ထိုင်း​ရောက်မြန်မာ​တွေ သတိထားရတဲ့​နေ့ရက်​တွေ

​နေ့သစ်/People’s Spring

ထိုင်းနိုင်ငံ​ရောက်မြန်မာအချို့ ဇန်နဝါရီဒုတိယပါတ်မှာ အိမ်ရှင် ထိုင်းနိုင်ငံသားတချို့နဲ့ခိုက်ရန်ဖြစ်ပွားတာကစပြီးဆက်တိုက်ဆိုသလိုပြသာနာ​တွေဖြစ်ပွားခဲ့တာ​ကြောင့် ထိုင်း​ရောက်မြန်မာ​တွေကြားထဲစိုးရိမ်မှု​တွေမြင့်တက်လာပါတယ် ။ပြသာနာဖြစ်တဲ့မြန်မာအချို့ကို အ​ကြောင်းပြုပြီး ထိုင်းနိုင်ငံသားအချို့ကြားမှာ မြန်မာ​တွေအ​ပေါ် အမုန်းပွားလာတာ​ကြောင့်ဖြစ်ပါတယ် ။ ဒီပြသာနာ​တွေဟာ​သွေးရိုးသားရိုးမဟုတ်ပဲ ​နောက်ကွယ်မှာ အာဏာသိမ်းစစ်​အုပ်စုရဲ့လက်ပါနိုင်တယ်ဆိုတဲ့သုံးသပ်မှု​တွေလည်း ရှိ​နေပါတယ် ။ ဒါ​ကြောင့် အခုတပါတ်မှာ ထိုင်း​ရောက်မြန်မာ​အချို့ဖြစ်ခဲ့တဲ့ပြသာနာနဲ့ ထိုင်း​ရောက်မြန်မာ​တွေကြားစိုးရိမ်မှု​တွေအ​ကြောင်း​ပြောပြပါမယ်။

ပြသာနာအစက ဇန်နဝါရီ ၁၁ရက်က ထိုင်းနိုင်ငံ၊စမွတ်ပရာကန်ခရိုင်မှာ The One စားသောက်ဆိုင်ပို မြန်မာနိုင်ငံသားရဲ့ကားနဲ့ အစားအသောက်​တွေအိမ်အ​ရောက်ပို့​ပေးတဲ Line man ကထိုင်းအလုပ်သမားတဦးရဲ့ ဆိုင်ကယ် မတော်တဆဖြစ်ခဲ့ပါတယ်။ ထိုင်းဒလီသမားက ဆိုင်ကယ်ဟွန်းတီးခဲ့လို့ မြန်မာနိုင်ငံသားက လက်ခလယ်​​ထောင်ပြပြီးခိုက်ရန်ဖြစ်ပွားပြီးဆိုင်ကိုလိုက်ခဲ့ဖို့ စိန်ခေါ်ခဲ့ပါတယ်။

ဆိုင်ကိုလိုက်လာတဲ့ ထိုင်းဒလီသမားနဲ့ သူငယ်ချင်း ၂ ဦး ကို စားသောက်ဆိုင်ထဲက မြန်မာတွေက အုပ်စုလိုက် တုတ်တွေနဲ့ ဆိုယ်ကယ်ကိုထွက်ရိုက်ခဲ့တဲ့ ရုပ်သံဖိုင်ဟာ ထိုင်းလူမှုကွန်ရက်သုံးစွဲသူတွေကြား ပျံ့နှံ့ခဲ့ပါတယ်။ စမွတ်ပရာကန်ဟာဘန်​ကောက်မြို့နဲ့ ၁၈ မိုင်​ကျော်ပဲ​ဝေးပြီးကားနဲ့ဆိုရင် မိနစ်ပိုင်းပဲ​မောင်းရပါတယ်။

ဒီဖြစ်စဥ်အ​ပေါ် အခွင့်ကောင်းယူပြီး ထိုင်းအမျိုးသားရေးအစွန်း​ရောက်အဖွဲ့ဖြစ်တဲ့ ပြည်သူ့ဒီမိုကရေစီပြုပြင်ပြောင်းလဲရေးကော်မတီ
(PDRC)က နှုတ်ခမ်းမွှေး(နာမည်ပြောင်)နဲ့အဖွဲ့သား​တွေကပါ​ဝင်လာပြီးလူမျိုးရေးပဋိပက္ခအဖြစ်လှုံ့ဆော်ခဲ့ပါတယ်။

