ЧОРВОҚҚА ЧУРҚ ЭТМАГАН КУШЕРБАЕВ ЛОПЕС СОЯСИДА ПОПУЛИЗМ ҚИЛЯПТИ

Расул Қушербоев бутунлай ўлчов ҳиссини йўқотганми дейман, ахир популизм ҳам ўлчов ҳиссини яхши кўради. 

Кушербаев эса Женифер Лопес концертидан сўнг ўзини тўплай олмаяпти, Лопес ижодининг барча мухлисларини гей ва трансга чиқазиб ташлаяпти. Жинсий ҳақорат олий маълумотли сиёсатчи ва давлат мулозимининг иши эмас. Популизм қилиш учун бир артист аёлдан бошқа нишон тополмадингизми?

Қушербоевнинг фаолияти ҳали ҳам экологик масалалар билан боғлиқми? Унда Расул Қушербоев Никита Макаренкодан ўргансин — Никитанинг қалби шу юртнинг экологияси  учун оғрийди ва у ҳар куни бу ҳақда профессионал ёзади.

Қушербоевнинг қалби эса фақат ўзи учун оғрийди, ўзини яхши кўради ва фақат ўзини тарғиб қилади. Кушербаев Чорвоқ масаласида юмалоқ ёстиқ қилиб экология масаласи қаттиқ назорат қилинади деди-ю мум тишлади.

Ҳолбуки, Чорвоқ «запасной» сув омбори эмас, Тошкент ва вилоятнинг энг асосий ичимлик сув манбаси. Чорвоқни шубҳали собиқ куёвтўрага топшириб, устида тажриба ўтказиш суиқасдга тенг. Юртнинг энг катта оғиз полвони Кушербаев эса «жараён қаттиқ назорат қилинади» деган мавҳум жумла билан бўйин қисиб қочди.

Ўз вазифаси, экологик фожиа келтирадиган қарорларни оқлаб, бошқа томонда гейлар ва транслар ҳақидаги гаплар билан ҳаммани чалғитаётган Кушербаев зериктириб юборди!

Ўзбекистонда яширин гейлар бировнинг қизини ўйинчоққа айлантириб, одамлар кўзида уйланиб олади. Боласига алимент тўламай парда ортида яширинган «эркаклар»дан очиқ гейлар дуруст. 

Трансларчи? Хўш, жаноб Кушербаев, қаерда кўрдингиз трансларни? Мен бутун умримда фақат Жасминни экранда кўрганман ва сиздан кўра ўша Жасминдан анча кўпроқ фойда бор. 

Ўз ишингиз билан шуғулланинг, Кушербаев! Қуруқ қошиқ оғиз йиртар, популистлардан ҳам омма зерикяпти. АЭС, сув, чиқиндилар, дарахт қирғини, шаҳарнинг ифлос ҳавоси — сиз алоқадор ва гапиришингиз керак бўлган қанча муаммолар бор

Лекин шуларнинг ўрнига жамиятнинг энг аҳмоқ қисми олдида очко тўплаяпсиз. Агар экология масалаларига билимингиз, компетенциянгиз етмаса, экология масаласига омма эътиборини тортиш сиз учун зерикарли бўлса, буни тан олиб айтинг. Сизни муфтиятда бирор лавозимли қилишларини сўраб петиция йиғиб берамиз. Эко–вазирликка ортиқча молиявий чиқим бўлманг.

Нега бунчалар кескинман? Депутатлик чоғи туппа-тузук одам эди шу Кушербаев. Экология соҳасига келиб ўрин топа олмади афтидан. Кушербаев ҳозир бирор экологик мавзуга гейлар масаласичалик қайғурмайди.  Мутаассибу путинқулларга фикрлари яқинлашиб қоляпти. Ўта ачинарли манзара.

Anvar Nazir (Элтуз таҳрири)