لولا اختلاف الأذواق لبارت السلع !!

3752

دي العبارة اللي بتستخدم في حسم المناقشات الخاصة بآراء الناس في الفن والإبداع لما شخص يكون معترض على اسفاف ما في عمل فني مثلا أو إي نوع من أنواع الإبدا ، هوب يروح واخد العبارة ديه في وشه علطول . 

يعني حاجه شبه كده كُل اللي يعجبك والبس اللي يعجب الناس !! 

لأ للأسف والله ، أنا آسف لك يعني !! 

حضرتك ممكن تقولي ده على نوع الفراخ المجمدة اللي بتجبها من السوبر ماركت ، وانا بحاول اقنعك أن الفراخ الطازة من عند "الفرارجي" أحسن وافيد .

ممكن تقولي كده على نوع ملابسك الداخلية ، لما انت تكون مقتنع ب "قطونيل" مثلا وانا بقتعك أن "الإمبراطور" خامتة أحسن وارخص !! 

ممكن حضرتك تجادلني في ان المعسل السلوم أحسن من التفاح أو الخوخ وتنتهي الماقشة على أن لولا اختلاف الأذواق لبارت السلع !! 

ماشي كده تمام جدا واقدر افهمك واستوعبك وأحترم رأيك جدا كمان . 

إنما تقولي الكلام ده عن فيلم ولا أغنية ولا رواية أو ديوان شعر !! 

اقولك اعذرني يا كابتن أنا مافهمش الكلام ده خالص.

الفن والإبداع عمرهم ما كانوا أو حيكونوا سلعة على الأقل بالنسبة ليا ، الفن دا جزء من روح وإحساس وأفكار الفنان اللي بيقدم نوع الإبداع ده إياً كان ، ما بنفعش ولا مقبول اننا نقدمة للناس كا سلعة تباع وتشترى ، ما ينفعش نعامل النص الروائى على سبيل المثال ،  على أنه "كلوت" أو "صدر فرخة" حضرتك !! 

الفنون هي سر تطور وتحضر الإنسان ، الوعي الجمعي للبشر بيتكون من خلال التراكم الثقافي والفني . 

حضارت الأمم يا سيدي بتتكون من فنونهم وثقافتهم   مش من خلال اسواقهم وحجم تجارتهم !! 

بس للأسف اللي بيحصل في "سوق" الفن والإبداع في مصر ، شئ يسبب الإحباط والاكتئاب ، تحويل الفن والإبداع لسلع ، وتجارة بشكل بحت ، دا سبب رئيسي في تزيف وعي المواطن وانحطاط الذوق العام في المطلق . 

بتحسر على حال الأدب والشعر بشكل حقيقي ، الحسرة مش من قلة الأدباء والشعراء والمبدعين ، لأ على الإطلاق ، في أدباء وشعراء شباب ومن جيل الوسط عظماء ومبهرين ، بس،للأسف الشديد ، السوشال ميديا نجمت فقاعات وانصاف موهب ومن لايملكون الموهبة حتى ، بشوية فولورز ، وخطط ممنهجة لنقل الفولورز دول للصفحة ديه بعد الصفحة ديه  ودور النشر تطبع وتبيع على حس الفولورز ، ومعظم الفولورز دول من سن 18 إلى 22 سنة تقريبا ، يعني جيل كامل بيتم تزيف وعيه وذوقة ، وبيفهموه ، أن اللي بيقرأة ده ، أدب وشعر ، وبالتالي المواهب الحقيقية مع الوقت حتنقرض ،،ومش حيفضل لنا ، غير القرف اللي طافح علينا ده .

تسجيل الايميل

شارك وفكر معانا وابعت تدوينتك