ထိုင်းနိုင်ငံမှာ ထိုင်းနိုင်ငံသားက မြန်မာလုပ်သား သတ်တဲ့ လူသတ်မှုကျူးလွန်တာမျိုး ၊မြန်မာလုပ်သားက ထိုင်းနိုင်ငံသားကိုသတ်တဲ့ လူသတ်မှုကျူးလွန်တာမျိုး ဖြစ်စဉ်​တွေ ရှိခဲ့ပေမယ့် အခုလိုအုတ်အော်သောင်းနှင်းမဖြစ်ခဲ့ဘူးလို့ ထိုင်းရောက်မြန်မာလုပ်သားအရေးဆောင်ရွက်သူတွေက ပြောပါတယ်။

နှုတ်ခမ်းမွှေးနဲ့အဖွဲ့က ဇန်နဝါရီ ၁၂ရက်မှာ မြန်မာလုပ်သားတွေ အလုပ်လုပ်တဲ့ဆိုင်​ရှေ့ကိုလာပြီး အလုပ်သမား​တွေကိုရှာ​ပေးဖို့ ၊ဖမ်းဆီး​အ​ရေးယူဖို့ လူစုလူဝေး နဲ့ ထိုင်းရဲတပ်ဖွဲ့ကို ​တောင်းဆိုပါတယ်။ ထိုင်း​ရောက်မြန်မာမုန်းတီး​ရေးကိုလည်း လှုံံ့ဆော်ခဲ့ပါတယ်။

အဲဒီလို လှုံ့ဆော်မှုတွေလုပ်ပြီး တစ်ရက်အကြာ ဇန်နဝါရီ ၁၃ရက်မှာပဲ ထိုင်းရောက်မြန်မာလုပ်သားတချို့ရဲ့ ရမ်းကားမှုတွေ၊ ထိုင်း​ရောက်မြန်မာအချို့ရိုက်နှက်ခံရမှုတွေဟာ တစ်ရက်တည်း ဖြစ်ရပ်သုံးခုရှိခဲ့ပါတယ်။

ဇန်နဝါရီ ၁၃ရက်မှာ ထိုင်းနိုင်ငံ နွန်ထဘူရီခရိုင်မှာ ထိုင်းအမျိုးသမီးနဲ့ ယာဉ်တိုက်မှုဖြစ်တဲ့ မြန်မာလူငယ်ကို Grab မောင်းသူတွေက ဝိုင်းရိုက်နှက်ခဲ့တဲ့ ဖြစ်စဉ် ဖြစ်ခဲ့ပါတယ်။ယာဉ်တိုက်မှုဖြစ်တဲ့ နေရာကို ထိုင်းGrab မောင်းသူတွေရောက်လာပြီး ဝိုင်းရိုက်နှက်ခဲ့တာဖြစ်ပါတယ်။

နွန်ထဘူရီခရိုင်က အသက်(၂၀)အရွယ် မြန်မာလူငယ် ဝိုင်းဝန်းရိုက်နှက်ခံရတဲ့ဖြစ်စဉ်ဟာ စမွတ်ပရာကန်ခရိုင်မှာဖြစ်တဲ့ စားသောက်ဆိုင်ဖြစ်စဉ်ရဲ့ လူမျိုးရေးပဋိပက္ခလှုံ့ဆော်မှု နောက်ဆက်တွဲလို့ ထိုင်းရောက်မြန်မာလုပ်သားအရေးကူညီသူတွေက သုံးသပ်ကြပါတယ်။

ဒါအပြင်ဇန်နဝါရီ ၁၃ ရက် မနက် ၃နာရီကျော်မှာ ထိုင်းနိုင်ငံ လာ့ငူးမြို့၊ ရပ်ကွက်(၆)က လမ်းမပေါ်မှာရှိတဲ့ ကားနဲ့ဆိုင်ကယ်တွေကို ဆေးကြောင်နေတဲ့ မြန်မာတစ်ဦးက လိုက်လံရိုက်နှက် ဖျက်ဆီးခဲ့တဲ့ဖြစ်စဥ်​ပေါ်​ပေါက်လာပြန်ပါတယ်။လူတွေအိပ်မောကျနေတဲ့အချိန်မှာ ကားမဘေးမှာရပ်ထားတဲ့ ကားတွေနဲ့ ဆိုင်ကယ် ၂၀နီးပါးကို မူးယစ်​​​နေတဲ့မြန်မာတဦးကဖျက်ဆီးခဲ့တာပါ။

