Ўзбек қизнинг калласини олган икки ўзбек Истанбулда ушланди

Истанбулда ўзбек ватандоши 37 ёшли Дурдона Ҳокимовани ўлдириб, жасадни парчалаб мусор қутиларига ташлаб юборганликда гумонланган икки ўзбек жиноят содир этганидан саккиз соат ўтиб Туркиядан Грузияга қочаётганида аэропортда қўлга олинди.

Жиноят содир этган икки ўзбек ҳаракатлари видеога тушиб қолган. Бу шахслар ДНК таҳлиллари ва юзага чиққан бошқа далиллар ортидан ушланган.    

Муҳтамал қотиллардан бирининг мақтул Дурдона Ҳокимова томонидан севгиси рад этилганлиги ҳақида турк матбуоти ёзди.

Дуотепадаги даҳшат

Истанбулнинг Дуотепа маҳалласи «Қуйили булоқ» кўчасидаги мусор қутисини титган Усмон чойшабга ўралган бошсиз жасадга кўзи тушди.  

Усмон дарров полицияга телефон қилди. Воқеа жойига етиб келган Истанбул криминал полицияси атрофдаги мусор қутидан елим халтага солинган хотин кишининг калласини топди. Жасаднинг бармоқ изларидан унинг Дурдона Ҳокимова экани аниқланди ва саккиз соат ўтиб уни ўлдиришда гумон қилинган икки ўзбек қўлга олинди.

Муҳтамал қотилларнинг кимлиги аниқланди. Истанбул полициясига кўра, қотиллик Ўзбекистон ватандоши Дилшод Аҳрор ўғли Турдимуродов томонидан содир этилган ва у ўз айбини терговда бўйнига олган.

Жиноятни содир этишда ва жасадни боши ва оёқларини парчалашда қатнашган Ғафуржон Акмалхонович Камолхўжаев ҳам ўз айбига тўла иқрор бўлган. Қотилларнинг ҳар иккаласи қурилишда ишчи бўлиб ишлаган.

Уларнинг бармоқ излари ва видео тасвирлари Туркия криминал полициясида мавжуд.