▪︎ဗိုလ်မှူးနှစ်ဦး၊ ပိုင်းလော့ဗိုလ်တစ်ဦးနှင့် အခြားအဆင့် လေးဦးသေဆုံးဟုဆို
နေ့သစ်/People’s Spring
ကရင်နီပြည်နယ်၊ ဖားဆောင်းမြို့နယ်၌ စစ်ကောင်စီရဟတ်ယာဥ်ကို ယနေ့(မေ ၆) ပစ်ချခဲ့ရာ အရာရှိအပါအဝင် စစ်ကောင်စီတပ်ဖွဲ့ဝင် ၇ ဦးသေဆုံး၊ နှစ်ဦး ဒဏ်ရာရခဲ့ကြောင်း ကရင်နီလူမျိုးပေါင်းစုံပြည်သူ့လွတ်မြောက်ရေးတပ်ဦး(ကလလတ-KNPLF)ပြောရေးဆိုခွင့်ရှိသူ ရဲဘော်လောရင်စိုးက ပြောသည်။
“ပျက်ကျတဲ့နေရာက ဝေးတယ်။ ပွန်ချောင်းအရှေ့ဘက်လောက်မှာ၊ ဘော်လခဲနားကပ်သွားတာပေါ့။ MI 2 ထင်တယ်။ MI 2 (တိုက်ခိုက်ရေးရဟတ်ယာဥ်)လို့ပြောတယ်” ဟု ကလလတ၏ တွဲဖက်အထွေထွေအတွင်းရေးမှူးလည်းဖြစ်သူ ရဲဘော်လောရင်စိုးက People’s Spring ကို ပြောသည်။
ယနေ့(မေလ ၆ ရက်) နံနက် ၁၁ နာရီ ၄၅ မိနစ်တွင် စစ်ကောင်စီ ရဟတ်ယာဥ်ကို ကရင်နီတပ်ပေါင်းစုများမှ ပွိုင့် (၈)မောင်းပြန် နှစ်လက်ဖြင့် ပစ်ချခဲ့ရာ ရဟတ်ယာဉ်မှာ ဘော်လခဲမြို့နယ်အတွင်းပျက်ကျခဲ့သည်ဟု ကလလတ- KNPLFက အသိပေးထားသည်။
![Public Service Announcement](https://i0.wp.com/www.ludunwayoo.com/wp-content/uploads/2024/04/Safer-practices_inside_psa_ads.jpg?resize=880%2C138&ssl=1)
Public Service Announcement
အဆိုပါ စစ်ကောင်စီရဟတ်ယာဥ်ပျက်ကျမှုတွင် စစ်ကောင်စီတပ်မှ ဗိုလ်မှူးနှစ်ဦး၊ ပိုင်းလော့ဗိုလ်တစ်ဦး၊ အခြားအဆင့် လေးဦး စုစုပေါင်း ၇ ဦး သေဆုံးကာ နှစ်ဦးဒဏ်ရာရခဲ့ကြောင်း ရဲဘော်လောရင်စိုးက အတည်ပြုသည်။
![နေပြည်တော်စစ်ရေးပြပွဲတွင်တွေ့ရသော Mi-2](https://i0.wp.com/www.ludunwayoo.com/wp-content/uploads/2024/05/438264608_775458567986271_4830671037644329426_n.jpg?resize=599%2C528&ssl=1)
“တိုက်ခိုက်ရေးယာဥ်ပဲဗျ။ ဖားဆောင်းမှာ ဒဏ်ရာရလူနာတွေ လာသယ်တာလား၊ အရာရှိတွေ လာပြန်သယ်သွားတာလား၊ အဲဒါတော့ အတိအကျမသိဘူး” ဟု ၎င်းက ဆိုသည်။
ပျက်ကျသည့်နေရာကို စစ်ကောင်စီတပ်က လေကြောင်းအကာအကွယ်ယူကာ ရဟတ်ယာဥ်အပျက်အစီးများ၊ စစ်ကောင်စီအလောင်းများ၊ ဒဏ်ရာရသူများကို ရှင်းလင်းသယ်ဆောင်သွားကြောင်း ရဲဘော်လောရင်စိုးက ရှင်းပြသည်။
ယနေ့ပျက်ကျသော MI 2 တိုက်ခိုက်ရေးရဟတ်ယာဥ်မှာ ပိုလန်နိုင်ငံထုတ်ဖြစ်ပြီး ပိုင်းလော့တစ်ဦးတည်းမောင်းဖြစ်ကာ ရဟတ်ယာဥ်ပေါ် ၈ ဦး သို့မဟုတ် ၁၀ ဦး တင်ဆောင်နိုင်ကြောင်း သိရသည်။
ရဟတ်ယာဥ်ပစ်ချခဲ့မှုနှင့်ပတ်သက်၍ KNPLF ဗျူဟာ (၁)က ထုတ်ပြန်သော ၂ မိနစ် ၈ စက္ကန့်ကြာသည့် ရုပ်သံမှတ်တမ်းတွင် ရဲဘော်များက ပွိုင့် ၈ မောင်းပြန်သေနတ်များဖြင့် ပစ်ခတ်နေသည်ကို တွေ့ရသည်။ သို့သော် ရုပ်သံမှတ်တမ်းတွင် ရဟတ်ယာဥ်ပျက်ကျခဲ့သည်ကိုမူ မတွေ့ရပေ။