ဒါ့တင်အက​သေးပဲ ထိုင်းနိုင်ငံ၊ ချွန်ဘူရီခရိုင်မှာလည်း မြန်မာတွေ အချင်းချင်း အုပ်စုဖွဲ့ ခိုက်ရန်ဖြစ်ပွားပြီး ဓားနဲ့ထိုးရမ်းကားမှု ဖြစ်ခဲ့ပြန်ပါတယ်။ချွန်ဘူရီခရိုင်၊ ဖန်ထောင်မြို့၊ ဘန့်ကောင်လမ်းက Seven Eleven စတိုးဆိုင်ရှေ့မှာ ဇန်ဝါရီ ၁၃ ရက် ညပိုင်းက ဖြစ်ပွားခဲ့တာပါ။အုက်စုဖွဲ့ခိုက်ရန်ဖြစ်ပွားမှုမှာတုတ်​တွေ ၊ဓါး​တွေပါ အသုံးပြုခဲ့တာ​ကြောင့် ဒဏ်ရာရသူအချို့လည်းရှိခဲ့ပါတယ်။

ဆက်တိုက်ဆိုသလိုဖြစ်ခဲ့တဲ့ ပြသာနာ​တွေ​ကြောင့်ထိုင်းနိုင်ငံလူမှုကွန်ယက်မှာ မြန်မာ​တွေအ​ပေါ် ​ဝေဖန်မှု​တွေ ၊အမုန်းစကား​ပြောမှု​တွေ မြင့်တက်လာပါတယ် ။ဒါအပြင်ပြသာနာရှာသူ​တွေကို​ထောင်ချပြီး မြန်မာနိုင်ငံကိုနှင်ချဖို့​​​ပြောဆိုမှု​တွေပိုများလာပါတယ် ။

Khaosod သတင်းဌာနရဲ့ ထိုင်းဘာသာနဲ့​ဖော်ပြတဲ့​ဖေစ်ဘွခ်က မြန်မာသတင်း​တွေ​ရဲ့​အောက်မှာ မြန်မာနိုင်ငံသား​တွေအ​ပေါ်​ရေးသားတဲ့မှတ်ချက်​တွေကိုကြည့်ရင် ထိုင်းနိုင်ငံသား​တွေရဲ့အခုဖြစ်ရပ်​တွေအ​ပေါ် ​စိတ်ဆိုး​ဒေါသထွက်​နေတာကိုအတိုင်းသား​တွေ့ရပါတယ် ။

“ အပြစ်ပေးရင် အပြင်းထန်ဆုံး အရေးယူပေးပါ။ တခြားမြန်မာတွေ နောက်နောင် ထိုင်းလူမျိုးတွေအပေါ် ဒါမျိုး ထပ်မလုပ်ရဲအောင် နမူနာပြ (စံပြ) အနေနဲ့ ထိထိရောက်ရောက် အပြတ်အသတ် အရေးယူပေးပါ။” လို့ ထိုင်းနိုင်ငံသားတဦးကမှတ်ချက်​ရေးသားပါတယ် ။

​အခြားထိုင်းနိူင်ငံသားတဦးကလည်း line man ​တွေနဲ့ခိုက်ရန်ဖြစ်ပွားပြီး ပြန်​တောင်းပန်တဲ့မြန်မာ​တွေနဲ့သတင်း​အောက်မှာ “ အပြစ်ရှိရင် ထောင်ချမယ်၊ ပြစ်ဒဏ်စေ့ရင် နာမည်ပျက်စာရင်း (Blacklist) သွင်းပြီး ဒီနိုင်ငံထဲကို တစ်သက်လုံး ပြန်ဝင်ခွင့်မပေးဘဲ နှင်ထုတ်မယ်။ ခင်ဗျားတို့ဟာ လူ့အဖွဲ့အစည်းအတွက် အန္တရာယ်ရှိတဲ့သူတွေပဲ” လို့မှတ်ချက်ပြုပါတယ် ။

“ ​ဘယ်တော့မှ ခွင့်မလွှတ်ဘူး၊ မြန်မာပြည်ကိုပဲ ပြန်သွားကြတော့” လို့ထိုင်းနိုင်ငံသားတဦးကလည်း​ပြောပါတယ်။

