Учтепада прокурор аралашуви иддао қилинмоқда

Учтепа тумани прокурори Баҳодир Шерановга нисбатан туман ҳокимияти ходимларини камситиш ва жинсий хўрлаш иддаолари бўйича хизмат текшируви тайинланди. Шу билан бирга, ноқонуний деб топилган автомобил ювиш шахобчасини бузиш ҳақидаги суд қарори МИБ томонидан ижрога қўйилгани хабар қилинди.

Нима бўлган? Иддаоларга кўра, тумандаги рейдлар вақтида “Алгоритм” мавзеси, Пайгоҳ кўчасида давлат еридан ноқонуний фойдаланган, ичимлик сув тизимига рухсатсиз уланган автомойка аниқланган. Суд бу объектни бузиш ва ерни бўшатишга қарор қилган.

Рассом Туз суҳбатлашган ҳукуматдаги манбаларга кўра, автомойка эгаси текширувчиларга босим ўтказган, айрим телефон суҳбатларида туман прокурори Баҳодир Шеранов номи тилга олинган. Шунингдек, иддао қилинишича, прокурор МИБ ходимларини ижрони тўхтатишга оғзаки чақирган. Кейинчалик ҳокимият ишчи гуруҳи объектни бузишга киришгани, МИБ эса ижрони расман бошлагани айтилди.

Ҳокимият ва прокуратура. Туман ҳокимлиги вакиллари Президент қарори ҳамда шаҳар ҳокимининг буйруғи ижросини таъминлаш доирасида инвентаризация ўтказганини маълум қилган. Иддаолар орасида прокурорнинг ҳокимият ходимига нисбатан ҳақорат ва таҳдид ишлатгани ҳақида ҳам гапирилмоқда.

Ҳозирги ҳолат. Элтузга маълумот берган манбалар хизмат текшируви ДХХ назоратида эканини айтмоқда. Рaсмий идоралардан расмий изоҳ олишга уринишлар давом этади.

Ушбу маълумотлар Элтузга тақдим этилган ҳужжатлар ва гувоҳлар баёнотига асосланади. Иддаолар расмий тасдиқни талаб қилади. Элтуз барча томонларнинг позициясини эшитишга тайёр.