Данғаранинг ИИБ бошлиғи ходимларга жиноятчи топиш кунлик режасини белгилаб бермоқда

Данғара ИИБ бошлиғи лавозимга тайинланганига эндигина бир ой бўлган Бозорбоев Жаҳонгир Ҳаётжонович кунлик жиноят меъёрларини белгилаб бермоқда. Бу ҳақида Элтузга ички ишлар ходимлари хабар берди.

«Ҳар куни маъмурий баённома тузишимиз, майда безорилик қилганларни аниқлашимиз керак. Жиноятчи тополмасак жамоат жойида ичиб ўтирган пиёнисталарни тутишимиз шарт» – дейди ходимлар.

Данғара туман ички ишлар ходимларининг таъкидлашича, бошлиқ Жаҳонгир Бозорбоев ҳар куни фуқаролардан 500 минг сўм миқдорида жарима ундиришни талаб қилади. Ички ишлар ходимининг ваколати борми, йўқми, жарима қонунийми – бошлиқни бу масалалар мутлақо қизиқтирмайди.

«Ҳафтада бир кун ҳам дам берилмайди. Янги бошлиқ раҳбарият кўз ўнгида очко ишламоқчи, биз эса шу очкопарастлик қурбони бўляпмиз. Тезкор ходимлар ва идорада хизмат қиладиган ходимлар профилактика инспекторларининг натижаси яхши бўлса (жиноят ва жарима режаси тўлиқ бажарилса), кейин дам олади».

Данғара тумани Ички ишлар бошқармаси ҳақида шикоятлар сони ортгач, Фарғона вилояти ШХБ бошқармаси бошлиғи Шомуродов хам вазият яхши эмаслигини билиб, туман ИИБга келди.

«Шомуродов мажлис якунида ходимларга ҳафтада бир марта дам беришни буюрди. Лекин бу буйруқ гаплигича қолиб кетди».

Элтузга тақдим қилинган маълумотларга кўра, Жаҳонгир Бозорбоевнинг бир ойлик бошқаруви даврида 3 профилактика инспектори истеъфога чиққан, яна беш ходим нафақа баҳонасида тизимни тарк этган. Босим ва мантиқсиз топшириқлардан безган ходимлар иш ташлаш арафасида. 

Азиз Анварович, Данғара ИИБ бошлиғи фаолиятини шахсан назоратга оласизми?