Андижон қўриқлаш бўлими Элтуз мақоласи ортидан тозаланди

Андижон қўриқлаш бўлимида иш тақсимоти адолатсиз,  ходимлар ёппасига мажбурий меҳнатга жалб қилинаётгани ҳақидаги Элтуз мақоласи ортидан масъуллар текширув ўтказди. 

Текширув натижасида вилоят қўриқлаш бўлими бошлиғининг ўринбосари ишдан олинди. 

Ходимларнинг Элтузга ёзишича,   Андижон вилояти инспекция (шахсий хавфсизлик) бўлими бошлиғи Дониёрбек ишдан олинди.  Унинг қўпол муомаласи, тазйиқлари ва коррупцияга ботганлиги тасдиқланди.

«Янги бошлиқ Искандар Қўлдошев ҳалол экан. Муомаласи ҳам, асаби ҳам жойида. У порахўр офицерларни тизимдан йўқотиш билан шуғуллана бошлаган эди. Лекин эски бўрилар устун келяпти. Қўлдошев устидан тухматлар ёғиляпти» – дейди ходимлар.

Бу тухматлар Soyalar телеграм каналида тарқалмоқда. Иддаоларга кўра, Қўлдошев Андижон вилояти ИИБ Ахборот хавфсизлик хизматидан бир мулозимга 15 минг доллар пора таклиф қилган. 

«Қўлдошевда пора учун бунча пул йўқ бўлса керак. Ҳам янги келган одам. Шу мансабни олиши билан бунақа хабарлар сизди. Афтидан,  эски порахўр офицерлар коррупционер Дониёрбой қайтишидан умидвор» – дейди ходимлар. 

Мурожаатда «бўри» деб аталган порахўр офицерлар  айнан кимлиги айтилмаган. Элтуз янги раҳбар Искандар Қўлдошев айнан ким билан зиддиятга боргани ҳақида маълумотга эга эмас. Шу билан бирга,  Қўлдошев кимгадир пора узатгани ҳам далилланмаганини таъкидлашимиз лозим.