“ ​ငါတို့မြေပေါ်ကနေ အခုချက်ချင်း ထွက်သွားကြ။ ​ဥပဒေအရ အပြတ်အသတ် အရေးယူမယ်၊ ပြီးရင် ပြည်နှင်ဒဏ်ပေးမယ်၊ ဒီနိုင်ငံကို တစ်သက်လုံး ပြန်ဝင်ခွင့် ပိတ်ပင်မယ်။” လို့ ထိုင်းနိုင်ငံသားတဦးကလည်းစား​သောက်ဆိုင်ကရန်ဖြစ်တဲ့မြန်မာ​တွေ မှတ်ချက်ပြုပါတယ်၊

အခြားထိုင်းနိုင်ငံသားတဦးက​လည်း မြန်မာ​တွေကို​လျော့ပြီးလာအိုလုပ်သား​တွေပို​ခေါ်ဖို့ အခုလိုမှတ်ချက်ပြုပါတယ် ။” ​မြန်မာလုပ်သားတွေကို အများကြီး လက်မခံသင့်ဘူး၊ ကောင်းတဲ့သူတွေကိုပဲ သေချာစိစစ်ပြီး လက်ခံသင့်တယ်။ လာအိုလုပ်သားတွေကို ပိုလက်ခံတာက ပိုကောင်းလိမ့်မယ်”

တကယ်​တော့ထိုင်းနိုင်ငံသား​တွေက ထိုင်း​ရောက်မြန်မာ​တွေကိုအမုန်းပွားပြီး အ​နေခက်​အောင်လုပ်ချင်တာမှာ အာဏာသိမ်းမြန်မာစစ်တပ်ရဲ့ဆန္ဒဖြစ်ပါတယ် ။စစ်တပ်အာဏာသိမ်းပြီး​နောက်ပိုင်းထိုင်ူနိုင်ငံကို မြန်မာနိုင်ငံသားသန်း​ပေါင်းများစွာ​ရောက်ရှိလာပါတယ်။စစ်အာဏာရှင်ကို​တော်လှန်သူ​တွေ၊​ကျောင်းတက်သူ​တွေ ၊အလုပ်လုပ်သူ​တွေ ၊စစ်မှူထမ်းရမှာစိုးလို့ထွက်​ပြေးလာသူ​တွေစသဖြင့်သန်းနဲ့ချီရှိပါတယ်။ဒါ​ကြောင့်ထိုင်း​ရောက်မြန်မာ​တွေထဲမှာ စစ်တပ်နဲ့နီးစပ်သူ ၊စစ်တပ်​ထောက်ခံသူ​တချို့ရှိတဲ့တိုင် အများစုက စစ်တပ်ကိုမကြိုက်သူ ၊ဆန့်ကျင်တဲ့​တော်လှန်သူ​တွေဖြစ်ပါတယ်။

ထိုင်း​ရောက်မြန်မာသန်း​ပေါင်းများစွာရှိ​ပေမယ့်စစ်တပ်​ရွေး​ကောက်ပွဲကိုမဲ​ပေးသူ ရာဂဏန်းပဲရှိတာ ​၊​တော်လှန်​ရေးရန်ပုံ​ငွေ ​ထောက်ပံ့မှုအများအပြားရှိတာက ဒီအချက်ကိုသိသာ​စေပါတယ်။ ဒါ​ကြောင့်လည်းစစ်တပ်က ထိုင်း​ရောက်မြန်မာ​တွေကို ဒုက္ခ​ပေးဖို့ မကြာခဏ ကြံစည်ခဲ့တာလို့ ထိုင်း​ရောက်မြန်မာ​တွေက​ပြောပါတယ်။

ထိုင်းနိုင်ငံမှာ ထိုင်းနိုင်ငံသားနဲ့ မြန်မာတွေအကြား အမုန်းတရားကြီးထွားအောင် လှုံ့ဆော်တာနဲ့ လူမျိုးရေးပဋိပက္ခဖြစ်အောင် စစ်တပ်ကမြင်မြင်သာသာ စခဲ့တာ ပြီးခဲ့တဲ့ သုံးလကျော်ကတည်းကပါ။

မန္တ​လေးက ပျူ​စောထီးခေါင်းဆောင် သင်္ဃန်းဝတ်ပေါက်ကိုယ်တော်က ထိုင်းရောက်မြန်မာတွေထဲမှာ နွေဦးတော်လှန်ရေးတက်ကြွစွာပါဝင်တဲ့ မြန်မာတွေအပေါ် ဖိနှိပ်နေတဲ့ ထိုင်းနှုတ်ခမ်းမွှေးကို ပြီးခဲ့တဲ့ စက်တင်ဘာ ဒုတိယပတ်က ထိုင်းနိုင်ငံမြို့
တော်ဘန်ကောက်မှာသွားရောက်တွေ့ဆုံခဲ့ပါတယ်။

