Украинага қарши жанг қилган самарқандлик қамалди

Россия томонида жанговар ҳаракатларда иштирок этган Ўзбекистон фуқаросига нисбатан суд ҳукм чиқарди.

Самарқандлик йигит 2021 йилда йигит Россияга ишлаш учун кетган. У ерда курер сифатида гиёҳванд моддалар билан қўлга олинган ва 9 йилга қамалиб жазони ўташ учун Нижний Тагилдаги 5 сонли колонияга юборилди.

Айбланувчининг ўзи таъкидлаганидек, 2024-2025 йилларда колонияда Россия ҳарбий тузилмалари вакиллари чет элликлар орасида фаол ташвиқот олиб бориб, озодлик, пул – 1,8 миллион рубл, уй-жой ва фуқаролик эвазига “Россия–Украина” урушида иштирок этишни таклиф қилган.

Унинг сўзларига кўра, 2025 йил январ ойида у Рязан вилоятидаги ҳарбий қисмга мажбуран юборилган, шундан сўнг у Донетск ва Луганскда тайёрловдан ўтган, жангларда қатнашган ва феврал ойида дрон ҳужуми пайтида осколкали жароҳат олган. Ўзбекистонлик мухожир аскар Владивостокда даволанганидан сўнг у қочиб, Ўзбекистоннинг Москвадаги элчихонасига мурожаат қилган.

2025-йил 27-июлда йигит ватанига қайтарилди. Суд унга 4 йил муддатга озодликни чеклаш жазоси тайинланди, мажбурий пробация назорати ва яшаш жойини тарк этиш тақиқланди.

Элтузга келган маълумотларга кўра, Ўзбекистонда Россия томон бўлиб жанг қилган 400 га яқин аскарларга суд ҳукми эълон қилинди.  Мамлакатда ушбу модда бўйича қўзғатилган жиноят ишлари сони сезиларли даражада ошмоқда – асосий жазо эса озодликни чеклаш..