Навоий олтин комбинати тутунлари аҳолини заҳарламоқда

Навоий вилоятидаги Учқудуқ ва Зарафшон шаҳарларида жойлашган Навоий кон-металлургия комбинатига (НКМК) қарашли иккинчи ва учинчи Гидрометаллургия заводлари мана шундай ишлайди. 

Иш тартиби 7/24 форматда. Заводлардан чиқаётган захарли тутун ишчиларни абгор қилиб бўлган, бутун туман аҳолиси соғлиғига ҳам жиддий таҳдид солмоқда. Олтин ишлаб чиқарувчи ва мамлакатнинг энг бадавлат комбинати даромадидан вилоятга ёрдам сифатида ҳеч бўлмаса йўл таъмири учун пул  берилмаслигини тушундик.  Лекин шу тушумдан ҳеч бўлмаса заводни модернизация қилишга маблағ ажратилиши керакку. Бу ахир бизнеснинг энг муҳим қоидаси:  пул келтирадиган дўкон-дастгоҳни таъмирлатиш энг зарурий чиқим ҳисобланади. 

НКМК таркибида 8 та шундай завод мавжуд. Комбинатнинг бирор заводида замонавий технологиялар ва филтрлар йўқ. Навоий вилоятининг экологияси бутун республика бўйича энг аянчли ҳолда экани ҳеч кимга сир эмас. Даромадни тўғри тақсимлаш,  энг зарур чиқимларга пул ажратишни қачон ўрганамиз,  юқоридагилар? Шуми Ўзбекистоннинг олтин қайноғи бўлган комбинатга бўлган эътибор?  

Мошин яхши юриши учун мой, бензинни аямаслик керак бўлганидек, бу завўддаги тажриба қозонган ишчилар саратондан ўлиб кетмаслиги, кўпроқ олтин ишлаб чиқариши учун ҳам филтрларни янгилаб туриш жоиз.  Очкўзликнинг ҳам чегараси бордир, ҳасислик ҳам эви билан-да, ёшуллилар.