Парадокс: Ўзбекистон АҚШдан пахта сотиб олади

Ўзбекистон АҚШдан самолётлар, дуккакли донлар ва тонналаб пахта сотиб олади ҳамда америкаликлар учун визасиз тартиб жорий этади

АҚШ Давлат департаменти Ўзбекистон президенти Шавкат Мирзиёевнинг Вашингтонга ташрифи чоғида имзоланган келишувлар тафсилотларини ошкор қилди. 

Унга кўра, Тошкент америкалик компанияларга камёб ер металлари конларига кириш имконини яратади, шунингдек, АҚШдан 2 миллион тонна соя донлари, 22 та Boeing-787 Dreamliner самолёти ва кичик атом реакторларини жами 8,5 миллиард доллар қийматида харид қилади.

Энг қизиқ жиҳат шундаки, келишув доирасида Ўзбекистон — дунёнинг энг йирик пахта ишлаб чиқарувчи мамлакатларидан бири бўлишига қарамай, 100 минг тонна америкон пахта сотиб олиш бўйича уч йиллик шартнома тузди.

АҚШ президенти Дональд Трамп таъкидлашича, бу келишув Ўзбекистонни келгуси ўн йил ичида Америка иқтисодиётининг “асосий соҳаларига” 100 миллиард доллардан ортиқ инвестиция киритишга мажбур қилади.

Шунингдек, Ўзбекистон UzAuto Motors автомобил йиғиш компаниясини хусусийлаштириш жараёнида АҚШ билан ҳамкорликни кенгайтиришни ва 2026 йилдан америкаликлар учун 30 кунлик визасиз тартиб жорий этишни режалаштирмоқда.