ဆွမ်ပရာဘွမ်မြို့ကို KIAထိန်းချုပ်ထားပြီး စစ်ကောင်စီဗျူဟာစခန်းကို ဆက်လက်ထိုးစစ်ဆင်နေ

ကချင်ပြည်နယ် ဆွမ်ပရာဘွမ်မြို့ကို ကချင်လွတ်လပ်ရေးတပ်မတော်(KIA)က ထိန်းချုပ်ထားပြီး စစ်ကောင်စီ ဗျူဟာစခန်းကို ဆက်လက်ထိုးစစ်ဆင်နေကြောင်း စစ်ရေးသတင်းရင်းမြစ်က ပြောသည်။

ဆွမ်ပရာဘွမ်မြို့နယ်ရှိ စစ်ကောင်စီတပ်စခန်းအချို့ကို KIAက မတ်လ ဒုတိယပတ်တွင် သိမ်းပိုက်ပြီးနောက် ရဲစခန်းမှစခန်းမှူးဦးဆောင်သည့် အဖွဲ့သည် KIAထံ လက်နက်ချ အလင်းဝင်ခဲ့သည်။ ထို့နောက် ဆွမ်ပရာဘွမ်မြို့နယ်အတွင်း ကျန်နေသည့် စစ်ကောင်စီတပ်စခန်းကို မတ်လ ၁၄ရက်မှ စတင် ထိုးစစ်ဆင်နေခြင်းဖြစ်သည်။

“စကစ တပ်စခန်းကို ဆက်လက်ထိုးစစ်ဆင်နေဆဲပါ။ မြို့ကိုတော့ ငါတို့ ထိန်းချုပ်ထားတယ်”ဟု စစ်ရေး သတင်းရင်းမြစ်က ယနေ့ မတ်လ ၁၇ရက်နံနက်တွင် ပြောသည်။

ဆွမ်ပရာဘွမ် စစ်ကောင်စီဗျူဟာကုန်းကို သိမ်းပိုက်ပြီးဖြစ်ကြောင်း သတင်းများနှင့်ပတ်သက်ပြီး ယခုကဲ့သို့ ပြောပြခြင်းဖြစ်သည်။

အခြား စစ်ရေးသတင်းရင်းမြစ်တစ်ဦးကလည်း အပြင်းအထန် တိုက်နေဆဲဟု ဆွမ်ပရာဘွမ် တိုက်ပွဲ အခြေအနေကို ယနေ့နံနက်တွင် ပြောပြသည်။

Public Service Announcement

KIAက ဆွမ်ပရာဘွမ်စစ်ကောင်စီစခန်း သိမ်းတိုက်ပွဲဆင်နွှဲနေဆဲဖြစ်ကြောင်း KIA သတင်းပြန်ကြားရေးက ယမန်နေ့ညပိုင်း၌ အသိပေးထားသည်။ စစ်ကောင်စီဘက်ကလည်း လေကြောင်းပစ်ကူသုံးခုခံနေကြောင်း ဖော်ပြသည်။

ဆွမ်ပရာဘွမ်မြို့တွင်ရပ်ကွက် သုံးခုရှိပြီး ၂၀၁၄ သန်း​ခေါင်စာရင်းအရ လူဦး​ရေ ၂၅၀၀ ​ကျော်​နေထိုင်သည်။ ဆွမ်ပရာဘွမ် မြို့နယ်တွင် လူဦး​ရေ ၉၇၀၀​ကျော်ရှိကာ အ​ရှေ့ဘက်တွင် အင်ဂျန်းယန်မြို့နယ်၊ အ​နောက်ဘက်တွင် တနိုင်းမြို့နယ်၊ ​တောင်ဘက်တွင် မြစ်ကြီးနားမြို့နယ် ၊ ​မြောက်ဘက်တွင် ပူတာအို ၊မချမ်း​ဘော၊ ​ခေါင်လန်ဖူး မြို့နယ်တို့ ရှိသည်။

KIAအနေဖြင့် မတ်လ ၇ရက်မှစ၍ ဌာနချုပ်လိုင်ဇာအနီးရှိ စစ်ကောင်စီ တပ်စခန်းများကို တိုက်ခိုက်သိမ်းပိုက်မှု စစ်ဆင်ရေးလုပ်ဆောင်နေသကဲ့သို့ အခြား တပ်မဟာနယ်မြေအသီးသီး၌လည်း စစ်ကောင်စီတပ်နှင့် တိုက်ပွဲများ ဖြစ်နေကြောင်း KIA အသိပေးထားသည်။

လိုင်ဇာကို ခြိမ်းခြောက်နိုင်သည့် ခရာတောင်၊ ဘွမ်ရယ်တောင် စစ်ကောင်စီတပ်စခန်းများအပါအဝင် ဒေသတွင်း တပ်စခန်းအားလုံးကို စစ်ဆင်ရေး ၁၀ရက်အတွင်း အပြီးသတ် သိမ်းပိုက်ထားပြီး အခြား ဒေသရှိတပ်ရင်းနှင့် တပ်စခန်းများကိုလည်း သိမ်းပိုက်ထားသည်။