ဘန်ကောက်မြို့မှာ ပေါက်ကိုယ်တော်နဲ့ ထိုင်းနှုတ်ခမ်းမွှေးတွေ့ဆုံမှုအပြီးမှာ စစ်အုပ်စုနဲ့ ​ပေါက်ကိုယ်​တော်ပူး​ပေါင်းပြီးထိုင်း​ရောက်မြန်မာ​တွေကို ဒုက္ခ​ပေးဖို့ကြံစည်​ခဲ့ကြပါတယ်။

ပေါက်ကိုယ်တော်ရဲ့အစီအစဉ်ဟာ ထိုင်းနိုင်ငံမှာရှိနေတဲ့ ထောက်ပို့တွေ၊ နွေဦးတော်လှန်ရေးတက်ကြွစွာပါဝင်သူတွေကို နှိမ်နှင်းဖို့ ထိုင်းနှုတ်ခမ်းမွှေးကို လာတွေ့တာလို့ ထိုင်းရောက်မြန်မာလုပ်သားအရေးကူညီဆောင်ရွက်သူတွေက​ပြောခဲ့ကြပါတယ်။ သူတို့သုံးသပ်တဲ့အတိုင်းပဲ ပေါက်ကိုယ်တော်က အကောင်အထည် ​ဖော်ခဲ့ပါတယ်။

ဘယ်လိုပြသာနာရှာလဲဆိုရင် ပေါက်ကိုယ်တော်က ပျူစောထီး​တွေထဲက သူ့လက်ရုံးလူမိုက်အချို့ကို ထိုင်းကိုစေလွှတ်ပြီး မြန်မာတွေအများဆုံးရှိတဲ့နေရာတွေမှာ ပြဿနာရှာခိုင်းတာ ဖြစ်ပါတယ်။

ပေါက်ကိုယ်တော်က ထိုင်းမှာပြဿနာရှာဖို့အတွက် သူရဲ့လူအချို့ကိုထိုင်းကိုစေလွှတ်ဖို့ စီစဉ်​နေတာကို People’s Spring က ၂၀၂၅ နိုဝင်ဘာမှာ စုံစမ်းသိရှိခဲ့ပါတယ်။

“ ထိုင်းကိုသွားပြီး ပြသာနာရှာပေးရပါ့မယ်တဲ့။ ထိုင်းမှာ မြန်မာတွေအနေများတဲ့ ရက်ကွက်တွေ အလုပ်တွေဆီကိုသွားပြီး ပြသာနာရှာပေးရပါ့မယ်တဲ့။ပြီးရင် ပြန်လာရပါ့မယ် ပြောပါတယ်” လို့ ပေါက်ကိုယ်တော်နဲ့ နီးစပ်သူတဦးက လူထုနွေဦးကို သတင်းပေးပါတယ်။

ပေါက်ကိုယ်တော် တပည့်အဖြစ်ခံယူပြီး လူမိုက်လုပ်နေသူတွေဟာ အနေအစားချောင်လို့ လုပ်နေတဲ့သူတွေဖြစ်တယ်လို့ သူက ပြောပါတယ်။ ထိုင်းကိုသွားပြီး မြန်မာနေတာများတဲ့​နေရာ​တွေမှာ ပြသာနာရှာဖို့ ​ပေါက်ကိုယ်​တော်က သူ့တပည့်လူမိုက်​တွေကို အသွားအပြန်စာရိတ်ငြိမ်း​စေလွှတ်​ပေး​နေတာလို့စုံစမ်းသိရပါတယ်။

အဲဒီလိုပြသာနာရှာရင် ထိုင်း​ရောက်မြန််မာ​တွေကိုအိမ်ရှင်ထိုင်းနိုင်ငံသား​တွေက မကြိုက်​အောင် ၊မြန်မာ​တွေအ​နေကြပ်ပြီး ဒုက္ခ​​ရောက်​အောင်၊ထိုင်းမှာမ​နေနိုင်​အောင် ​ပေါက်ကိုယ်​တော်ကတဆင့်စစ်တပ်ကကြံစည်​နေတာဖြစ်ပါတယ်။

