Бухоро нефт заводи ишчилари босим ва адолатсизликдан шикоят қилмоқда

Бухоро нефтни қайта ишлаш заводида меҳнат қилаётган оддий ишчи-ходимлар Ўзбекистон нефт-газ соҳаси раҳбариятига мурожаат билан чиқди. Уларнинг таъкидлашича, заводда ишчилар мунтазам равишда босим остида ишлашга мажбур бўлмоқда.

Мурожаатда айтилишича, завод раҳбарияти томонидан тез-тез ўтказилаётган асоссиз текширувлар ишчиларнинг моддий аҳволига салбий таъсир кўрсатмоқда. Арзимаган маош эвазига кун кечираётган ишчиларнинг сўзларига кўра, бундай текширувлар айрим ҳолларда маошдан ушлаб қолиш ёки бошқа турдаги жазоларга сабаб бўлаяпти.

Ишчилар раҳбарият ва қуйи бўғин ходимлари ўртасидаги катта маош фарқига ҳам эътибор қаратган. Улар келтирган рақамларга кўра, айрим раҳбарлар ойига 20–25 миллион сўм маош олаётган бир пайтда, заводдаги қора меҳнат билан шуғулланувчи ишчилар 4–5 миллион сўм атрофида ойлик билан чекланиб қолмоқда.

Мурожаат муаллифларининг таъкидлашича, ўз ҳақ-ҳуқуқини талаб қилган ишчилар турли босимларга учрамоқда. Шу боис улар соҳадаги масъул раҳбарлардан ишчилар маошини ошириш, асоссиз босим ва текширувларга барҳам бериш бўйича амалий ёрдам сўраб қолган.