العصمة في ايد الزوجة.. بجد؟
ناس كتير بتستظرف وتقول إن الستات في مصر واخدة حقوقها كاملة... وان الرجالة دلوقتي هما اللي محتاجين جمعيات لحماية حقوقهم...
رغم ان اقل زيارة لأقرب محكمة اسرة في اي محافظة... سهل جدا رصد مين بالظبط اللي محتاج جمعيات تحمي..
ولأن الجواز بيبدأ في الغالب وردي ورومانسي... وبيقلب بعد شوية بمعارك مهببة.. فيه بنات كتير بقوا بيحاولوا يحموا نفسهم من قوانين الأحوال الشخصية الجائرة.. فبيحطوا في عقد الزواج شرط "ان الزوجة من حقها تطليق نفسها"
اللي بالبلدي بيقولوا عليها: (العصمة في ايد الزوجة).
طبعا غني عن التعريف ان الشرط ده لا يسلب الزوج حقه في انه يطلق مراته..
بس اللي يهمني هنا انبه له الآتي:
من حقك تطليق نفسك دي اما بتيجي تنفذيها.. بيحصل الآتي (عن تجربة):
1- ففيه مأذونين بيرفضوا يحطوا الشرط ده اصلا حتى لو الزوج والاب وأبو الزوج موافقين.
2- المأذون وقت الطلاق بيرفض وبيتهرب عشان بيخاف الزوج وأهله يكسروله مكتب المأذونية أو يرنوه علقة.
3- المأذون بيتعامل معاكي على إنك تافهة وهايفة وفاقدة الأهلية وهرموناتك قايمة عليكي ومابياخدش طلبك بالجدية اللائقة.
4- لو كلمتي محامي (غالبا) حيحاول يبوظ الطلاق الودي ويمشيه محكمة عشان هو يسترزق.
5- المأذون بيقولك.. انك لازم تُعلمي الزوج على عنوانه ولو الزوج مستلمش (و ده اللي غالبا حيحصل) الطلقة مش حيعتد بها قانونا.. والزوج من حقه يعتبرك لسه مراته ويرفع عليكي قضية ولو بعد سنين.
6- لو تم إعلام الزوج واستلم الإعلام.. يقدر ببساطة ينزل يردك في نفس اليوم عند اي مأذون... وممكن يحط عنوان قديم ليكي وماتستلميش حاجة تقول انه ردك.. واما تيجي تتجوزي تاني يا يبوظ لجوازة يا يرفع عليكي قضية انك جامعة بين زوجين.
7- الزوج كمان ممكن يتلاعب بيكي... ويسيبك فرحانة انك مطلقة نفسك.. وقبل العدة ما تخلص بيوم ينزل يردك.. فعلى ما تعرفي (ده لو عرفتي) وتطلقي نفسك تاني.. يلعب نفس اللعبة مرة تانية... ويضيع من عمرك شهور في القصة دي.
8- المأذون في الآخر بينصحك تتطلقي وديًا بحضور الطرفين... او تروحي المحكمة وترفعي قضية طلاق او خلع برررررضة.. بس بيقول ان الحكم فيها بيكون اسرع لو شرط ان الزوجة من حقها تطليق نفسها موجود.
انا بانبهكم بس عشان تحطوا الكلام ده في حساباتكم.. وبالرغم من كده مش بأقول ان الشرط ده زي قلته وماتكتبوهوش...
اكتبوه... لأنه رغم ضعفه افضل من عدم وجوده... بيقلل وقت التقاضي... ومش بتحتاجي تتنازلي عن حقوقك زي الخلع.. وبيمثل عامل ضغط على الزوج لو تصور انه يقدر يهددك أو يذلك..
ممكن طبعا تظهر تعليقات من محامين بتقول ان الأمور مش بالظبط بالشكل ده... بس ده ممكن يكون صح للي فاهم قانون أو لقى حد فاهم قانون يدعمه... لكن انا بأتكلم عن تجربة حقيقية للي بيحصل على أرض الواقع..
وحنفضل نطالب بحقوقنا وبقوانين تحمينا وتحمي ولادنا.. واحنا مش اقل من التونسيات اللي عندهم قوانين احوال شخصية بتحمي الطرفين بكل عدل...
عاوزين الواقع ده يتغير عشان مصلحة المجتمع كله مش حتتحقق في وجود انسانة مقهورة او اطفال مذلولين.. عاوزين قوانين تسمحلنا اننا في يوم نقول "الإجابة.. مصر"
