КОРРУПЦИЯ УЧУН ИШДАН ОЛИНГАН ПРОКУРОР ЯНА ВАЗИР ЎРИНБОСАРИ ЭТИБ ТАЙИНЛАНДИ

2017–2019 йилларда Адлия вазири ўринбосари, 2021–2024 йилларда эса Бухоро вилояти прокурори бўлиб ишлаган Маҳмуд Истамов яна ҳукуматдаги юқори лавозимга қайтди. У энди Адлия вазирининг ўринбосари этиб тайинланди.

Эслатиб ўтамиз, 2024 йилда Когон тумани прокурори Баҳодир Ғуломов 90 минг доллар пора билан қўлга тушганидан сўнг, президент топшириғига биноан бош прокурор Нигматилла Йўлдошев томонидан Бухоро вилояти прокурори Маҳмуд Истамов ва бошқа масъуллар лавозимидан озод этилган эди.

Маҳмуд Истамовнинг номи бевосита пора иши билан боғлиқ ёки унга яқинлиги аниқ бўлмасада, унинг ишдан олиниши масъулиятдан четлаштириш сифатида қабул қилинди.

Аммо орадан бир муддат ўтиб, Маҳмуд Истамов яна юқорироқ мансабга тайинланди. Бу ҳолат жамоатчиликда катта саволлар уйғотмоқда:

Коррупция билан боғлиқ можаролар ортидан лавозимидан кетганлар қайта тизимга қайтарилишининг ўзи қандай сигнал?

Халқ коррупцияга қарши курашга ишонмоқчи, лекин кеча жазоланганни бугун янги лавозимда кўриш, кўпларда ҳақиқатга бўлган умидни ўлдирмоқда.