![ပစ်ချခံရသော Mi-2 ပျံသန်းနေသည်ကိုသစ်ကိုင်းများကြားမှတွေ့ရစဥ်](https://i0.wp.com/www.ludunwayoo.com/wp-content/uploads/2024/05/438301223_775458601319601_711397112213871876_n.jpg?resize=267%2C324&ssl=1)
ဖားဆောင်း PDF တာဝန်ရှိသူက “ရဟတ်ယာဥ်တစ်စီးကျပါတယ်။၂ စီးလာတာတစ်စီးပစ်နိုင်ခဲ့တာပါ။ ပျက်ကျတဲ့ရဟတ်ယာဥ်ကို ကျွန်တော်တို့ ကပ်မရအောင် ဂျက်ဖိုက်တာ နှစ်စီးနဲ့ဝန်းရံထားတယ်”ဟု ပြောသည်။
အဆိုပါရဟတ်ယာဥ်သည် ကရင်နီဒေသ ဖားဆောင်းမြို့တွင် နောက်ဆုံးကျန်နေသည့် ခလရ(၁၃၄) နှင့် ခလရ (၁၃၅)သို့ စစ်ကူအဖြစ်လာရောက်ခဲ့ခြင်းဖြစ်ကြောင်းလည်းသိရသည်။ ပွန်ချောင်းအတိုင်း ဖားဆောင်းမြို့သို့လာသည့် ရဟတ်ယာဥ်တစ်စီးကို ကရင်နီပြည်လူမျိုးပေါင်းစုံပြည်သူ့လွတ်မြောက်ရေးတပ်ဦး (ကလလတ – KNPLF) ဗျူဟာ(၁) ပစ်ချခဲ့ခြင်းဟု People’s Spring၏ သတင်းရင်းမြစ်တစ်ဦးကလည်း ပြောသည်။
![၂၀၁၆ ဇွန်လ ၁၄ ရက်တွင် ရန်ကုန်-မန္တလေးလမ်းဘေး ဒိုက်ဦးမြို့နယ်အတွင်းပျက်ကျခဲ့သော Mi-2 ကို အမြန်လမ်းရဲတပ်ဖွဲ့က ရှာတွေ့ပြီးနောက်ရှင်းလင်းစဥ်](https://i0.wp.com/www.ludunwayoo.com/wp-content/uploads/2024/05/438222102_775458631319598_303233871908487046_n.jpg?resize=610%2C458&ssl=1)
MI-2 ရဟတ်ယာဥ်များမှာ ရုရှားနှင့် ပိုလန်နိုင်ငံတို့မှ ထုတ်လုပ်သည်။၂၀၁၆ ဇွန် ၁၄ ရက်တွင် ရန်ကုန်-မန္တလေး အမြန်လမ်းမကြီးဘေးရှိ ပဲခူးတိုင်း ၊ဒိုက်ဦးမြို့နယ် တွင်ပျက်ကျခဲ့ဖူးပြီး လေယာဥ်မောင်းများသေဆုံးခဲ့သည်။
စစ်တပ်အာဏာသိမ်းပြီးနောက်ပိုင်း တော်လှန်ရေးတပ်များက ပစ်ချဖျက်ဆီးနိုင်ခဲ့သော တိုက်လေယာဥ် ၊ရဟတ်ယာဥ် စုစုပေါင်း ၈ စီး ရှိလာပြီး ၊ကရင်နီတပ်ပေါင်းစုက ၃ စီးပစ်ချထားသည်။
(ကရင်နီတပ်ပေါင်းစုက စစ်ကောင်စီတပ်၏ Mi-2 ရဟတ်ယာဥ်ကို ပွိုင့် -၈ ဖြင့်ပစ်ခတ်နေစဥ်/ နေပြည်တော်စစ်ရေးပြပွဲတွင်တွေ့ရသော Mi-2 နှင့် ပစ်ချခံရသော Mi-2 ပျံသန်းနေသည်ကိုသစ်ကိုင်းများကြားမှတွေ့ရစဥ် / ၂၀၁၆ ဇွန်လ ၁၄ ရက်တွင် ရန်ကုန်-မန္တလေးလမ်းဘေး ဒိုက်ဦးမြို့နယ်အတွင်းပျက်ကျခဲ့သော Mi-2 ကို အမြန်လမ်းရဲတပ်ဖွဲ့က ရှာတွေ့ပြီးနောက်ရှင်းလင်းစဥ်။ဓါတ်ပုံ-KNPLF ၊ ဧရာဝတီ၊ အမြန်လမ်းရဲတပ်ဖွဲ့ )
![](https://i1.wp.com/ludunwayoo.com/wp-content/uploads/2021/08/banner-logo1-50px.png)