ကချင်ပြည်နယ် ဝိုင်းမော်မြို့နယ်ရှိ စစ်ကောင်စီ လက်အောက်ခံ ရွှေမင်းပြည်သူ့စစ်၏ အင်လုံခ တပ်စခန်း ပြန်လည်ရရှိရေးအတွက် စစ်ကောင်စီက အင်အားအလုံးအရင်းဖြင့် ပြန်လည်ထိုးစစ်ဆင်လာ၍ တိုက်ပွဲပြင်းထန်စွာ ဖြစ်ပွားခဲ့ပြီး ယမန်နေ့ညနေတွင် ကချင်လွတ်လပ်ရေးတပ်မတော်(KIA)တပ်များ ပြန်လည်ဆုတ်ခွာလိုက်ရဟု KIA သတင်းရင်းမြစ်က ပြောသည်။
KIA၏ ထိုးစစ်စတင်သည့် မတ်လ ၇ရက်တွင်ပြည်သူ့စစ်ခေါင်းဆောင် ဦးရွှေမင်း ကျဆုံးခဲ့ပြီး အင်လုံခတပ်စန်းကို သိမ်းနိုင်ခဲ့ခြင်းဖြစ်သည်။
“ဝိုင်းမော်နဲ့ရွှေညောင်ပင်ကြားမှာရှိတဲ့ ပြည်သူ့စစ်စခန်း အင်လုံခ ။ ဦးရွှေမင်းကျသွားတဲ့ တိုက်ပွဲနေရာကနေ မနေ့က ညနေ ၆နာရီလောက်မှာ အဲဒီကနေ ဆုတ်သွားပြီ။ ကျနော်တို့ အဖွဲ့အင်အားမမျှလို့”ဟု KIA သတင်းရင်းမြစ်က ပြောသည်။
အဆိုပါတပ်စခန်းသည် စစ်ကောင်စီ၏ မြောက်ပိုင်းတိုင်းစစ်ဌာနချုပ် အခြေစိုက်ရာမြစ်ကြီးနားနှင့် နီးသည့် တပ်စခန်းဖြစ်၍ စစ်ကောင်စီက နေရာများခွဲပြီး အင်အားအလုံးအရင်းဖြင့် ထိုးစစ် ဆင်လာခြင်းဖြစ်သည်ဟု ဆိုသည်။
“ကျနော်တို့ဘက်က အင်အား ၁၀၀ ခန့်ပဲရှိတယ်။ သူတို့က အင်အား ၅၀၀ ကျော်လောက်ဝင်လာတာ။ မြစ်ကြီးနားကနေ အင်အားအလုံးအရင်း ဝင်လာတော့ ကျနော်တို့ဘက်က ဆုတ်ပေးလိုက်ရတယ်။ ဝိုင်းမော် အောင်မြေ(၁)၊ အောင်ဲမြေ (၂) ဆိုတာက မနေ့က တိုက်ပွဲဖြစ်တဲ့နေရာက မြစ်ကြီးနားနဲ့ ဟိုဘက်ကမ်း ဒီဘက်ကမ်းပဲ ဧရာ၀တီမြစ်ပဲခြားတာ။ ဧရာ၀တီ မြစ် အနောက်ဘက်ဆိုရင် မြစ်ကြီးနား။ အရှေ့ဘက်ဆိုရင်တော့ ဝိုင်းမော်လေ။ မြစ်ကြီးနားနဲ့ နီးနီးလေးပဲရှိတယ်ဆိုတော့ သူတို့အတွက် တော်တော် အန္တရာယ်ရှိတယ်ဆိုတော့ သူတို့က စစ်မျက်နှာ အလုံးအရင်းနဲ့ စစ်မျက်နှာ လေး၊ ငါး နေရာက ဝင်လာတော့ ကျနော်တို့ဘက်က ဆုတ်ပေးလိုက်ရပြီ”ဟု KIA သတင်းရင်းမြစ်က ပြောသည်။
Public Service Announcement
အခြားသတင်းတစ်ရပ်မှာ ဖားကန်မြို့နယ် တာမခန်တပ်စန်းမှ ဆုတ်ခွာလာသည့် စစ်ကောင်စီတပ် များကို KIA က ကြားဖြတ်တိုက်ခိုက်ခဲ့ရာ စစ်ကောင်စီတပ်က တပ်ရင်းမှူးပါ သေဆုံးခဲ့သည်ဟု စစ်ရေးသတင်းရင်းမြစ်တစ်ဦးက ပြောပြသည်။
“တာမခန်မှ ထွက်ပြေးလာတဲ့ စကစတပ်တွေ ခမရ(၁၁၉) တပ်ရင်းမှူးအပါအဝင် အယောက် ၇၀ ကျော် အကုန်လုံးကျဆုံး”ဟု စစ်ရေးသတင်းရင်းမြစ်က ပြောပြသည်။ ခမရ(၁၁၉)၏ စစ်ကောင်စီ တပ်ရင်းမှူးမှာ ဒုဗိုလ်မှူးကြီး သက်ပိုင်ထွန်းဖြစ်သည်ဟုဆိုသည်။
ထို့ပြင် ယမန်နေ့ ညပိုင်းက ဖားကန့်နယ် ကသိုင်းတောင် စစ်ကောင်စီတပ်စန်းကိုလည်း KIAက တိုက်ခိုက်သိမ်းပိုက်ခဲ့သည်ဟု ဒေသံနှင့် စစ်ရေးသတင်းရင်းမြစ်တို့က ပြောသည်။
