Термизда афғон фуқароси ҳиндистонлик ҳарбийни пичоқлаб ўлдирди

Сурхондарё вилоятининг Термиз шаҳрида 14 январь — Ватан ҳимоячилари куни байрам қилинган оқшомда қонли воқеа содир бўлди. Олинган маълумотларга кўра, шаҳардаги афғон тадбиркорлари томонидан бошқариладиган кафе-барлардан бирида Ҳиндистон Қуролли Кучлари зобити ва афғон фуқароси ўртасида келиб чиққан жанжал ўлим билан якунланган.

Гувоҳларнинг сўзларига кўра, ҳодисага ҳинд ҳарбийсининг кафедаги афғон қизига нисбатан қилган ноўрин хатти-ҳаракатлари сабаб бўлган. Қизнинг шаънини ҳимоя қилиш мақсадида вазиятга аралашган афғон йигити ва зобит ўртасида кескин низо келиб чиққан. Натижада, афғон фуқароси ҳинд ҳарбийсига пичоқ билан оғир жароҳат етказган.

Маълум қилинишича, мазкур зобит Ўзбекистон ва Ҳиндистон ўртасидаги икки томонлама мудофаа соҳасидаги ҳамкорлик ҳамда тажриба алмашиш дастури доирасида Термизга келган. У ҳудуддаги ҳарбий қисмларда малака ошириш ва амалиёт ўташ билан шуғулланаётган бўлган.

Ҳозирда мутасадди идоралар томонидан суриштирув ишлари олиб борилмоқда. Расмий маълумотлар ҳозирча эълон қилинмади.