Элтуз танқидидан кейинги маросимлар туркуми

Элтуз судлов органи эмас, прокуратура ҳам эмас. Биз муаммоларни оммага очиқ айтамиз, шунинг учун ёшуллиларга ёқмайдиган энг “ноқулай” нашрмиз. Хўш, Элтуз танқидий мақола эълон қилгач қандай томошалар бўлади?

Бир томонда танқид қилинган корхона ходимлари бурчак-бурчакларда хабарни бир-бирига улашади. Адолат қарор топиб ҳақиқат юзага қалқиганидан кайфият минг градусда, ички овоз билан “Бўлар эканку!” деган мисралар баралла айтилади. (Шу жумла Сирожиддин Саййид овози билан ўқилсин.) 

Қочган ҳам,  қувган ҳам «Худо»  дейди. Бошқа томонда раҳбар жим, жуда бўлса бир мажлис чақириб “турли сариқ нашрларда менга тўхмат қилишди” дея мўлтирайди. Тепадаги узкий круг доирасида айбдорни қидириш маросими очиқ деб эълон қилинади. Жамоага нисбатан турли маъмурий босимлар, ҳужжатбозлик авж олади. Мажлисларда раҳбар ўзининг қанчалар ҳокисор бечора эканидан гапиргандай бўлади, ходимлар ҳам ишонгандай кўринади. Станиславский тирик бўлганда бу икки томонлама томошани кўриб “не верю” дерди.

Учинчи фронт энг қизиғи, бошлиқдан разгон олган пахтакорлар суруви изоҳда Элтузнинг полизига тош отиб, гўрига ғишт қалаб, раҳбарни мақтайди. Вой дод, бу тўхматга қандоқ чидай деб сочларини юлиб ерларга онтарилади. Элтуз танқидий мақолани пулга ёзиб чиғоради дея ўзларини овутади бу галварслар. Бўмаган гап.

Кейин кулминация бошланади: маҳаллий майда-чуйда блогерлар оғзи билан Элтузни ҳақорат қилиш маросими. Танқиддаги фактларни инкор қилиш имконсиз бўлгач, ноиложлик ортидан ҳақорат тўфони бошланади – буни оти катарсис. “Гуллаб-яшнавотган юртимизани кўромисан, ватангадо, капангадо… Биза порахўр бўлсак санга нима, бизани ёзма. Ичимиздан ўтганини фақат иштонимиз билсин. Америкадан пул оласан, масонларга хизмат қиласан, рангли инқилоб қиласан, ЭЛГEБEТE…” шу “мазмундаги” сийқаси чиққан муносабатлар ҳам зериктирди.

Нашримиз шу абсурд томошалар фони билан ўз фаолиятини давом эттиради. Бемаъни маросимлар ўрнига шунчаки ёзилган муаммони ҳал қилиш, эй бошлиқ пийпллар. Оч нафсингни жиловла, мажлисларда сўкинишма, курсига ёпишиб олишма – шунда тақдири азал сени ярлақаб, бахтинг очилади. Бонусига нариги дунёда ҳам комфорт+ шароити сенга мунтазир бўлажак.