Milli Şuranın sədri, professor Cəmil Həsənli
Dünən “Dəli yığıncağı”na getmişdim. Mirzə Cəlilin Milli Dram Teatrında tamaşaya qoyulan “Dəli yığıncağı”nı nəzərdə tuturam. Əsər əməkdar incəsənət xadimi Bəhram Osmanovun quruluşunda səhnəyə qoyulub. Mən hələ ötən əsrin 70-ci illərinin sonlarında Mehdi Məmmədovun quruluşunda bu tamaşaya baxmışdım. Əsər 1927-ci ildə yazılsa da, bu gün yazıldığı dövr qədər müasirdir. 20 il zaman fasiləsi ilə yazılsa da, əslində, “Dəli yığıncağı” ideya istiqamətinə görə “Ölülər”in davamıdır. Sadəcə “Ölülər” zəmanəsində çuxa geyən, buxara papaq qoyan, şatırı çarıqda gəzən hacıları, məşədiləri, kərbəlayiləri Sovet dövründə qalustuk taxıb, şlyapa geyən “müasir ölülər” əvəz edir.
Tamaşada Xalq artistləri Nurəddin Mehdixanlı (Fazil Küleyni), əməkdar artistlər Sənubər İsgəndərli (Doktor Lalbyuz), Elşən Rüstəmov (Molla Abbas), Vəfa Rzayeva (Pırpız Sona), Kazım Abdullayev (Hacı Nayib), Elşən Cəbrayılov və aktyor Elnur Qədirov (Formasyon Rüstəm), Vüsal Mustafayev (Sərsəm Salman), əməkdar artist Aslan Şirin və aktyor Rəşad Bəxtiyarov (Həmzat Qurban), aktyor İlyas Əhmədov (Cinni Mustafa), aktyor Mətləb Abdullayev (Şimrəli, Çavuş), əməkdar artist Əlvida Cəfərov (Hacı Məmmədəli), aktyor Rüstəm Rüstəmov (Hacı Xudaverdi), əməkdar artistlər Mirzə Ağabəyli (Hacı Cəfər), Elxan Quliyev (Hacı İslam), Kazım Həsənquliyev (Məşədi Hacı), Xalq artistləri Cəfər Namiq Kamal (Hacı Mədinə), Hacı İsmayılov (Hacı Əbdül Əzim), Rafiq Əzimov (Nəcəfül Əşrəf), Əməkdar artist Əlfida Cəfərov (Hacı Məmmədəli), əməkdar artistlər Məzahir Cəlilov (Hacı Bağdad), Əli Nurzadə (Kərbəlayi Türbət), əməkdar artistlər Mətanət Atakişiyeva və İradə Həsənova (Məşədi Zeynəb), Firuzə Balayeva (Səkinə) və digərləri maraqlı aktyor oyunu nümayiş etdirirlər.
Çağdaş günlərimizdə “Dəli yığıncağı” çox müasirdir dedim. Əgər Mirzə Cəlil indi yaşasaydı (əslində yaşayır) yəqin ki, çuxalı, çarıqlı (1909), qalstuklu, şlyapalı (1927) məşədilərin, kərbəlayilərin nəvə nəticələri kimi informasiya texnologiyalarının indiki möcüzəli inkişaf mərhələsində dəftər-qələmə sarılıb ölkə başçısının ağzından çıxan hər kəlməni dəftərinə qeyd etməyə müntəzir olan, “işgüzarlıq görüntüsü” səhnələşdirmək üçün Azərbaycanı Arxadağ Sərdarın arxa bağçasına çevirən nazirlərlərimizdən, icra başçılarından, yüksək vəzifə sahiblərindən yazardı. Bəlkə, o dramın adı “Ölülər” ya “Dəli yığıncağı” olmazdı, amma indiki dramatik proseslərin mahiyyəti elə dəli yığıncağı olardı. Tamaşada dəlilərin başında turp əkən Fərraş Şimrəli elə bizim bugünkü “Bandotdelin” əli dəyənəkli “qanun keşikçisidir”. Yəni Böyük Mirzənin özünün yüz il əvvəl yazdığı kimi: “göl həmin göl, qurbağa həmin qurbağa”.
Məlum olanda ki, Əmristandan “ruh azarını” tədqiq etmək və biçarə dəliləri müalicə etmək üçün gələn Doktor Lalbyuz müalicə edəcəyi dəlilərin dilini bilmir. Hacı Məmmədəli təəccüb edəndə ki, bu həkim “bizim dili bilməyə-bilməyə dəliləri necə müalicə edəcək? Genə ayrı azar ola bilməsə də olar, axı bu ruh məsələsidir. Dəlibaşı Molla Abbas deyəndə ki, Sən ki, bu camaatın dilini bilmirsən, di indi tap görüm dəli kimdir? Bütün tamaşa boyu davam edən “dəlixana” söhbəti son nəticədə hamını dəli edir və Doktor Lalbyuz da öz “tədqiqatlarının” nəticəsi kimi “hamınız dəlisiniz” diaqnozunu qoyur. Ölkədə gecə-gündüz Formula hazırlıqlarını görəndə, 4-5 milyonluq şəhərin mərkəzi küçələrinin beton divarlara hərbi istehkama çevrildiyinə göz yumanda, bu YAPalaq maşınların illərlə Bakı küçələrində şütüdüyünə biganə qalanda doğrudan da Doktor Lalbyuzun diaqnozu öz təsdiqini tapır. Çünki YAPalaqlaşdırılmış cəmiyyətdə Bakı küçələrində şütüyən YAPalaq maşınların qulaq batıran səsi tamaşadakı Cinni Mustafanın çığırtısıdan, Pırpız Sonanın fəryadanından, Doktor Lalbyuzun yad dildəki qiyhasandan daha bərk çıxır.
Dünən doğrudan da “Dəli yığıncağı”nın uğurlu təqdimatı oldu. Xalq artisti Nurəddin Mehdixanlının, Əməkdar artist Elşən Rüstəmovun (və cəmi dəlilərin), ustad Hacı İsmayılovun, Əli Nurun, Cəfər Namiq Kamalın, Elnar Qarayevin və bütün hacılar daxil olmaqla digərlərinin yaratdığı obrazlar müasir sənət hadisəsidir. Amma bir ifa barədə ayrıca qeyd etməliyəm. Tamaşada Əməkdar artist Vəfa Rzayeva Pırpız Sonanın təkrarsız obrazını yaradıb. Hətta bu obrazı cəsarət edib Mehdi Məmmədovun quruluşundakı Pırpız Sona ilə müqayisə etmək olar. Pırpız Sona dəlilər içərisində tək qalmamaq üçün Molla Abbas da ondan həyan olmaq üçün özünü dəliliyə vurur. Tamaşada hər kəsin and yeri seyyidüş-şühadanın tumanbağıdır və hər kəs ən müqəddəs andını məhz həzrətin tumanbağısına içir.
Əsərin “ağıllı” kəsimi (o vaxt onlar hələ “Ağıllı kənd”də yaşamırdılar) öz dəli qardaşlarının övrətlərini siğə edib həzrətin ziyarətinə aparanda dəlilər gülüşür, Pırpız Sona ağlayır, Cinni Mustafa yumruğunu zəvvara tərəf tutub çığırır. Və sonda dəlilər əsərdə və səhnədə “dəli yığıncağı”na düşürlər. Lap Formula mərəzindən az qala dəli olan müasir cəmiyyətimiz kimi!
P.S. Mən bu postu şəhər bağda yazırdım. Bir nəfər yanımda oturub məni süzəndən sonra soruşdu ki, qardaş srokda olmusan?