ထိုင်းနှုတ်ခမ်းမွှေးဆိုသူဟာလည်း ထိုင်းရောက်မြန်မာလုပ်သားတွေ အနေကြပ်အောင် ထိုင်းအာဏာပိုင်တွေအပေါ် လိုက်လံဖိအားပေးလိုက်လံဖမ်းဆီးခိုင်းနေသူ ဖြစ်ပါတယ်။ထိုင်းရောက်မြန်မာလုပ်သားတွေကတော့ သူတို့ကို ထိုင်းမဘသလို့ ခေါ်ကြပါတယ်။

ထိုင်းနှုတ်ခမ်းမွှေးဟာ ပြီးခဲ့တဲ့ ၂၀၂၄ စက်တင်ဘာ ၂၃ရက်မှာ ဘန်ကောက်မြို့က စစ်ကောင်စီရဲ့မြန်မာသံရုံးရှေ့ ဆန္ဒပြတာကစပြီး လူသိများလာတာပါ။ထိုင်းရောက်မြန်မာတွေ နှင်ထုတ်ဖို့နဲ့ စစ်ကောင်စီအနေနဲ့ နေရပ်ပြန်ခေါ်ကြဖို့ သူကဆန္ဒပြ​တောင်းဆိုခဲ့တာပါ။

အဲဒီနောက်ပိုင်းစကြီး နှုတ်ခမ်းမွှေးနဲ့အဖွဲ့ဟာ ထိုင်းရောက်မြန်မာလုပ်သားတွေအပေါ် သိသိသာသာဖိအားပေးလာခဲ့ပါတယ်။ အဓိက အကြောင်းပြချက်က​တော့ စစ်တပ်ကို​တော်လှန်ပြီး နွေဦးတော်လှန်ရေးကိုအားပေးနေကြလို့ပါအာဏာသိမ်းခေါင်းဆောင်မင်းအောင်လှိုင် ဘန်ကောက်လာခဲ့တဲ့ ၂၀၂၅ ဧပြီ ၅ရက်က ကုလသမဂ္ဂ UNရုံးရှေ့မှာ ကန့်ကွက်ဆန္ဒပြတဲ့သူတွေကို နှုတ်ခမ်း​မွေးနဲ့အဖွဲ့ကကိုယ်ထိလက်​ရောက် ထိုးကြိတ် ရန်ရှာခဲ့ပါ​သေးတယ်။

၂၀၂၅ ဇွန်၊ဇူလိုင်လတုန်းက နယ်စပ်မြို့ဖြစ်တဲ့ မဲဆောက်မြို့မှာ တရားမဝင်မြန်မာတွေ ဖမ်းဆီးရေးစီမံချက်အတွင်းမှာလည်း နှုတ်ခမ်းမွှေးနဲ့ အဖွဲ့ကမဲဆောက်သွားပြီး သွေးထိုးလှုံ့ဆော်မှုတွေလုပ်ခဲ့ပါသေးတယ်။

ထိုင်းနိုင်ငံမှာ နှစ်ပေါင်း ၂၀ကျော်ကြာနေထိုင်ပြီး မြန်မာလုပ်သားတွေအရေးကူညီနေသူတွေ ပြောပြချက်အရ နှုတ်ခမ်းမွှေးနဲ့အဖွဲ့ကို စစ်ကောင်စီရဲ့ မြန်မာသံရုံးက ထောက်ပံ့ပေးထားတယ်လို့ ပြောပါတယ်။ဘန်ကောက်မြို့Saint Louis ဘူတာအနီးက မြန်မာသံရုံးအဟောင်းအဆောက်အဦထဲကို နှုတ်ခမ်းမွှေးနဲ့အဖွဲ့က မကြာခဏလာလေ့ရှိတယ်လို့လည်း သူကပြောပါတယ်။

စစ်ကောင်စီသံရုံးက မြန်မာ−ထိုင်း ချစ်ကြည်ရေးအသင်းအဖွဲ့အစည်းဖွဲ့ပြီး အဲဒီအဖွဲ့ကနေ နှုတ်ခမ်းမွှေးအဖွဲ့ကို ထောက်ပံ့ပေးနေတာလို့လည်း မြန်မာလုပ်သားအရေးကူညီဆောင်ရွက်သူတဦးကလည်း ပြောပါတယ်။

