တိုက်ပွဲပြင်းထန်နေဆဲဟု ချင်းသတင်းရင်းမြစ်ပြော၊ ချင်းပူးပေါင်းတပ်က ရဲဘော်အချို့ ထိခိုက်မှုရှိဟုဆို
ဖေဖော်ဝါရီ−၂၂၊ ၂၀၂၆။ ထားမြတ်/People’s Spring
ချင်းပြည်နယ်၊ဖလမ်းမြို့နယ်ထင်းရှူးစခန်းမှာ တပ်စွဲထားတဲ့ စစ်ကောင်စီတပ်ဖွဲ့ကို ချင်းတော်လှန်ရေး ပူးပေါင်းတပ်က တိုက်ခိုက်ခဲ့ရာ လက်နက် ၉လက်နဲ့ စစ်သား ရုပ်အလောင်းအချို့ သိမ်းရတယ်လို့ ချင်းသတင်းရင်းမြစ်က ပြောပါတယ်။
ချင်းအမျိုးသားတပ်မတော်(CNA)၊ CDF တပ်ဖွဲ့တွေနဲ့ ချင်းအမျိုးသားကာကွယ်ရေးတပ်(CNDF) တို့ ပူးပေါင်းပြီး စစ်ကောင်စီကို တိုက်ခိုက်ခဲ့တာလို့ ဆိုပါတယ်။
Public Service Announcement
“လက်နက်၉လက်သိမ်းဆည်းရရှိခဲ့တယ်။ပြီးရင်ဒီမနက်မှာလည်း ဆက် လက်ပြီး နယ်မြေရှင်းလင်းရေး လုပ်နေတုန်း စကစ ကျန်ရှိနေတဲ့သူတွေနဲ့ တိုက်ပွဲရှိတယ်။ စကစက လေယာဉ်နဲ့ ဗုံးကြဲတိုက်ခိုက်တယ်။ စကစ နှစ်ယောက် အလောင်းတွေ့ရှိခဲ့တယ်။ နယ်မြေရှင်းလင်းရေး အပြီးမလုပ်နိုင်သေးဘူး။ အခု ပြောနေတဲ့ အချိန်မှာလည်း တိုက်ပွဲ ကရှိနေတယ်။ ချင်းတော်လှန်ရေးဘက်က ဒဏ်ရာရသူတွေရှိပါတယ်။ CDF KKG တယောက်က ကျဆုံးခဲ့တာပေါ့” လို့ ချင်းသတင်းရင်းမြစ်က ပြောပါတယ်။
စစ်ကောင်စီတပ်ဟာ ဖလမ်းမြို့ ပြန်ရဖို့ ထိုးစစ်ဆင်လာတာကို CNA ၊ CDF တွေ ပါဝင်တဲ့ ချင်းပြည်ကောင်စီနဲ့ ချင်းညီနောင်အဖွဲ့ဝင် ဒေသကာကွယ်ရေးတပ်တွေ အတူပူးပေါင်း ခုခံတိုက်ခိုက်နေတာပါ။
ပူးပေါင်းတပ်ဖွဲ့ရဲ့ စစ်ဆင်ရေးသတင်းကို CNDF ကလည်း ဒီကနေ့ ဖေဖော်ဝါရီ ၂၂ရက်ကထုတ်ပြန်ခဲ့ရာ မနေ့က တိုက်ပွဲမှာ စစ်ကောင်စီ တပ်ဖွဲ့ဝင် ၂ဦး သေဆုံးပြီး ၁ဦး အရှင်မိတယ်လို့ အသိပေးထားပါတယ်။
“SAC တယောက် ကျနော်တို့ဆီ အလင်းဝင်ရောက်ရှိလာပါတယ်” လို့လည်း CNDFက ထုတ်ပြန်ထားပါတယ်။
ဖလမ်းမြို့တိုက်ပွဲမှာ အထိနာနေတဲ့ စစ်ကောင်စီတပ်ဟာ တပ်ဖွဲ့ဝင်တွေ လက်နက်ချတာ။ စစ်ကြောင်းကနေ ထွက်ပြေးတာတွေ မကြာခဏ ဖြစ်ပွားလျက်ရှိကြောင်း ချင်းတော်လှန်ရေးတပ်တွေရဲ့ သတင်းထုတ်ပြန်ချက် အရ သိပါတယ်။
စစ်ကောင်စီတပ်ဟာ ဖလမ်းအပါအဝင် ချင်းမြောက်ပိုင်း နယ်မြေတွေ ပြန်ရဖို့ စစ်အင်အား ထောင်ဂဏန်း အသုံးပြု ထိုးစစ်ဆင်နေတာ လေးလခန့်ရှိပြီဖြစ်ပြီး အထိအခိုက်များပြားလျက်ရှိပါတယ်။
