Германия Путин режими қурбони қариндошларини депортация қилди

Германия Берлинда ўлдирилган чечен дала қўмондони Зелимхан Хангошвилининг қариндошларини  Грузияга депортация қилди.

«Deutsche Welle» ва «Эхо Кавказа» нашрларининг хабар беришича, Хангошвили оиласининг 12 аъзоси, жумладан уч йил олдин Швециядан Германияга кўчиб келган укаси Зураб Грузияга депорт қилинган.

Бир кун аввал полиция унинг Вюнсдорф (Бранденбург ери) шаҳридаги квартирасида тинтув ўтказган, шундан сўнг Зураб ва қолган қариндошлар депортация қилиш учун Берлин аэропортига олиб келинган.

Аввалроқ Германия ҳукумати Зурабга бошпана беришдан бош тортган, 2024 йилнинг кузида эса суд уни юбориш қарорини тасдиқлаган.

Эслатиб ўтамиз, 2019 йилнинг августида россиялик киллер Вадим Красиков Берлин марказида Хангошвилини отиб ўлдирган эди. Кейинчалик у умрбод қамоқ жазосига ҳукм қилинган, бироқ 2024 йил августида Москва катта маҳбуслар алмашинуви доирасида Красиковни Россияга қайтарган. Кремль унинг ФСБ ходими, «Альфа» махсус бўлинмасида хизмат қилганини тасдиқлади. Уни самолёт ёнида шахсан Путин кутиб олган эди.

Энди эса ФСБ агенти томонидан ўлдирилган дала қўмондонининг қариндошларини, Германия қотилнинг ўзини Кремлга топширганидан бир йил ўтиб, депортация қилишмоқда. Бу юридик расмиятчилик билан яширилган сиёсий қарорга ўхшайди.

Расман — «суд қарорини ижро этиш». Аслида — Москвага Берлин кескинликни хоҳламаслиги ҳақида навбатдаги ишорани етказиш.