အဲဒီအဖွဲ့မှာ မြန်မာ−ထိုင်း ဘာသာပြန်တွေခန့်ထားပြီး နှစ်နိုင်ငံအမုန်းစကားတွေပြန့်ပွားအောင်လူမှုကွန်ယက်​ပေါ်ကနေပါ ဝါဒဖြန့်ချီတာ​တွေလုပ်ခဲ့သလို ၊ပြင်ပမှာလုပ်နေကြတယ်လို့လည်း စုံစမ်းသိရပါတယ်။

ဒါ​ကြောင့် အခုရက်ပိုင်းအတွင်း ထိုင်းရောက်မြန်မာတွေကြားမှာ ထိုင်းနဲ့မြန်မာတွေအကြား လူမျိုးရေးအမုန်းပွားစေမယ့် ဖြစ်ရပ်တွေ ဆက်တိုက်ဖြစ်ပေါ်နေတာဟာ ကြိုတင်ကြံစည်မှုတွေဖြစ်တယ်လို့ ထိုင်းရောက်မြန်မာလုပ်သားတွေအရေးကူညီပေးနေတဲ့ အေအေစီမဟာမိတ်အဖွဲ့က ဦးခိုင်ကြီးက သုံးသပ်ပါတယ်။

“ မြန်မာတွေ အုပ်စုလိုက်ရမ်းကားနေကြတာဟာ ရည်ရွက်ချက်နဲ့အချိန်ကိုက်လုပ်နေတာ” လို့ ဦးခိုင်ကြီးက ပြောပါတယ်။

အခု Assumption UniversityအနီးကThe Oneစားသောက်ဆိုင်မှာ ဖြစ်တဲ့ဖြစ်စဉ်ဟာ ရိုးသားမှုမရှိဘူးလို့ ထိုင်းနိုင်ငံသားအဖြစ်ခံယူထားတဲ့ ထိုင်းရောက်မြန်မာအရေးကူညီပေးနေသူတစ်ဦးကလည်း ပြောပါတယ်။Assumption University ဟာ စစ်အုပ်စုရဲ့ သားသမီးတွေအများစု ပညာသင်ကြားနေတဲ့ကျောင်းလို့ သူက ဆက်​ပြောပါတယ်။

“ သူတို့သားသမီးတွေ အများစုတက်တဲ့ကျောင်းနားမှာဖွင့်ထားတဲ့ဆိုင်။ မဘသတွေနဲ့ ဆက်စပ်တယ်လို့ သိရတယ်။နောက်ပြီးနယ်စပ်မှာနွေဦးဆရာတော်ဖမ်းဆီးခံရတယ်ဆိုတဲ့ ဖြစ်စဉ်ရယ် အခု ရိုက်ပွဲတွေဆိုတာဟာ အချိန်ကိုက်ဖြစ်လာတာ” လို့ သူက ထောက်ပြပါတယ်။

အမျိုးသားညီညွတ်ရေးအစိုးရ(NUG)ကလည်းဇန်နဝါရီ ၁၄ရက်မှာ ထိုင်းနိုင်ငံရောက် မြန်မာနိုင်ငံသားတွေအနေနဲ့ တရားဥပဒေနဲ့မညီတဲ့ ကိစ္စရပ်တွေမှာ ပတ်သက်ခြင်းမပြုဖို့အပါအဝင် အချက် ၄ချက်လိုက်နာဖို့ ပန်ကြားချက်ထုတ်ပြန်ပါတယ်။

ထိုင်းနိုင်ငံမှာ ခိုလှုံနေတဲ့မြန်မာနိုင်ငံသားတွေ အနေနဲ့ ထိုင်းနိုင်ငံရဲ့ နိုင်ငံရေးနဲ့ အုပ်ချုပ်မှုရေးရာ ကိစ္စရပ်တွေမှာ ပါဝင် ပတ်သက်ခြင်း မပြုကြဖို့၊ တရားဥပဒေနဲ့မညီတဲ့ ဘယ်ကိစ္စမှာမဆိုပါဝင်ပတ်သတ်ခြင်းမပြုဖို့ တိုက်တွန်းထားပါတယ်။ဒါအပြင် ထိုင်းနိုင်ငံရဲ့ ဥပဒေနဲ့ စည်းမျဉ်းတွေ၊ ယဉ်ကျေးမှု ဓလေ့ထုံးတမ်းတွေ၊ ဒေသန္တရစည်းကမ်းတွေကို လေးစားလိုက်နာဖို့၊ အိမ်ရှင်လူမှုအသိုင်းအဝိုင်းရဲ့ တန်ဘိုးထားမှု၊ လူနေမှုပုံစံတွေနဲ့အညီ သဟဇာတဖြစ်စွာ လိုက်လျောညီထွေနေထိုင်ကြဖို့ အကြံပြုထားပါတယ်။

