ABŞ Prezidenti Donald Tramp Azərbaycan Prezidenti İlham Əliyevin Xankəndidə keçirilən “Qlobal Şuşa Media Forumu – 2025”dəki çıxışını özünün rəsmi “Truth Social” hesabında paylaşıb.
Gununsesi.info xəbər verir ki, paylaşım 22 iyul 2025-ci il, Bakı vaxtı ilə saat 01:30-da edilib. Tramp Azərbaycan liderinin çıxışından 1 dəqiqə 17 saniyəlik videonu izləyicilərinə təqdim edib. Videoda Azərbaycanın dövlət başçısının Tramp haqqında müsbət fikirləri əks olunub.
Prezident İlham Əliyev çıxışında D.Tramp və ABŞ-Azərbaycan münasibətləri haqqında bunları demişdi: “Kiçik bir dəqiqləşdirmə etmək istərdim, mən ABŞ Prezidenti Donald Trampın qələbəsini proqnozlaşdırmırdım, dedim ki, bu, Azərbaycan xalqı üçün daha məqbul olardı. Çünki Azərbaycan xalqı kimi o da fundamental prinsiplərə, ailə prinsiplərinə, dəyərlərinə sadiqdir”.
Dövlət başçısı qeyd edib ki, Tramp müharibə başlatmayan yeganə ABŞ prezidentidir:
“Onun hakimiyyətdə olduğu qısa müddətdə görünür ki, bu insan müharibələri bitirir”.
İlham Əliyev vurğulayıb ki, Azərbaycan ABŞ-yə Cənubi Qafqazdakı proseslərə diqqət yetirdiyi üçün minnətdardır: “Biz ona şəxsən Azərbaycan və Ermənistana razılığa gəlməkdə kömək etmək istəyinə görə çox minnətdarıq, baxmayaraq ki, o, beynəlxalq təhlükəsizliyin daha qlobal məsələləri ilə məşğuldur. Cənubi Qafqazdakı vəziyyəti də diqqət mərkəzində saxlayır. Biz Azərbaycanda, əlbəttə ki, onun bir çox səbəblərdən qalib gəlməsinə şadıq və təbii ki, ona işini sona çatdırmağını arzulayırıq”.
