaycan qüvvələrinin Laçın dəhlizinin bütün təhlükəsizlik zonasından çıxarılmasını təmin etməklə çağırılır.
Azərbaycan XİN: Nəzarət mexanizmi Rusiya sülhməramlı kontingenti ilə əlaqələndirmə şəraitində həyata keçiriləcək
Azərbaycan Xarici İşlər Nazirliyinin aprelin 23-də yaydığı bəyanatda isə deyilir ki, sözügedən sərhəd-nəzarət mexanizminin təsis edilməsi yolda hərəkət üzrə şəffaflığı, qanunun aliliyini və təhlükəsizliyi təmin edəcək.
Bəyanatda qeyd olunur ki, təhlükəsizlik zəmanəti olan bu əlavə tədbir çərçivəsində Azərbaycanın Qarabağ bölgəsində yaşayan erməni sakinlərin bu məntəqədən hər iki istiqamətdə Ermənistana və Azərbaycana şəffaf və nizamlanan keçidi üçün müvafiq şərait yaradılacaq.
O da vurğulanır ki, qeyd edilən nəzarət mexanizmi Rusiya sülhməramlı kontingenti ilə əlaqələndirmə şəraitində həyata keçiriləcək.
“Azərbaycan tərəfi, Ermənistanla birgə sərhəddə nəzarət-sərhəd rejiminin şəffaf və təhlükəsiz fəaliyyəti naminə əməkdaşlığa hazır olduğunu bildirir.”-XİN-in bəyanatında deyilir.
ABŞ-dan reaksiya
ABŞ Dövlət Departamentinin mətbuat katibinin müavini Vedant Patel Azərbaycanın Laçın dəhlizində nəzarət-buraxılış məntəqəsi quraşdırması ilə bağlı açıqlama verib.
Departamentin səhifəsində yer alan açıqlamada bu məsələnin sülh prosesinə etimadın yaradılması səylərini sarsıda biləcəyindən narahatlıq ifadə edilir.
“Biz bir daha bildiririk ki, Laçın dəhlizində insanların və ticarətin sərbəst və açıq hərəkəti olmalıdır və tərəfləri sülh danışıqlarını bərpa etməyə, sərhəddə təxribatlardan və düşmənçilik hərəkətlərindən çəkinməyə çağırırıq.”-açıqlamada bildirilir.
Azadlıq radiosu