အကြောင်းအမျိုးမျိုးကြောင့် နိုင်ငံစွန့်ခွာထွက်ပြေးကာ ခိုလှုံနေထိုင်နေကြရတဲ့ မြန်မာနိုင်ငံသားတွေကို ကာကွယ်စောင့်ရှောက် လက်ခံပေးထားတဲ့ ထိုင်းနိုင်ငံ ဘုရင်မင်းမြတ်၊ ထိုင်းအစိုးရနဲ့ ထိုင်းပြည်သူလူထုကိုလည်း အထူးပင် ကျေးဇူးတင်ကြောင်းဖော်ပြထားပါတယ်။ မြန်မာနိုင်ငံသားတွေကို လူသားချင်းစာနာထောက်ထားလျက် ဆက်လက်ကူညီစောင့်ရှောက်ပေးဖို့ မေတ္တာရပ်ခံထားပါတယ်။

၂၀၂၅ခုနှစ် ဇူလိုင်လက ထုတ်ပြန်ချက်ထဲမှာမြန်မာနိုင်ငံမှာဖြစ်ပေါ်နေတဲ့အကြမ်းဖက်စစ်အုပ်စုရဲ့ ပြည်သူလူထုအပေါ် ဖိနှိပ်ရက်စက်မှုတွေကြောင့်ထွက်ပြေးခိုလှုံလာရတဲ့ မြန်မာနိုင်ငံသားတွေဟာ ထိုင်းနိုင်ငံရဲ့ အမျိုးသားအကျိုးစီးပွားကို ခြိမ်းခြောက်နေသူများ မဟုတ်ကြောင်း NUGကအသိ​ပေးခဲ့ပါတယ်။ မြန်မာနိုင်ငံအတွင်း အကြမ်းဖက်စစ်အုပ်စုရဲ့ အာဏာသိမ်းအကြမ်းဖက်မှုကို ဖယ်ရှားအောင်မြင်ပြီးပါက အမိမြန်မာနိုင်ငံ သို့ ပြန်လည် နေထိုင်ကြမည့်သူများသာ ဖြစ်ကြောင်းအသိပေးထားပါတယ်။

လက်ရှိအ​ခြေအ​နေမှာနှုတ်ခမ်းမွှေး နဲ့ စစ်တပ်လက်ကိုင်တုတ် ပေါက်ကိုယ်တော် ပေါင်းမိသွားတဲ့အတွက် ထိုင်းရောက်မြန်မာတွေ ပိုသတိထားပြီး နေထိုင်ကြရမယ်လို့လည်း မြန်မာလုပ်သားအရေးကူညီဆောင်ရွက်သူတဦးကသတိပေးပါတယ်။

ထိုင်းနိုင်ငံမှာလည်း က​​မ္ဘောဒီးနဲ့နယ်စပ်စစ်ပွဲဖြစ်ပြီး​နောက်ပိုင်းအမျိုးသား​ရေးစိတ်ဓါတ်​တွေပြင်းထန်လာပါတယ် ။ဒီအ​ခြေအ​နေမှာ လူမျိုး​ရေးပဋိပက္ခ​တွေဖန်တီးလို့လွယ်တဲ့အ​ခြေအ​နေဖြစ်တာ​ကြောင့်မြန်မာ​တွေအ​ပေါ်အမုန်းမပွား​အောင်​နေထိုင်ကြဖို့ လုပ်သားအ​ရေး​ဆောင်ရွက်သူ​တွေကတိုက်တွန်းပါတယ်။ လူနည်းစုကပြသာနာရှာရင် သန်း​ပေါင်းများစွာရှိတဲ့လူအများအ​ပေါ်မှာပါသက်​ရောက်မယ့်အ​ခြေအ​နေဖြစ်ပါတယ်။ ဒါ​ကြောင့်မြန်မာ​တွေအ​နေနဲ့ ဥပဒေနဲ့အညီ၊အိမ်ရှင်နိုင်ငံရဲ့ ယဥ်​ကျေးမှုဓ​လေ့ထုံးတန်း​တွေနဲ့အညီ သဟဇာတဖြစ်​အောင်နေထိုင်ကြဖို့ ထိုင်းရာက်အလုပ်သမားအရေးဆောင်ရွက်သူတွေက အကြံပြုကြပါတယ်။ ။